മുതിര്‍ന്ന മാധ്യമ പ്രവര്‍ത്തകന്‍ ഇ.സോമനാഥിന്റെ ദുരൂഹ മരണവുമായി ബന്ധപ്പെട്ടു ദേശാഭിമാനി തിരുവനന്തപുരം യൂണിറ്റിലുണ്ടായ സംഘര്‍ഷം സിപിഎമ്മിന് തലവേദനയാകുന്നു. ദേശാഭിമാനിയിലെ മുതിര്‍ന്ന മാധ്യമപ്രവര്‍ത്തകരെ നിലയ്ക്ക് നിര്‍ത്താന്‍ ഇറങ്ങിയതാകട്ടെ ചീഫ് എഡിറ്റര്‍ കൂടിയായ കോടിയേരി ബാലകൃഷ്ണനും. സംഭവത്തില്‍ കോടിയേരി ബാലകൃഷ്ണന്‍ വിശദീകരണം തേടി. സോമനാഥിന്റെ മരണത്തെ ചൊല്ലി പ്രസ് ക്ലബില്‍ തല്ലുണ്ടാക്കി കസേരകള്‍ തല്ലിത്തകര്‍ത്ത സംഘം തുടര്‍ന്നു ദേശാഭിമാനി ഓഫിസിലെത്തി അസഭ്യവര്‍ഷവും നടത്തിയാണു മടങ്ങിയത്. ദേശാഭിമാനി ബ്യൂറോ ചീഫ് ശ്രീകണ്ഠനെതിരെയായിരുന്നു സംഘത്തിന്റെ തെറിവിളി. കോവിഡ് പോസിറ്റീവ് ആയ ശ്രീകണ്ഠന്‍ അവധിയിലായിരുന്നു.
കെയുഡബ്ല്യൂജെ ജില്ലാ സെക്രട്ടറി അഭിജിത്, മാതൃഭൂമി ചാനലിലെ രതീഷ് അനിരുദ്ധന്‍, ന്യൂസ് 18ലെ അരുണ്‍ എന്നിവരാണ് പ്രസ് ക്ലബിലും ദേശാഭിമാനി ഓഫിസിലും കടന്നു കയറി അതിക്രമം കാട്ടിയത്. ദേശാഭിമാനിയില്‍ കടന്നു കയറി ശ്രീകണ്ഠനെ തെറിവിളിച്ച സംഘത്തെ പിടികൂടി പൊലീസില്‍ ഏല്‍പിക്കാന്‍ സെക്യൂരിട്ടി ജീവനക്കാര്‍ ഒരുങ്ങിയെങ്കിലും ദേശാഭിമാനിയിലെ തന്നെ സുരേഷ് വെള്ളിമംഗലവും മനോഹരന്‍ മോറായിയും സെക്യൂരിട്ടിക്കാരെ തടയുകയും സംഘത്തെ സുരക്ഷിതമായി ഗേറ്റിനു പുറത്തെത്തിക്കുകയും ചെയ്തു. കെയുഡബ്ല്യൂജെ ജില്ലാ പ്രസിഡന്റായ സുരേഷ് വെള്ളിമംഗലത്തിന്റെയും സംസ്ഥാന സമിതി അംഗമായ മനോഹരന്‍ മോറായിയുടെയും ഒത്താശയോടെയായിരുന്നു അക്രമി സംഘത്തിന്റെ തെറിവിളി അരങ്ങേറിയതെന്നാണ് ദേശാഭിമാനിയിലെ സഹപ്രവര്‍ത്തകരുടെ ആക്ഷേപം.
