ജനങ്ങളുടെ കണ്ണീരൊപ്പുന്ന പോലീസുകാരാണ് സംസ്ഥാനത്തുള്ളതെന്ന് കഴിഞ്ഞ ദിവസം മുഖ്യമന്ത്രി നിയമസഭയില്‍ ഘോരഘോരമായി പ്രസംഗിച്ചു. ഇതാണോ മുഖ്യമന്ത്രീ..നിങ്ങളുെട കണ്ണീരൊപ്പുന്ന പോലീസ്… പപ്പടം വില്‍ക്കാനിറങ്ങിയ വയോധികന് ഫൈന്‍ ഇട്ടത് 10,000 രൂപയാണ്. മോട്ടോര്‍ വാഹന വകുപ്പിന്റേതാണ് ഈ ക്രൂരത. പപ്പട കച്ചവടത്തിനായി മകന്റെ സ്‌കൂട്ടറില്‍ പോയ പാലക്കാട് പാറ സ്വദേശി മണിക്കാണ് ഫൈന്‍ ലഭിച്ചത്. സ്‌കൂട്ടര്‍ വിറ്റാല്‍ പോലും ഇത്ര പണം ലഭിക്കില്ലെന്ന് മണി പറയുന്നു.
ചന്ദ്രനഗറില്‍ വെച്ച് ആര്‍.ടി.ഒ എന്‍ഫോഴ്‌സ്‌മെന്റ് വാഹനം തടയുകയായിരുന്നു. 500 രൂപ പിഴയടക്കാന്‍ ആവശ്യപ്പെട്ടു. 300 രൂപ മാത്രമെ ആ സമയം മണിയുടെ കൈവശം ഉണ്ടായിരുന്നുള്ളു. പണം കോടതിയില്‍ അടക്കാന്‍ നോട്ടീസ് വരുമെന്ന് പറഞ്ഞാണ് മണിയെ വിട്ടയച്ചത്. പതിനായിരം രൂപ പിഴയടക്കാനാണ് നോട്ടീസ്.മറ്റുള്ളവര്‍ നിര്‍മ്മിക്കുന്ന പപ്പടം വാങ്ങി പാക്കറ്റിലാക്കി വിറ്റു അതില്‍ നിന്നും ലഭിക്കുന്ന ലാഭം കൊണ്ടാണ് മണി ജീവിക്കുന്നത്. ലൈസന്‍സ് ഇല്ലാത്തതിനാല്‍ സാധാരണ സ്‌കൂട്ടര്‍ ഓടിക്കാറില്ലെന്നും ബസ് ലഭിക്കാത്തതിനാല്‍ പപ്പട വില്‍പനക്കായി സ്‌കൂട്ടര്‍ എടുക്കുകയായിരുന്നെന്നും മണി പറയുന്നു.
നോട്ടീസ് ലഭിച്ചപ്പോഴാണ് മണി ശരിക്കും ഞെട്ടിയത്. പതിനായിരം രൂപ പിഴയടക്കാനാണ് നോട്ടീസ്. 10000 രൂപ പോലും വിലയില്ലാത്ത വാഹനത്തിനാണ് ഇത്ര വലിയ തുക മോട്ടോര്‍ വാഹന വകുപ്പ് എന്‍ഫോഴ്‌സ്‌മെന്റ് പിഴ ചുമത്തിയത്.ചോര്‍ന്നൊലിക്കുന്ന വീട് മേയാന്‍ പോലും പണമില്ലാതെ പ്രയാസപെടുമ്പോള്‍ ഇത്ര വലിയ തുക പിഴയായി എങ്ങനെ അടക്കുമെന്നാണ് മണിയുടെ ചോദ്യം. 5000 രൂപ ലൈസന്‍സില്ലാത്തതിനും 5000 രൂപ വാഹന ഉടമയായ മണിയുടെ മകനുമാണ് പിഴയെന്നും നിയമപരമായ നടപടികള്‍ മാത്രമാണ് സ്വീകരിച്ചതെന്നാണ് മോട്ടോര്‍ വാഹന വകുപ്പ് എന്‍ഫോഴ്‌സ്‌മെന്റ് ഉദ്യോഗസ്ഥര്‍ അറിയിച്ചു.
പോലീസിനെതിരെ ഉയരുന്ന ആരോപണങ്ങളോട് കഴിഞ്ഞ ദിവസം മുഖ്യമന്ത്രി നിയമസഭയില്‍ പറഞ്ഞത് വലിയ ചര്‍ച്ചയായിരുന്നു. പോലീസ് അപരാധമൊന്നും ചെയ്യുന്നില്ലെന്നാണ് മുഖ്യമന്ത്രി പറഞ്ഞത്. പോലീസ് ജനങ്ങള്‍ക്ക് എതിരാണെന്ന പ്രചാരണം തെറ്റാണെന്നും പൊലീസ് നാടിനെതിരായ സേനയെന്ന് വരുത്തി തീര്‍ക്കാനാണ് ശ്രമമെന്നും മുഖ്യമന്ത്രി പറയുകയുണ്ടായി. പൊലീസ് ജനകീയ സേന എന്ന നിലയിലാണ് പ്രവര്‍ത്തിക്കുന്നത്. ദുരന്തങ്ങളില്‍ ജനങ്ങളോട് ചേര്‍ന്നു നിന്ന് പ്രവര്‍ത്തിച്ചതാണ് പൊലീസ്. അതാണ് നമ്മുടെ നാട്ടിലെ അനുഭവം. മഹാ പ്രളയത്തില്‍ അടക്കം അത് കണ്ടതാണ്. മഹാമാരി കാലത്തും പൊലീസ് പ്രവര്‍ത്തനം മാതൃകാപരമായിരുന്നു. പിഴ ചുമത്തുന്നത് മഹാ അപരാധം എന്ന മട്ടില്‍ കാണരുതെന്നും മുഖ്യമന്ത്രി പറഞ്ഞിരുന്നു. നമ്പര്‍ പ്ലേറ്റില്ലാതെ പോലീസ് ജീപ്പിനെ ഒരു യുവാവ് തടഞ്ഞ സംഭവവും കഴിഞ്ഞ ദിവസം വന്‍ വാര്‍ത്തയായിരുന്നു. നിയമലംഘനം പോലീസിന് നടത്താം എന്നുള്ള ചോദ്യമാണ് വ്യാപകമായി ഉയര്‍ന്നിരുന്നത്.
You must be logged in to post a comment Login