ഒരു പേരുണ്ടാക്കിയ പൊല്ലാപ്പാണ് ഇന്നത്തെ ചര്ച്ചാ വിഷയം. ജാതിമത വര്ഗ ഭേദമില്ലാത്ത നാടാണ് നമ്മുടെ കേരളം എന്ന് വീമ്പിളക്കുമെങ്കിലും ഒരു സിനിമയുടെ പേരും പറഞ്ഞ് തുടങ്ങിയ അടിയാണ് ഇപ്പോള് സോഷ്യല് മീഡിയ തുറന്നാല് കാണുന്നത്.
നാദിര്ഷ സംവിധാനം ചെയ്ത് ജയസൂര്യ നായകനാകുന്ന ‘ഈശോ’ എന്ന ചിത്രത്തെ കുറിച്ചുള്ള വിവാദങ്ങളാണ് സോഷ്യല് മീഡിയകളില് ഇപ്പോള് കത്തിപ്പടരുന്നത്. സിനിമയുടെ പേര് മാറ്റണമെന്ന് ആവശ്യപ്പെട്ട് തുടക്കം മുതല് രംഗത്തുള്ളയാളാണ് പി സി ജോര്ജ്. ‘ഈശോ’യ്ക്ക് പിന്നാലെ ‘മണിയറയിലെ അശോകന്’ എന്ന ചിത്രത്തിലെ ഒരു പാട്ടിനെതിരെയും പ്രമുഖ ചാനല് ചര്ച്ചയില് പി.സി. ജോര്ജ് വിവാദ പരാമര്ശം നടത്തി.
ദുല്ഖര് സല്മാന് ആദ്യമായി നിര്മ്മിച്ച ഗ്രിഗറി നായകനായ ചിത്രത്തിലെ ‘മൊഞ്ചത്തിപ്പെണ്ണേ ഉണ്ണിമായേ’ എന്നു തുടങ്ങുന്ന ഗാനത്തിനെതിരെയാണ് പി.സി. ജോര്ജ് ചാനല് ചര്ച്ചയില് എതിര്ത്ത് സംസാരിച്ചത്. മണിയറയിലെ അശോകന് എന്ന ചിത്രത്തിന്റെ പേര് ഒരു ഹിന്ദുവിനെയാണ് സൂചിപ്പിക്കുന്നതെന്ന് പറഞ്ഞ പി.സി. ജോര്ജ് പാട്ടിലെ രണ്ടാമത്തെ വരിയില് ‘തഞ്ചത്തില് ഒപ്പന പാടി വായോ’ എന്നെഴുതിയതിനെയാണ് പരിഹസിക്കുന്നത്.
‘ഉണ്ണിമായ ഹിന്ദുസ്ത്രീയാണ്. ആ സ്ത്രീയോട് ഒപ്പന പാടിവരാന് പറഞ്ഞാല് എന്താണ് മനുഷ്യന് മനസിലാക്കേണ്ടത്. ഇതൊക്കെ ചര്ച്ച നടക്കുകയാണ് ഇപ്പോള്. അത് എഴുതിയത് ഷിഹാബ് ആണ്. പാട്ടിന്റെ ഭംഗിക്ക് വേണ്ടി എഴുതിയതാണ് എന്നൊക്കെ പറയുമായിരിക്കും. ‘മൊഞ്ചത്തിപ്പെണ്ണേ അയിഷാ ബീവി. തഞ്ചത്തില് ഒപ്പന പാടി വായോ’ എന്നെഴുതാമായിരുന്നല്ലോ. എന്തിനാ ഉണ്ണിമായയെ കേറ്റിയതവിടെ? അതൊക്കെയാ കുഴപ്പം,’ പി.സി. ജോര്ജ് പറഞ്ഞു.
‘നാദിര്ഷായെയും കൂട്ടരെയും ഞാന് വിടില്ല. ക്രിസ്ത്യന് സമൂഹത്തെ മാത്രമല്ല, അതിപ്പോള് മുസ്ലീം സമൂഹത്തെയും ഹൈന്ദവ സമൂഹത്തെയും അപമാനിച്ചാലും ഞാന് വിടില്ല. ആ പേര് അങ്ങ് മാറ്റ് ജയസൂര്യ. എന്നിട്ട് നല്ലൊരു പേരിടാന് നോക്ക്. ഞാന് ഒരു വര്ഗീയതായും പറയുന്നില്ല. ഈശോന്ന് പേരിട്ടാല് അത് ഞങ്ങളുടെ സഭയെ മോശമാക്കും’, പി സി ജോര്ജ് പറഞ്ഞു.
അതേസമയം, പി സി ജോര്ജിന്റെ ഇത്തരം ഡയലോഗുകള്ക്ക് നേരെ എതിരഭിപ്രായവും ഉയരുന്നുണ്ട്. എഴുതിയവനോ പാടിയവനോ അഭിനയിച്ചവനോ പോലുമറിയാത്ത അര്ത്ഥതലങ്ങളാണല്ലോ ജോര്ജ് സാര് കണ്ടുപിടിക്കുന്നതെന്നാണ് ചിലര് പറയുന്നത്.