ചൈനയില്‍ കൊവിഡ് കേസുകള്‍ വീണ്ടും കുത്തനെ ഉയരുന്നതിനിടെ വീണ്ടും ആശങ്ക. ഒമിക്രോണ്‍ വകഭേദത്തിന്റെ പുതിയ ഉപവിഭാഗമാണ് കണ്ടെത്തിയിരിക്കുന്നത്. കഴിഞ്ഞ ദിവസം സ്ഥിരീകരിച്ച 13,000 പുതിയ കൊവിഡ് കേസുകളില്‍ ഒരു കേസാണ് പുതിയ വിഭാഗത്തില്‍പ്പെടുന്നത്. ഒമിക്രോണ്‍ വകഭേദത്തിന്റെ ബി.എ 1.1 ഉപവകഭേദത്തില്‍ നിന്നാണ് പുതിയ ഉപവിഭാഗം രൂപപ്പെട്ടിരിക്കുന്നത്.
നിലവില്‍ ലോക്ക്ഡൗണില്‍ തുടരുന്ന ഷാങ്ങ്ഹായി നഗരത്തില്‍ നിന്ന് 70 കിലോമീറ്റര്‍ അകലെ സ്ഥിതിചെയ്യുന്ന പ്രദേശത്തുള്ള ഒരാളിലാണ് പുതിയ വൈറസ് കണ്ടെത്തിയത്. ഇയാള്‍ക്ക് നേരിയ രോഗലക്ഷണങ്ങള്‍ മാത്രമാണുള്ളത്. അതേ സമയം, ചൈനയില്‍ നിലവില്‍ പടരുന്ന കൊറോണ വൈറസ് വകഭേദങ്ങളുടെ സ്വഭാവ സവിശേഷതകളുമായി ഇതിന് സാമ്യമില്ലെന്നാണ് റിപ്പോര്‍ട്ട്.
ഉപവകഭേദത്തെ സംബന്ധിച്ച പഠനങ്ങള്‍ ആരംഭിച്ചതായി അധികൃതര്‍ പറഞ്ഞു.അതേ സമയം, ചൈനീസ് സൈന്യത്തിലെ ഡോക്ടര്‍മാര്‍ അടക്കം 2,000 ആരോഗ്യ പ്രവര്‍ത്തകര്‍ ഇന്നലെ ഷാങ്ങ്ഹായി നഗരത്തിലെത്തി. രാജ്യത്തിന്റെ വിവിധ ഭാഗങ്ങളില്‍ നിന്ന് 10,000ത്തിലേറെ ആരോഗ്യ പ്രവര്‍ത്തകരെ ചൈനീസ് ഭരണകൂടം ഷാങ്ങ്ഹായിയയില്‍ വിന്യസിച്ചിട്ടുണ്ട്. 36 മണിക്കൂറിനുള്ളില്‍ നഗരത്തിലെ 2.5 കോടി ജനങ്ങളെ കൊവിഡ് പരിശോധനയ്ക്ക് വിധേയമാക്കുന്നതിന്റെ ഭാഗമായാണ് വന്‍ സന്നാഹത്തോടെ ആരോഗ്യ പ്രവര്‍ത്തകര്‍ ഷാങ്ങ്ഹായിയില്‍ എത്തിയിരിക്കുന്നത്.
