സാധാരണക്കാരായ മനുഷ്യരുടെ സങ്കടങ്ങള് കാണാന് ദുരിതങ്ങള് കാണാന് കണ്ണും കാതും സര്ക്കാരിനുണ്ടാകണമെന്ന് പ്രതിപക്ഷ നേതാവ് വിഡി സതീശന്. കോട്ടയത്തെ ഇരട്ട ആത്മഹത്യയെക്കുറിച്ച് പറയവെയാണ് വിഡി സതീശന് വികാരഭരിതനായത്. കോട്ടയം കടുവാക്കുളത്ത് ഇരട്ട സഹോദരങ്ങള് ആത്മഹത്യ ചെയ്യാനിടയാക്കിയത് സഹകരണ ബാങ്കിന്റെ ജപ്തി ഭീഷണിയാണെന്ന് വിഡി സതീശന് ആരോപിക്കുന്നു. ഇത്തവണ വിഡി സതീശന്റെ പ്രസംഗം വളരെ നിശബ്ദമായാണ് സഭാ അംഗങ്ങള് കേട്ടിരുന്നത്. കൊവിഡ് നിമിത്തം ദുരിതമനുനുഭവിക്കുന്നവര്ക്കൊപ്പം സര്ക്കാര് നില്ക്കാത്തതിന്റെ അവസാന ചിത്രമാണിതെന്നും അദ്ദേഹം ചൂണ്ടിക്കാട്ടി.
കൊവിഡ് കാലത്തു റവന്യു റിക്കവറിയിലെ ഭീഷണി വിലക്കിയിട്ടുണ്ടെങ്കിലും , അസമയത്തടക്കം ഫോണ് വിളിച്ചു ഭീഷണിപ്പെടുത്തിയ കോട്ടയം അര്ബന് സഹകരണ ബാങ്കിന്റെ മണിപ്പുഴ ശാഖയുടെ നടപടിയാണു ഇരട്ട സഹോദരങ്ങളായ നസീര്ഖാന്റെയും നിസാര്ഖാന്റെയും ജീവനെടുത്തതെന്ന് അടിയന്തര പ്രമേയ നോട്ടീസിന് അവതരണാനുമതി തേടിയ തിരുവഞ്ചൂര് രാധാകൃഷ്ണന് ആരോപിച്ചു. ജെ.സി.ബി ഓപ്പറേറ്റര്മാരായ ഇവര്ക്ക് ലോക്ഡൗണില് തൊഴില് നഷ്ടമായതിനെ തുടര്ന്നാണ് വായ്പ തിരിച്ചടയ്ക്കാന് കഴിയാതായത്.ബാങ്കില് നിന്നു ഭീഷണി ഉയര്ന്നപ്പോഴാണ് ഇരുവരും ആത്മഹത്യ ചെയ്തതെന്നു മാതാവ് പൊലീസിനു മൊഴി നല്കിയിട്ടുണ്ടെന്നും തിരുവഞ്ചൂര് പറയുന്നു. ആ ഉമ്മ ശിഷ്ടകാലം എങ്ങനെ ജീവിച്ചുതീര്ക്കുമെന്നാണ് വിഡി സതീശന് സഭയില് ചോദിച്ചത്.