നടിയെ ആക്രമിച്ച കേസ് വീണ്ടും ചര്ച്ചയാകുമ്പോള് സംവിധായകനും നടനുമായ മഹേഷ് പ്രതികരണവുമായി രംഗത്ത്. നടന് ദിലീപ് ഏറെ പ്രതിരോധത്തിലായ കേസില്, അന്ന് ചാനല് ചര്ച്ചകളില് ദീലീപിനെ ന്യായീകരിച്ചതിന്റെ കാരണം വ്യക്തമാക്കിയിരിക്കുകയാണ് മഹേഷ്. ദിലീപ് തെറ്റ് ചെയ്തിട്ടില്ല എന്ന് തന്നെയാണ് താന് ഇപ്പോഴും വിശ്വസിക്കുന്നതെന്നാണ് മഹേഷ് പറയുന്നത്. ദിലീപിനെ പിന്തുണച്ച് നൂറിലേറെ മണിക്കൂറുകള് പല ചാനലുകളിലും പോയി സംസാരിച്ചിട്ടുണ്ട് എന്ന് മഹേഷ് പറയുന്നു. ദിലീപിനെ പിന്തുണച്ചപ്പോള് പ്രത്യേകിച്ചൊന്നും കിട്ടിയില്ലെന്നും മഹേഷ് പറയുന്നു.
ആ വിവാദ വിഷയത്തില്, ദിലീപിനെ ന്യായീകരിച്ച് എന്റെ മനസില് തോന്നിയ ഒരു തോന്നലുകൊണ്ട് പെട്ടെന്ന് സംസാരിച്ച് തുടങ്ങിയതല്ല. ഈ പ്രശ്നമൊക്കെ ഉണ്ടായി, ഒരു മാസത്തിലേറെ സമയം എടുത്ത ശേഷം എന്താണ് യഥാര്ത്ഥത്തില് എന്ന് ഞാന് ഒന്ന് വിശകലനം ചെയ്തു. അങ്ങനെ എന്റെ മനസില് തോന്നിയ സത്യം, അത് വെച്ചിട്ടാണ് സംസാരിച്ചത്. നീതിയാണ് മറ്റേത് നീതിക്കേടാണ് നടക്കുന്നത് എന്നൊക്കെ മനസിലാക്കികൊണ്ടാണ് ഞാന് സംസാരിച്ചു തുടങ്ങിയത്. ഞാന് ഇപ്പോഴും വിശ്വസിക്കുന്നത് ദിലീപ് തെറ്റ് ചെയ്തിട്ടില്ല എന്ന് തന്നെയാണ്. അയാള് ഒരിക്കലും ആ തെറ്റ് ചെയ്യില്ല. അയാള് ഒരു മണ്ടനല്ല. അയാള് നല്ല ബുദ്ധിയുളള, കൂര്മ ബുദ്ധിയുളള, വളരെ കഴിവുളള ഒരു ബിസിനസ്മാനാണ്. അദ്ദേഹം നല്ല ആക്ടറാണ്. എന്നാല് ആക്ടറേക്കാളും മുകളില് നില്ക്കുന്ന മനുഷ്യന്. അയാള് ഇങ്ങനെയൊരു വിഡ്ഡിത്തരം കാണിക്കില്ലെന്നാണ് മഹേഷ് പറയുന്നത്.
കഠിനാദ്ധ്വാനം കൊണ്ടാണ് മമ്മൂട്ടിയുടെയും, മോഹന്ലാലിന്റെയും ഒക്കെ ലെവലില് ദിലീപ് ഉയര്ന്നുവന്നത്. ഒരുപാട് കഠിനാദ്ധ്വാനം ചെയ്താണ് ദിലീപ് ഇന്ന് കാണുന്ന നിലയില് എത്തിയത്. എനിക്ക് ദിലീപിനെ പിന്തുണച്ചതുകൊണ്ട് പ്രത്യേകിച്ച് ഗുണങ്ങളൊന്നും ഉണ്ടായിട്ടില്ല.ഇത് ചിലപ്പോള് തെറ്റായിരിക്കാം. ഇനി കോടതി വിധി വരുമ്പോള് എല്ലാം തെളിയിക്കപ്പെടുമല്ലോ. ഞാന് പറഞ്ഞ കാര്യങ്ങള് സത്യമാണ്. ദിലീപ് ഇന്നസെന്റാണ്. അതില് യാതൊരു സംശയവുമില്ല. അയാളുടെ തലയില് അടിച്ചേല്പ്പിച്ചതാണ്. അതിന് പിന്നിലാരാണ് പ്രവര്ത്തിച്ചത് എന്ന് എല്ലാവര്ക്കും അറിയാം. പ്രത്യേകിച്ച് ഇദ്ദേഹത്തിനും അറിയാം. പക്ഷേ അതൊന്നും പുറത്തുപറയാനോ പ്രത്യേകിച്ച് ആരെയും ഹേര്ട്ട് ചെയ്യേണ്ട കാര്യവുമില്ലെന്നും മഹേഷ് പറയുന്നു.
