അമേരിക്കന്‍ ആസ്ഥാനമായുള്ള സ്വകാര്യ ഇന്റലിജന്‍സ് സ്ഥാപനമായ റെക്കോര്‍ഡ‌ഡ് ഫ്യൂച്ചറിന്റെ റിപ്പോര്‍ട്ടിൽ ഞെട്ടിപ്പിക്കുന്ന പുതിയ വെളിപ്പെടുത്തലുകൾ.ലഡാക്കിലേതുള്‍പ്പടെ ഏഴ് ഇന്ത്യന്‍ സ്റ്റേറ്റ് ലോഡ് ഡെസ്പാച്ച്‌ സെന്ററുകളില്‍ റെഡ് എക്കോ എന്ന ഹാക്കര്‍മാര്‍ നുഴഞ്ഞുകയറ്റം നടത്തുവാന്‍ ശ്രമിക്കുന്നുവെന്നാണ് റിപ്പോര്‍ട്ടില്‍ പറയുന്നത്. ഗ്രിഡ് നിയന്ത്രണത്തിന്റെയും വൈദ്യുത വിതരണത്തിന്റെയും തത്സമയ പ്രവര്‍ത്തനങ്ങള്‍ നിയന്ത്രിക്കുകയാണ് ഡെസ്പാച്ച്‌ സെന്ററുകളുടെ ദൗത്യം. ഇവയില്‍ ആക്രമണം നടത്തിയാല്‍ വൈദ്യുത വിതരണം ആകെ താളംതെറ്റും. ഒപ്പം അപകടങ്ങള്‍ക്കും വഴിവയ്ക്കും. ഇതാണ് ഹാക്കര്‍മാരുടെ ലക്ഷ്യവും. ചൈനയിലെ കമ്യൂണിസ്റ്റ് സര്‍ക്കാരിന്റെ എല്ലാ ആശീര്‍വാദത്തോടെയുമാണ് ഹാക്കര്‍മാര്‍ പ്രവര്‍ത്തിക്കുന്നതെന്നും റിപ്പോര്‍ട്ടില്‍ വ്യക്തമാക്കുന്നു. ചൈനയുമായി ബന്ധമുള്ള ചെറു ഹാക്കര്‍ സംഘങ്ങള്‍ ഇന്ത്യയുടെ രഹസ്യാന്വേഷണ വിവരങ്ങള്‍ ശേഖരിക്കാന്‍ ശ്രമം നടത്തുന്നതായും റിപ്പോര്‍ട്ടില്‍ പറയുന്നുണ്ട്.
നേരത്തേയും ഇന്ത്യയ്ക്കുനേരെ ചൈനയുടെ സൈബര്‍ ആക്രമണമുണ്ടായിട്ടുണ്ട്.2019ല്‍ ഇന്ത്യയടക്കമുള്ള ആറ് രാജ്യങ്ങളിലെ സര്‍ക്കാര്‍ സംഘടനങ്ങളുടെ നെറ്റ്‌വര്‍ക്കുകള്‍ ആക്രമിച്ച്‌ രഹസ്യവിവരങ്ങള്‍ മോഷ്ടിച്ചെന്ന് ലണ്ടന്‍ ആസ്ഥാനമായ ആഗോള സുരക്ഷാ പരിഹാര ദാതാക്കളായ പോസിറ്റീവ് ടെക്നോളജീസിലെ വിദഗ്ധർ വ്യക്തമാക്കിയിരുന്നു. റിമോട്ട് കോഡ് എക്സിക്യൂഷന്‍ വള്‍നറബിലിറ്റി ഉപയോഗപ്പെടുത്തിയോ മോഷ്ടിച്ച ക്രെഡന്‍ഷ്യലുകള്‍ ഉപയോഗിച്ചോ ആയിരിക്കും ഹാക്കര്‍മാര്‍ വിവരങ്ങള്‍ ചോര്‍ത്തിയതെന്ന് റിപ്പോര്‍ട്ടില്‍ പറഞ്ഞിരുന്നത്.
