സഞ്ജയ് ലീല ഭന്സാലി സംവിധാനം ചെയ്ത ‘രാംലീലയിലാണ് രണ്വീര് സിംഗ് – ദീപിക പദുകോണ് എന്നിവര് ആദ്യമായി സ്ക്രീനില് ഒന്നിക്കുന്നത്. ഒരു പ്രണയ കഥ പറയുന്ന ചിത്രമായിരുന്നു ടൈറ്റില് കഥാപാത്രങ്ങളായി ഇവര് എത്തിയ ഈ ചിത്രം. ഈ സിനിമയുടെ ചിത്രീകരണത്തിനിടെ രണ്വീറും ദീപികയും പ്രണയത്തിലാവു കയായിരുന്നു. തുടര്ന്ന് 2018ല് ഇവർ വിവാഹിതരായി.
എങ്ങനെ പ്രണയം തുടങ്ങിയതെന്നും ‘രാംലീല’യിലെ പ്രണയ രംഗങ്ങള് അവര്ക്ക് എന്ത് കൊണ്ട് സ്പെഷ്യല് ആണ് എന്നും ഇരുവരും അടുത്തിടെ കരണ് ജോഹറിന്റെ ‘കോഫീ വിത്ത് കരണ്’ പരിപാടിയില് തുറന്നു പറയുകയുണ്ടായി. സഞ്ജയ് ലീല ഭന്സാലിയുടെ വീട്ടില് വെച്ചായിരുന്നു ദീപികയെ ആദ്യമായി രണ്വീര് സിംഗ് കാണുന്നത്. കണ്ടപ്പോള് തന്നെ തനിക്ക് പ്രണയം തോന്നി എന്ന് വെളിപ്പെടുത്തിയ രണ്വീര് ‘രാംലീല’യിലെ പ്രണയ രംഗങ്ങള് ഒറിജിനല് ആണ് എന്നും പറഞ്ഞിരിക്കുന്നു.
‘അതിലെ ‘അംഗ് ലഗാ ദേരേ’ എന്ന ഗാനത്തില് ഒരു നീണ്ട ആസ്വദിക്കാവുന്ന ചുംബനമുണ്ട്. അതിന്റെ അവസാനം ഞങ്ങള് നില്ക്കുന്നതിനടുത്തെ ജനാലയുടെ കണ്ണാടിയില് ഒരു ഇഷ്ടിക വന്നു വീഴുന്നതും ജനാല പൊട്ടുന്നതുമായിരുന്നു ആ രംഗം. ഞങ്ങള് കൊണ്ട് പിടിച്ച പ്രണയത്തിലായിരുന്നു അപ്പോൾ. ഷോട്ട് തുടങ്ങി, ഞങ്ങളുടെ ചുംബനവും തുടങ്ങി. പക്ഷേ ഇഷ്ടിക വീണിട്ടും ഷോട്ട് കട്ടായിട്ടും ആ ചുംബനം മാത്രം നിര്ത്തിയില്ല. കാരണം ഞങ്ങള് അതൊന്നും അറിഞ്ഞില്ല, സ്വയം മറന്നു പോയി,’ രണ്വീര് സിംഗ് പറഞ്ഞു.