കോടതി വിധി വരട്ടെ. കേസിനെ കുറിച്ച് കൂടുതലൊന്നും പറയാതിരിക്കുന്നതാണ് നല്ലത്. ദിലീപിന്റെ പതനം ആഗ്രഹിച്ചത് മെയിന് താരങ്ങളാണോ എന്നൊന്നും പറഞ്ഞ് ഞാന് ആരെയും കോര്ണര് ചെയ്യാന് ആഗ്രഹിക്കുന്നില്ലെന്നും മഹേഷ് തുറന്നുപറയുന്നു.
അതേസമയം, നടിയെ ആക്രമിച്ച കേസില് കാവ്യ മാധവന് കൂറുമാറിയെന്നാണ് പ്രോസിക്യൂട്ടര് വ്യക്തമാക്കിയത്. അതില് പ്രത്യേകിച്ച് അത്ഭുതപ്പെടാനില്ല.കാരണം കേസിലെ എട്ടാം പ്രതിയാണ് കാവ്യ മാധവന്റെ രണ്ടാംഭര്ത്താവും നടനുമായ ദിലീപ്. അപ്പോള് ഇതില് കൂടുതല് ഒന്നും തന്നെ സംഭവിക്കാനില്ല.34ാം സാക്ഷിയായിരുന്ന കാവ്യ ഇന്നലെയാണ് പ്രോസിക്യൂഷന് വിസ്താരത്തിനിടെ കൂറുമാറിയത്. വിചാരണക്കോടതിയില് സാക്ഷിയുടെ കൂറുമാറ്റം പ്രഖ്യാപിച്ച പ്രോസിക്യൂഷന് കോടതിയുടെ അനുമതിയോടെ കാവ്യയെ ഒരുമണിക്കൂര് ക്രോസ് വിസ്താരം ചെയ്തു. വിസ്താരം ഇന്നും തുടരുന്നുണ്ട്.
അക്രമത്തിന് ഇരയായ നടിയോട് കാവ്യയുടെ ഭര്ത്താവും കേസിലെ മുഖ്യപ്രതികളില് ഒരാളുമായ നടന് ദിലീപിന് ശത്രുതയുണ്ടെന്ന പ്രോസിക്യൂഷന് വാദത്തെ സാധൂകരിക്കാനാണു കാവ്യയെ സാക്ഷിപ്പട്ടികയില് ഉള്പ്പെടുത്തിയത്. സിനിമാ സംഘടനയായ അമ്മയുടെ സ്റ്റേജ്ഷോയുടെ റിഹേഴ്സല് ക്യാംപ് നടന്ന ഹോട്ടലില് വെച്ച് നടിയും ദിലീപും തമ്മില് വാക്കുതര്ക്കമുണ്ടായപ്പോള് ഒപ്പം കാവ്യയുണ്ടായിരുന്നതായി മൊഴി ലഭിച്ചിരുന്നു. നടിയെ ആക്രമിച്ച കേസില് ഇതുവരെ 178 പേരുടെ വിസ്താരമാണ് പൂര്ത്തിയായത്.
എന്നാല് സംഭവത്തിന് ശേഷം കാവ്യാ മാധവന് പൊലീസിന് നല്കിയെന്ന് പറയപ്പെടുന്ന മൊഴി ഇങ്ങനെയായിരുന്നു… ദിലീപ് – മഞ്ജു വിവാഹമോചനത്തിനു കാരണം ഞാനല്ല, 2008 ഫെബ്രുവരി അഞ്ചിനായിരുന്നു എന്റെ ആദ്യ വിവാഹം.തിരുവനന്തപുരം സ്വദേശിയായ നിശാല്ചന്ദ്ര ആയിരുന്നു ആദ്യ ഭര്ത്താവ്. ഞാനാണ് ആദ്യം വിവാഹമോചന നോട്ടീസ് നല്കിയത്. പിന്നീട് സംയുക്തമായി വിവാഹമോചന ഹര്ജി എറണാകുളം കോടതിയില് നല്കി.2010 ല് കുടുംബ കോടതിയില്നിന്നും വിവാഹ മോചന ഉത്തരവ് ലഭിച്ചു. ദിലീപേട്ടനും ആദ്യ ഭാര്യ മഞ്ജുവുമായുള്ള പ്രശ്നങ്ങള് എന്നു മുതലാണു തുടങ്ങിയത് എന്ന് എനിക്ക് അറിയില്ല. അവര് തമ്മിലുള്ള പ്രശ്നങ്ങള്ക്ക് ആക്രമിക്കപ്പെട്ട നടിയും ഒരു കാരണമായിട്ടുണ്ട്.
