യുക്രെയ്നിലേക്ക് ക്ലസ്റ്റർ ബോംബുകൾ അയയ്ക്കാനൊരുങ്ങി അമേരിക്ക. റഷ്യയ്ക്കെതിരായ പ്രതിരോധത്തിനും പ്രത്യാക്രമണത്തിനും ക്ലസ്റ്റർ യുദ്ധോപകരണങ്ങൾ സഹായകമാകുമെന്നാണ് വിലയിരുത്തലിലാണ് ഈ നീക്കം. റഷ്യക്കെതിരായ പോരാട്ടത്തിൽ കൂടുതൽ ആയുധങ്ങൾ നൽകി സഹായിക്കണമെന്ന ആവശ്യം യുക്രെയ്ൻ പ്രസിഡന്റ് വോളോഡിമിർ സെലൻസ്കി നിരന്തരം ഉന്നയിച്ചിരുന്നു.
800 ദശലക്ഷം ഡോളറിന്റെ ആയുധപാക്കേജാണ് യുക്രെയ്നിനായി അമേരിക്ക പ്രഖ്യാപിച്ചത്. ഇതിൽ എത്രത്തോളം ക്ലസ്റ്റർ യുദ്ധോപകരണങ്ങൾ ഉണ്ടാകുമെന്ന് വ്യക്തമാക്കിയിട്ടില്ല. ആയിരക്കണക്കിന് ക്ലസ്റ്റർ പടക്കോപ്പുകൾ രാജ്യത്തിന്റെ കൈവശമുണ്ടെന്ന് അമേരിക്കൻ വക്താവ് കോളിൻ കാൾ അവകാശപ്പെട്ടു.
ക്ലസ്റ്റർ യുദ്ധോപകരണങ്ങൾ നൽകാൻ തീരുമാനമെടുക്കുന്നത് ബുദ്ധിമുട്ടേറിയ കാര്യമായിരുന്നെന്ന് യുഎസ് പ്രസിഡന്റ് ജോ ബൈഡൻ വ്യക്തമാക്കി. സഖ്യകക്ഷികളുമായി ഇക്കാര്യം ചർച്ച ചെയ്തതിന് ശേഷമാണ് തീരുമാനമെടുത്തത്. യുക്രെയ്‌ന് ചെറുത്തുനിൽപ്പിന് വേണ്ടിയാണ് അവ അയക്കുന്നതെന്നും ജോ ബൈഡൻ വ്യക്തമാക്കി. ലിത്വാനിയയിൽ നടക്കാൻ പോകുന്ന നാറ്റോ ഉച്ചകോടിയിൽ യുക്രെയ്‌ന് നൽകുന്ന ക്ലസ്റ്റർ ബോംബുകൾ സംബന്ധിച്ച് ബൈഡൻ ചോദ്യങ്ങൾ നേരിടേണ്ടി വരുമെന്ന് ഇതോടെ ഉറപ്പായി.
