ഇടുക്കിയില്‍ മഴ തുടരുന്നത് മൂലം ഇടുക്കി അണക്കെട്ടിലെ ജലനിരപ്പ് ക്രമാതീതമായി ഉയരുകയാണ്. ഒരടി കൂടി ഉയര്‍ന്നാല്‍ ബ്ലൂ അലര്‍ട്ട് പ്രഖ്യാപിക്കുമെന്നാണ് വിവരം. 2371.52 അടിയാണ് അണക്കെട്ടിലെ ഇപ്പോഴത്തെ ജലനിരപ്പ്. 2372 അടിയിലെത്തിയാല്‍ ആദ്യ ജാഗ്രതാ നിര്‍ദ്ദേശം പുറപ്പെടുവിക്കും. ഇടുക്കിയിലെ ജലനിരപ്പ് 2380.50 അടിയായാലാണ് റെഡ് അലര്‍ട്ട് പ്രഖ്യാപിക്കുക.
ഈ ലെവലില്‍ ജലനിരപ്പ് എത്തിയാല്‍ ജില്ലാ കളക്ടറുടെ അനുമതിയോടെ വെള്ളം തുറന്ന് വിടും. സംഭരണ ശേഷിയുടെ 65 ശതമാനം ജലം ഇപ്പോള്‍ ഡാമിലുണ്ട്. ജലനിരപ്പ് ഒരടി വര്‍ധിക്കാന്‍ ദിവസങ്ങള്‍ വേണ്ടിവരും.
ഇപ്പോഴത്തെ കണക്കനുസരിച്ച് വെള്ളം തുറന്നുവിടേണ്ട ആവശ്യം ഉണ്ടാവില്ലയെന്നാണ് കെഎസ്ഇബിയുടെ അഭിപ്രായം. മൂലമറ്റത്ത് വൈദ്യുതോല്‍പ്പാദനം പൂര്‍ണ്ണതോതിലാക്കി ജലനിരപ്പ് നിയന്ത്രിക്കാനുള്ള ശ്രമം കെഎസ്ഇബി നടത്തുന്നുണ്ട്. അതുകൊണ്ടുതന്നെ ജലനിരപ്പ് ഉയരാനുള്ള സാധ്യത കുറവാണെന്നും പറയുന്നുണ്ട്. സംഭരണ ശേഷിയുടെ 65 ശതമാനം വെള്ളമിപ്പോഴുണ്ട്. നിലവില്‍ പതിനഞ്ച് ദശലക്ഷം ക്യുബിക് മീറ്റര്‍ വെള്ളമാണ് ഒഴുകിയെത്തുന്നത്. അഞ്ചു ദിവസം മുമ്പ് ഇത് 41 ദശലക്ഷം ആയിരുന്നു. പതിനൊന്ന് ദശലക്ഷം ക്യുബിക് മീറ്റര്‍ വെള്ളം മൂലമറ്റം പവര്‍ഹൗസില്‍ വൈദ്യുതി ഉല്‍പ്പാദിപ്പിക്കാനെടുക്കുന്നുണ്ട്.
മൂലമറ്റത്ത് വൈദ്യുതോല്‍പ്പാദനം പൂര്‍ണതോതിലാക്കി അണക്കെട്ടിലെ ജലനിരപ്പ് നിയന്ത്രിക്കാനുള്ള ശ്രമമാണ് കെഎസ്ഇബി നടത്തുന്നത്. അതിനാല്‍ ജലനരിപ്പ് ഒരടി ഉയരാന്‍ ദിവസങ്ങള്‍ വേണ്ടി വന്നേക്കും. ജൂലൈ 31 ന് പുതിയ റൂള്‍ കര്‍വ് വരുന്നതോടെ ബ്ലൂ അലര്‍ട്ട് ലെവല്‍ 2375 ആയി ഉയരുമെന്നതു കെഎസ്ഇബിക്ക് ആശ്വാസം നല്‍കുന്നുണ്ട്.
അതേസമയം മുല്ലപ്പെരിയാന്‍ അണക്കെട്ടിലെ ജലനിരപ്പ് 136.50 അടിയില്‍ തുടരുകയാണ്.ജലനിരപ്പ് കുറയ്ക്കാന്‍ വേണ്ടി തമിഴ്‌നാട് കൂടുതല്‍ വെള്ളം കൊണ്ടുപോകുന്നുണ്ട്.ഇതിനായി വൈഗയില്‍ നിന്നും കൂടുതല്‍ ജലം മധുര ഭാഗത്തേക്ക് തുറന്നു വിടുന്നുണ്ട്.വൈഗ അണക്കെട്ടിലെ ജലനിരപ്പ് 68.4 അടിക്ക് മുകളിലാണ്.സെക്കന്റില്‍ 1867 ഘനയടി വെള്ളമാണ് തമിഴ്‌നാട് ഇറച്ചില്‍പാലം വഴി വൈഗ ഡാമിലേക്ക് കൊണ്ടുപോകുന്നത്. നേരത്തെ സെക്കന്റില്‍ 900 ഘനടി വെള്ളമാണ് കൊണ്ടുപോയിരുന്നത്. സെക്കന്റില്‍ 2821 ഘനയടി വെള്ളമാണ് ഡാമിലേക്ക് ഒഴുകിയെത്തുന്നത്.