അതെനിക്കറിയാം. ഞാനും ദിലീപേട്ടനും അടുത്തിരിക്കുന്ന ഫോട്ടോ മഞ്ജുച്ചേച്ചിക്ക് അയച്ചുകൊടുത്തിട്ടുണ്ടെന്നു ദിലീപേട്ടന് പറഞ്ഞ് ഞാന് കേട്ടിട്ടുണ്ട്. ദിലീപേട്ടനും മഞ്ജുച്ചേച്ചിയും തമ്മില് പ്രശ്നങ്ങളുണ്ടാകാന് കാരണക്കാരി ഞാനാണെന്ന് ആക്രമിക്കപ്പെട്ട നടി പലരോടും പറഞ്ഞത് ഞാന് കേട്ടറിഞ്ഞിട്ടുണ്ടെന്നും കാവ്യ പറയുന്നു.
ദിലീപേട്ടന് സിദ്ദിഖ് അങ്കിളിന്റെ അടുത്തുപോയി ആക്രമിക്കപ്പെട്ട നടി ഇങ്ങനെ ആവശ്യമില്ലാത്തത് സംസാരിക്കുന്നുണ്ടെന്നും അവളെ നിയന്ത്രിക്കണമെന്നും പറഞ്ഞു. ഇവള്ക്ക് ഞങ്ങള് ഒരു ദ്രോഹവും ചെയ്തിട്ടില്ലല്ലോയെന്നു ദിലീപേട്ടനും പറഞ്ഞു. പ്രാക്ടീസ് നടക്കുന്ന സ്ഥലത്തുവച്ചു തന്നെയാണ് ആക്രമിക്കപ്പെട്ട നടിയുമായി സിദ്ദിഖ് അങ്കിള് സംസാരിച്ചത്.വേറെ ആരൊക്കെ അതില് ഇടപെട്ടു എന്ന് എനിക്കറിയില്ല. ഈ സംഭവത്തിനുശേഷം ദിലീപേട്ടന് അവളുമായി സംസാരിച്ചിട്ടില്ല. ‘മഴവില്ലഴകില് അമ്മ’ എന്ന പ്രോഗ്രാമിന്റെ റിഹേഴ്സല് നടക്കുന്ന സമയം. ‘വെള്ളരിപ്രാവിന്റെ ചങ്ങാതി’ എന്ന സിനിമയിലെ ‘പതിനേഴില്’ എന്നു തുടങ്ങുന്ന പാട്ടിന്റെ ഡാന്സ് ആണ് ഞാനും ദിലീപേട്ടനും ആ ഷോയില് അവതരിപ്പിച്ചിരുന്നത്. അതിന്റെ റിഹേഴ്സല് നടക്കുന്ന സമയത്താണ് ഈ സംഭവങ്ങളെല്ലാം നടക്കുന്നത്.
മഞ്ജുച്ചേച്ചി ദിലീപേട്ടന്റെ വീട്ടില്നിന്നും ഇറങ്ങിപ്പോകുന്നത് ദിലീപേട്ടനും മകള് മീനൂട്ടിയും ഓസ്ട്രേലിയയില് പോയ സമയത്താണ്. മഞ്ജുച്ചേച്ചിയുമായി ഞാനിപ്പോള് സംസാരിക്കാറില്ല. നടി ആക്രമിക്കപ്പെട്ട സംഭവം റിമി ടോമി ഫോണ് വിളിച്ച് പറയുമ്പോഴാണ് ഞാന് അറിയുന്നതെന്നും കാവ്യ വ്യക്തമാക്കി. നടിയെ ആക്രമിച്ച സുനിയെ എനിക്ക് പരിചയമില്ലെന്നും സുനിയെ ഇതിനു മുമ്പ് ഞാന് കണ്ടതായി ഓര്ക്കുന്നില്ലെന്നുമാണ് കാവ്യ മൊഴി നല്കിയത്.