ഭർത്താവ് ദുർമന്ത്രവാദത്തിനായി നിർബന്ധിച്ചു പീഡിപ്പിക്കുന്നതായി സീരിയൽ താരം ദിവ്യ. തിരുവനന്തപുരം നേമം സ്വദേശിനിയായ സീരിയൽ നടി ദിവ്യ വെള്ളായണി സ്വദേശി ഭർത്താവ് അരുളിനും കുടുംബത്തിനും എതിരെയാണ് ആരോപണവുമായി രംഗത്ത് വന്നിരിക്കുന്നത്.
ദുർമന്ത്രവാദത്തിനായി തന്നെ നിരന്തരം പ്രേരിപ്പിക്കുന്നു. ആറു വയസ്സുകാരിയായ മകളെയും ഉപദ്രവിക്കുന്നു, നടി പറയുന്നു. ഭർത്താവിന്റെ ദോഷം മാറാനായി വിവാഹ മോചനം ആവശ്യപ്പെടുന്നു. സ്ത്രീധനം നൽകാത്തതിനാലാണ് അന്ധവിശ്വാസം മറയാക്കുന്ന ഈ പീഡനം തുടരുന്നത് – നടി ദിവ്യ പറഞ്ഞു.
‘ആറ് വർഷം മുൻപായിരുന്നു വിവാഹം. ഈ ആറ് വർഷക്കാലവും ദുർമന്ത്രവാദത്തിന്റേയും അനാചാരത്തിന്റേയും കാര്യം പറഞ്ഞ് ദിവസവും പ്രശ്‌നങ്ങളായിരുന്നു. ഒരുവിധത്തിലും ജീവിക്കാൻ പറ്റുന്നില്ല. എന്നെയും മകളേയും ഇതിനായി നിർബന്ധിക്കുന്നു. വഴങ്ങിയില്ലെങ്കിൽ ഉപദ്രവിക്കുന്നു.
പൂജ ചെയ്ത സാധനങ്ങൾ ഓരോന്ന് കഴിക്കാൻ തരുന്നു. മോളുടെ ദേഹത്തും ഓരോന്ന് പരീക്ഷിക്കാനും ഓരോ സ്ഥലത്ത് പൂജയ്ക്ക് കൊണ്ടുപോകാനും തുടങ്ങി. ഇതോടെ എന്റെ ഭർത്താവുമായി ഞാൻ വിട്ട് നിൽക്കുകയാണ്. അല്ലാതെ മറ്റു മാർഗങ്ങൾ ഇല്ല. ഭർത്താവിന്റെ വീട്ടുകാർക്ക് എന്നെയും മകളെയും എങ്ങനെയെങ്കിലും ഭർത്താവിൽ നിന്ന് വേർപ്പെടുത്തണമെന്നാണ് ആഗ്രഹം.’ നടി ദിവ്യ പറയുന്നു.
