കോവിഡ് നിരക്ക് ദിനം പ്രതി കൂടുന്നതനനുസരിച്ച് സംസ്ഥാനത്ത് നിയന്ത്രണങ്ങളും കര്ശനമാക്കുകയാണ്. കടകളിലും മറ്റും പോകണമെങ്കില് ആര്ടിപിസിആറോ അല്ലെങ്കില് വാക്സിന് എടുത്ത സര്ട്ടിഫിക്കറ്റോ വേണം എന്നായിരുന്നു കഴിഞ്ഞ ദിവസം നിയമസഭയില് ആരോഗ്യമന്ത്രി വീണ ജോര്ജ് പറഞ്ഞത്. നിരവധി വിമര്ശനങ്ങളായിരുന്നു സര്ക്കാറിന്റെ ഈ തീരുമാനത്തിനെതിരെ വന്നത്.
അതേസമയം മദ്യം വാങ്ങന് എത്തുന്നവര്ക്ക് യാതൊരുവിധ നിയന്ത്രണങ്ങളും സര്ക്കാര് ഏര്പ്പെടുത്തിയിരുന്നില്ല എചിനെതിരെ ഇന്നലെ ഹൈക്കോടതി രൂക്ഷ വിമര്ശനം ഉന്നയിച്ചിരുന്നു. ഇതോടെയാണ് ഈ വിഷയത്തില് പുതിയ ഉത്തരവുമായി സര്ക്കാര് എത്തിയിരിക്കുന്നത്.
സംസ്ഥാനത്തെ മദ്യശാലകളില്നിന്ന് മദ്യം വാങ്ങാനായി സര്ക്കാര് ഇറക്കിയ പുതിയ മാര്ഗനിര്ദേശം ഇങ്ങനെയാണ്. ഒരു ഡോസ് വാക്സിനെടുത്തതിന്റെ രേഖയോ ആര് ടി പി സി ആര് സെര്ടിഫികറ്റോ ഉള്ളവര്ക്കു മാത്രമേ മദ്യം വാങ്ങാനാകൂ. ഇന്ന് മുതല് ബിവറേജ് കോര്പറേഷന്റെ ഔട് ലെറ്റുകളിലടക്കം ഈ നിബന്ധന നടപ്പാക്കിത്തുടങ്ങി.
എല്ലാ ഔട് ലെറ്റുകള്ക്കും മുന്നില് ഇതുസംബന്ധിച്ച നോടീസ് പതിക്കാനും ബിവറേജ് കോര്പറേഷന് നിര്ദേശം നല്കി. മാനദണ്ഡം പാലിക്കുന്നുണ്ടെന്ന് ഉറപ്പാക്കാന് മദ്യശാലകള്ക്കു മുന്നില് കൂടുതല് പൊലീസ് സാന്നിധ്യവും ഉണ്ടാകും. കടകള്ക്കുള്ള മാനദണ്ഡം മദ്യശാലകള്ക്കും ബാധകമാക്കണമെന്ന് കഴിഞ്ഞ ദിവസം ഹൈകോടതി നിര്ദേശിച്ചിരുന്നു. ഈ സാഹചര്യത്തിലാണ് നടപടി.
രണ്ട് ഡോസ് വാക്സിന് സ്വീകരിച്ചവര്, രണ്ടാഴ്ചയ്ക്കു മുന്പ് ഒരു ഡോസെങ്കിലും എടുത്തവര്, 72 മണിക്കൂറിനുള്ളില് നടത്തിയ ആര് ടി പി സി ആര് പരിശോധനയുടെ നെഗറ്റീവ് സെര്ടിഫികറ്റ് ഉള്ളവര്, ഒരു മാസം മുന്പ് കോവിഡ് വന്നുപോയതിന്റെ സെര്ടിഫികറ്റ് ഉള്ളവര്- എന്നിങ്ങനെയാണ് ബെവ്കോ നിയന്ത്രണം വിശദമാക്കുന്നത്. ഇതു പാലിക്കുന്നവര്ക്കു മാത്രമേ മദ്യശാലകളില് പ്രവേശനം അനുവദിക്കൂ.