ഇന്ത്യ ഡിജിറ്റലൈസേഷന്റെ പാതയിലാണ് അതുകൊണ്ട് തന്നെ ഇന്ത്യയില് ഡിജിറ്റല് അറ്റാക്കുകള് ഉണ്ടാകാനുള്ള സാധ്യതയും ഏറിവരുകയാണ്. ഒരു സൈബര് അറ്റാക്കിന്റെ സാധ്യത മുന്നില് കണ്ട് ഇന്ത്യയിലെ ബാങ്കിങ് ഉപയോക്താകള്ക്ക് മുന്നറിയിപ്പുമായി കേന്ദ്രസര്ക്കാറിന് കീഴിലുള്ള സൈബര് സുരക്ഷ ഏജന്സിയായ കമ്പ്യൂട്ടര് എമര്ജന്സി റെസ്പോണ്സ് ടീം.
ബാങ്കിങ് ഉപയോക്താക്കളുടെ നിര്ണായക വിവരങ്ങള് ചോര്ത്താന് ഫിഷിങ് അറ്റാക്കിന് ഹാക്കര്മാര് തയാറെടുക്കുന്നുവെന്നാണ് മുന്നറിയിപ്പ്. ഇന്റര്നെറ്റ് ബാങ്കിങ് വിവരങ്ങള്, ഒ.ടി.പി, മൊബൈല് നമ്പര് എന്നിവയാണ് ഇത്തരത്തില് ചോര്ത്തുക.വ്യാജ ഇടപാടുകള് നടത്താനാണ് വിവരങ്ങള് ചോര്ത്തുന്നത്.
എന്ഗ്രോക് പ്ലാറ്റ്ഫോം കേന്ദ്രീകരിച്ചാണ് ഫിഷിങ് ശ്രമം നടക്കുന്നത്. ഇന്ത്യയിലെ ബാങ്കിങ് വെബ്സൈറ്റുകളാണ് പ്രധാനമായും ഈ പ്ലാറ്റ്ഫോമാണ് ഉപയോഗിക്കുന്നത്. അതിനാല് ബാങ്കിങ് ഉപയോക്താക്കള് ഹാക്കിങ്ങിന് വിധേയമായേക്കാമെന്നാണ് മുന്നറിയിപ്പ്.
ഉപഭോക്താക്കള് വ്യാജ എസ്.എം.എസ് അല്ലെങ്കില് ഇമെയില് അയച്ചാവും തട്ടിപ്പ് നടത്തുക. ഇത്തരം എസ്.എം.എസിന്റെ മാതൃകയും സൈബര് സുരക്ഷാ വിഭാഗം പുറത്ത് വിട്ടിട്ടുണ്ട്.
പ്രിയ ഉപഭോക്താവെ നിങ്ങളുടെ അക്കൗണ്ട് സസ്പെന്ഡ് ചെയ്തിരിക്കുന്നു. കെ.വൈ.സി പുതുക്കുന്നതിനായി താഴെക്കാണുന്ന ലിങ്കില് ക്ലിക്ക് ചെയ്യുക എന്നായിരിക്കും ഉപഭോക്താക്കള്ക്ക് ലഭിക്കുന്ന സന്ദേശം. ഇതില് ക്ലിക്ക് ചെയ്യുന്നതോടെ ഫിഷിങ് സൈറ്റിലേക്ക് എത്തുന്നു. ഈ സൈറ്റിന്റെ സഹായത്തോടെ ഉപഭോക്താക്കളുടെ നിര്ണായക വിവരങ്ങള് ചോര്ത്തിയാണ് തട്ടിപ്പ്. സംശയാസ്പദമായ നമ്പറുകളില് നിന്ന് വരുന്ന എസ്.എം.എസുകള്ക്കൊപ്പമുള്ള ലിങ്കുകളില് ക്ലിക്ക് ചെയ്യരുതെന്നാണ് സൈബര് വിദഗ്ധര് നല്കുന്ന പ്രധാന മുന്നറിയിപ്പ്. ഉപയോക്താക്കള്ക്ക് എസ്.എം.എസില് തന്നിട്ടുള്ള യു.ആര്.എല് സത്യമാണോയെന്ന് ഗൂഗ്ളില് നേരിട്ട് സേര്ച്ച് ചെയ്തും മനസിലാക്കാം. തെറ്റായ സ്പ്പെല്ലിങ്ങുള്ള ലിങ്കുകള് വ്യാജമാവാനുള്ള സാധ്യതയേറെയാണ്.
You must be logged in to post a comment Login