സിനിമാ-സീരിയല് രംഗത്തെ ഒന്നടങ്കം ഞെട്ടിപ്പിക്കുന്ന വാര്ത്തയാണ് ഇപ്പോള് പുറത്തുവന്നിരിക്കുന്നത്. സിനിമാ സീരിയല് നടന് രമേശ് വലിയശാല ആത്മഹത്യ ചെയ്തു. ഇന്ന് പുലര്ച്ചെയോടെയായിരുന്നു മരണം. നടന് രമേശ് വലിയശാലയെ ദുരൂഹ സാഹചര്യത്തില് തൂങ്ങി മരിച്ച നിലയില് കാണപ്പെടുകയായിരുന്നു. മൃതദേഹം ഇപ്പോള് പി ആര് എസ് ഹോസ്പിറ്റലില് സൂക്ഷിച്ചിരിക്കുകയാണ്. നാടകരംഗത്തിലൂടെ കലാരംഗത്ത് എത്തിയ രമേശ് വലിയശാല മലയാള സീരിയില് രംഗത്തെ ഏറ്റവും തിരക്കുള്ള നടന്മാരില് ഒരാളായിരുന്നു. 22 വര്ഷത്തോളമായി സീരിയല് രംഗത്ത് ഉള്ള നടന് കൂടിയായിരുന്നു രമേശ് വലിയശാല.
ഗവണ്മെന്റ് മോഡല് സ്കൂളിലാണ് വിദ്യാഭ്യാസം പൂര്ത്തിയാക്കിയത്.തിരുവനന്തപുരം ആര്ട്സ് കോളേജില് പഠിക്കവെയാണ് നാടകത്തില് സജീവമായത്. സംവിധായകന് ഡോ. ജനാര്ദനന് അടക്കമുള്ളവരുടെ ഒപ്പമായിരുന്നു നാടകപ്രവര്ത്തനം. കോളേജ് പഠനത്തിന് ശേഷം മിനിസ്ക്രീനിന്റെയും ഭാഗമാകുകയായിരുന്നു. പിന്നീട് ഒട്ടനവധി സീരിയസ് കഥാപാത്രങ്ങള് മിനിസ്ക്രീനിലും ബിഗ് സ്ക്രീനിലും അഭിനയിച്ചു.
പ്രൊഡക്ഷന് കണ്ട്രോളര് ബാദുഷയാണ് മരണ വിവരം പുറത്ത് വിട്ടത്. പ്രശ്നങ്ങള് പലതും ഉണ്ടാകും. പക്ഷെ ജീവിതത്തില് നിന്നും ഒളിച്ച് ഓടിയിട്ട് എന്തു കാര്യം.. പ്രിയ സുഹൃത്ത് രമേഷിന് ആദരാഞ്ജലികള്- എന്നാണ് സോഷ്യല് മീഡിയയില് പങ്കുവെച്ച കുറിപ്പില് ബാദുഷ എഴുതിയിരിക്കുന്നത്.
കൊവിഡ് പ്രതിസന്ധിയാണോ മരണകാരണമെന്ന് വ്യക്തമല്ല. കൊവിഡ് നിയന്ത്രണങ്ങളില് സീരിയല് രംഗത്തെ നിരവധി താരങ്ങള് കടുത്ത പ്രതിസന്ധി നേരിടുന്നുണ്ട്.സീരിയല് ഷൂട്ടിങ് സജീവമാകാന് കാലതാമസം എടുത്തിരുന്നു. പലര്ക്കും അവസരങ്ങളും നഷ്ടമായിരുന്നു. സാമ്പത്തികമാണോ ആത്മഹത്യയ്ക്ക് കാരണമെന്ന സംശയം നിഴലിക്കുന്നുണ്ട്.