പ്രസ് ക്ലബ് തിരഞ്ഞെടുപ്പില്‍ സുരേഷ് വെള്ളിമംഗലത്തെ തോല്‍പിക്കാന്‍ ശ്രീകണ്ഠന്‍ എതിര്‍വിഭാഗത്തെ പിന്തുണച്ചതിന്റെ വൈരാഗ്യമാണെന്നും ആരോപണമുണ്ട്. സോമനാഥിന്റെ ദുരൂഹ മരണത്തിലേക്ക് ശ്രീകണ്ഠന്റെ പേരു കൂടി വലിച്ചിടാനാണ് വെള്ളിമംഗലത്തിന്റെ ശ്രമം. തിരഞ്ഞെടുപ്പു തര്‍ക്കത്തില്‍ പ്രസ് ക്ലബില്‍ വച്ചു ശ്രീജന്‍ എന്ന മാധ്യമ പ്രവര്‍ത്തകര്‍ സോമനാഥിനെ കയ്യേറ്റം ചെയ്തതിനു പിന്നില്‍ ശ്രീകണ്ഠനാണെന്നാണ് ആക്ഷേപം.
പ്രസ് ക്ലബിലും ദേശാഭിമാനിയിലും അതിക്രമം കാണിച്ച സംഘത്തെ ന്യായീകരിച്ചു ദേശാഭിമാനിയിലെ രഘു മട്ടുമ്മല്‍ ഫെയ്‌സ്ബുക്ക് പോസ്റ്റ് ഇട്ടതു സഹപ്രവര്‍ത്തകരെ ഞെട്ടിച്ചിരുന്നു.സോമനാഥിനെ പ്രസ് ക്ലബില്‍ കയ്യേറ്റം ചെയ്തതിലുള്ള രോഷപ്രകടനമായിരുന്നു സംഘം നടത്തിയതെന്നാണു രഘു ന്യായീകരിച്ചത്. കോവിഡ് പോസിറ്റീവായ ഒരാളും തല്‍സമയം പ്രസ് ക്ലബില്‍ മദ്യപിച്ച് ഇരുന്നതായി ശ്രീകണ്ഠനെതിരെയുള്ള ഒളിയമ്പും രഘുവിന്റെ പോസ്റ്റിലുണ്ടായിരുന്നു. പ്രസ് ക്ലബുമായി ബന്ധപ്പെട്ടു ദേശാഭിമാനിയിലെ മുതിര്‍ന്ന മാധ്യമ പ്രവര്‍ത്തകര്‍ നടത്തുന്ന ഒളിപ്പോരില്‍ ചീഫ് എഡിറ്റര്‍ കോടിയേരി ബാലകൃഷ്ണന്‍ അസന്തുഷ്ടനാണെന്നാണു സൂചനകള്‍.
മുന്‍ വൈരാഗ്യവും തര്‍ക്കങ്ങളും കൂട്ടിക്കലര്‍ത്തിയാകാം ഇ സോമനാഥിന്റെത് ദുരൂഹ മരണമെന്നുള്ള ചര്‍ച്ചകള്‍ നടക്കുന്നതും. 58 കാരനായ ഇ. സോമനാഥ് മസ്തിഷ്‌കാഘാതത്തെ തുടര്‍ന്ന് ചികിത്സയില്‍ കഴിയവെയാണ് മരണപ്പെടുന്നത്. നിയമസഭാ റിപ്പോര്‍ട്ടിങ്ങില്‍ മുപ്പത് വര്‍ഷത്തോളം പ്രവര്‍ത്തിച്ച ആളാണ് ഇ സോമനാഥ്. ഈ നേട്ടത്തിന് കഴിഞ്ഞ ഓഗസ്റ്റില്‍ നിയമസഭയിലെ മീഡിയാ റൂമില്‍ അദ്ദേഹത്തെ ആദരിച്ചിരുന്നു. 34 വര്‍ഷത്തോളം മലയാള മനോരമയില്‍ സേവനം അനുഷ്ഠിച്ച വ്യക്തികൂടിയാണ്. കോട്ടയം, ഇടുക്കി, കണ്ണൂര്‍, കൊല്ലം, ഡല്‍ഹി, തിരുവനന്തപുരം എന്നിവിടങ്ങളില്‍ അദ്ദേഹം പ്രവര്‍ത്തിച്ചിട്ടുണ്ട്.
