സംസ്ഥാനത്ത് പോലീസിന് ഭ്രാന്ത് പിടിച്ചെന്ന് സഭയില് കിടിലന് പ്രസംഗം നടത്തി എന് ഷംസുദ്ദീന് എംഎല്എ. എല്ലായിടത്തും പൊലീസ് അഴിഞ്ഞാടുകയാണ്. സമചിത്തതയോടെ പെരുമാറുന്ന ജനകീയ പൊലീസാണെന്നു പറഞ്ഞ് പൊലീസ് നടപടിയെ മുഖ്യമന്ത്രി പൂര്ണമായും ന്യായീകരിച്ചു. അട്ടപ്പാടിയില് ആദിവാസി ഊരു മൂപ്പനും മകനുമെതിരേയുണ്ടായ പൊലീസ് നടപടി ഉദാഹരണമായി പറഞ്ഞാണ് സംസ്ഥാനത്തെ പൊലീസ് അതിക്രമങ്ങള്ക്കെതിരേ പ്രതിപക്ഷം ആഞ്ഞടിച്ചത്.
ബാര്ബര് ഷോപ്പില് മുടി വെട്ടാന് പോയവര്ക്കും പുല്ലരിയാന് പോയവര്ക്കും കല്യാണത്തിന് പോയ നവ വരനും എടിഎമ്മില് പോയവര്ക്കും മത്സ്യക്കച്ചവടക്കാര്ക്കും പൊലീസ് 2000 രൂപ പിഴ അടപ്പിക്കുകയാണ്. അട്ടപ്പാടിയില് പൊലീസിന്റെ നരനായാട്ട,് ദ്യശ്യങ്ങളില് വ്യക്തമാണെന്ന് എന്.ഷംസുദ്ദീന് പറയുന്നു. പൊലീസിനെ കണ്ട് ഭയന്ന് കരഞ്ഞ സ്ത്രീകളെ പൊലീസ് മര്ദ്ദിച്ചു.കുട്ടികളുടെ കരണത്തടിച്ചു. ഒരു കുട്ടിയുടെ തുണി ഉരിഞ്ഞ് എടുത്തെന്നും എന് ഷംസുദീന് തുറന്നടിച്ചു.
ഭീകരവാദികളെ പോലെയാണ് മുരുകനെയും അച്ഛനെയും അറസ്റ്റു ചെയ്ത് കൊണ്ടു പോയതെന്നും അര്ജുന് ആയങ്കിയെ പിടിക്കാനും മുട്ടില് മരം മുറി ബ്രദേഴ്സിനെ അറസ്റ്റു ചെയ്യാനും കാട്ടാത്ത ആര്ജവവമാണ് അട്ടപ്പാടിയില് പൊലീസ് കാണിച്ചതെന്നും ഷംസുദ്ദീന് പറഞ്ഞു. മരുമകനുമായി പ്രാദേശിക സിപിഎം നേതാക്കള്ക്ക് പ്രശ്നം ഉണ്ട്, അതിന്റെ പ്രതികാരം തീര്ക്കാനാണ് വന് പൊലീസ് സന്നാഹം അതിരാവിലെ ഊരിലെ കുടിലുകളില് അതിക്രമിച്ചു കയറിയത്. അട്ടപ്പാടിയിലെ ചരിത്രത്തില് ആദ്യമായാണ് നേരം പുലരും മുന്പ് ഇത്തരത്തിലൊരു പൊലീസ് അക്രമം. അട്ടപ്പാടിയില് നടന്നത് നരനായാട്ടാണ്. ആദിവാസി സമൂഹം വലിയ ഭീതിയിലാണെന്നും ഷംസുദ്ധീന് പറയുന്നു.