മയക്കുമരുന്ന് ഇടപാട് നടത്തി ശിക്ഷിക്കപ്പെട്ട പ്രതികളിൽ ഇന്ത്യൻ വംശജയായ യുവതിയും. പ്രായപൂർത്തിയാകാത്തെ കുട്ടികളെ ഉപയോഗിച്ച് മയക്കുമരുന്ന് ഇടപാട് നടത്തിയതിനാണ് സറീന ദുഗ്ഗൽ എന്ന യുവതിയെ കോടതി ഏഴുവർഷം തടവിന് വിധിച്ചത്. യുവതിക്കൊപ്പം മറ്റ് ആറ് പേർക്ക് കൂടി ഏഴുവർഷം തടവ് വിധിച്ചു.ഏഴ് ആഴ്‌ചത്തെ വിചാരണയ്‌ക്കൊടുവിലാണ് സംഘത്തിനെ അഞ്ച് പ്രതികളും കുറ്റക്കാരനാണെന്നു കഴിഞ്ഞ മാസം ബോൺമൗത്ത് ക്രൗൺ കോടതി കണ്ടെത്തിയത്. ലണ്ടനിലും ബർമിംഗ്ഹാമിലും മയക്കുമരുന്ന് വിതരണം ചെയ്യുകയും ഇടപാടുകൾ നിയന്ത്രിക്കുകയും ചെയ്യുന്ന സംഘത്തിൽ സറീന ഉൾപ്പെട്ടിരുന്നതായി മെട്രോപൊളിറ്റൻ പോലീസ് വ്യക്തമാക്കി. യുവതിയെ ഏഴുവർഷത്തെ തടവിന് ശിക്ഷിച്ചതായി പോലീസ് അറിയിച്ചു.
കഴിഞ്ഞ വർഷം ജൂലൈയിൽ കൊക്കെയ്നും ഹെറോയിനുമായി പതിനാറ് വയസുള്ള ആൺകുട്ടി പിടിയിലായതോടെയാണ് മയക്കുമരുന്ന് ഇടപാട് നടത്തുന്ന സംഘത്തെക്കുറിച്ചുള്ള വിവരം പോലീസിന് ലഭിച്ചത്. കുട്ടിൽ നിന്ന് ലഭിച്ച വിവരങ്ങളുടെ അടിസ്ഥാനത്തിൽ വിശദമായ അന്വേഷണം പോലീസ് ആരംഭിച്ചിരുന്നു. കുട്ടിയിൽ നിന്നും ലഭിച്ച മൊബൈൽ ഫോണിലെ വിവരങ്ങൾ കേന്ദ്രീകരിച്ചായിരുന്നു അന്വേഷണം.
ബോർൺമൗത്തിൽ മയക്കുമരുന്ന് വിതരണം ചെയ്യുന്നതിനും നിയമവിരുദ്ധമായ വസ്തുക്കൾ കടത്തുന്നതിനും സംഘം കുട്ടികളെ ഉപയോഗിക്കുന്നതായി കണ്ടെത്തിയതോടെ അന്വേഷണം പ്രത്യേക സംഘത്തിന് കൈമാറി. നിരീക്ഷണത്തിലുള്ളവരുടെ മൊബൈൽ ഫോൺ വിവരങ്ങളും സംഭാഷണങ്ങളും ശേഖരിച്ച അന്വേഷണ സംഘം സിസിടിവി ദൃശ്യങ്ങൾ പരിശോധിച്ച് പ്രതികളെ തിരിച്ചറിഞ്ഞു. ബോൺമൗത്ത് കേന്ദ്രീകരിച്ച് സറീന ദുഗ്ഗൽ ഉൾപ്പെടെയുള്ള സംഘം മയക്കുമരുന്ന് ഇടപാടുകൾ നടത്തുന്നതായി കണ്ടെത്തി. പിടികൂടിയ ശേഷം വിട്ടയച്ച പതിനാറുകാരൻ സംഘത്തിനായി പ്രവർത്തിച്ചിരുന്നതായുമുള്ള തെളിവുകളും ലഭ്യമായി.
ലണ്ടനിൽ നിന്ന് കാണാതായ രണ്ട് കുട്ടികളെ സംഘം ഉപയോഗിച്ചിരുന്നതായി കണ്ടെത്തി. നഗരത്തിൽ മയക്കുമരുന്നുകൾ വിതരണം ചെയ്യുന്ന സംഘത്തെ പിടികൂടിയതായി ഡിറ്റക്റ്റീവ് കോൺസ്റ്റബിൾ ജാക്ക് ജെഫ്രീസ് പറഞ്ഞു. പ്രതികൾ പിടിയിലായതോടെ നഗരത്തിലേക്കുള്ള ലഹരിമരുന്നുകളുടെ ഒഴുക്ക് നിൽക്കും. പ്രദേശവാസികളെയാകെ ബാധിച്ച വിഷയമായിരുന്നു ഇതെന്ന് അദ്ദേഹം കൂട്ടിച്ചേർത്തു
