വ്ളോഗര്മാരായ ഇ-ബുള് ജെറ്റ് സഹോദരന്മാരുടെ അറസ്റ്റും അതിനെചുറ്റിപറ്റിയുള്ള പ്രശ്നങ്ങളുമാണ് ഇപ്പോള് സോഷ്യല് മീഡിയ നിറയെ. സംഭവത്തില് ഇ ബുള് ജെറ്റ് സഹോദരന്മാരെ അനുകൂലിച്ചും പ്രതികൂലിച്ചും നിരവധി പേരാണ് രംഗത്തെത്തുന്നത്. ട്രോളുകളും ഇക്കൂട്ടത്തിലുണ്ട്. പിന്നാലെ എംഎല്എ മുകേഷിന്റെ വകയും ട്രോളെത്തി. എന്തു വിഷയമുണ്ടായാലും തന്നെ വിളിക്കുന്ന പ്രവണതയെ ട്രോളിക്കൊണ്ടുള്ള പോസ്റ്റാണ് മുകേഷ് ഫേസ്ബുക്കില് പങ്കുവച്ചത്. ‘ഓരോരോ മാരണങ്ങളെ… നല്ല ട്രോള്’ എന്ന അടിക്കുറിപ്പോടെയാണ് മുകേഷ് ട്രോള് പങ്കുവച്ചിരിക്കുന്നത്. കേരളത്തില് നടക്കുന്ന സകല പ്രശ്നങ്ങളും പരിഹരിക്കാന് നാട്ടുകാര് തന്നെ വിളിക്കുന്ന കാണുന്ന മുകേഷേട്ടന്.ഇതൊക്കെ എന്തിനാടാ എന്നോട് പറയുന്നേ എന്നാണ് മുകേഷ് സ്വയം ട്രോളിയിരിക്കുന്നത്.
ഇ ബുള് ജെറ്റ് വിഷയത്തില് പരാതി പറയാന് വിളിച്ച യുവാവിനോട് മുകേഷ് പറയുന്ന മറുപടി വൈറലായിരുന്നു. സംഭവത്തില് ഇടപെടാന് പറ്റുമോ എന്ന് ഫോണില് ചോദിക്കുന്ന യുവാവിനോട് മുകേഷ് ‘എന്താണ് ഇ-ബജറ്റോ? എന്താ സംഭവം..’ എന്ന് ചോദിക്കുന്ന മറുപടിയാണ് വൈറലായത്. വിളിച്ച ആള് കോതമംഗലത്തുനിന്നായതിനാല് നിങ്ങള് കോതമംഗലം ഓഫീസില് പറയൂ എന്ന് മുകേഷ് ആവശ്യപ്പെടുകയും ചെയ്തിരുന്നു.
അതേസമയം, എറണാകുളത്തു നിന്നും കുറച്ചു പേര് സുരേഷ് ഗോപിയെ വിളിച്ചപ്പോഴും അദ്ദേഹത്തിനും കാര്യം മനസിലായില്ല. ഞാന് ചാണകമല്ലേ,ചാണകമെന്ന് കേള്ക്കുമ്പോള് തന്നെ അലര്ജിയാകുമല്ലോ. വിഷയം മുഖ്യമന്ത്രിയോടും ഗതാഗത മന്ത്രിയോടും പറയൂ എന്നാണ് സുരേഷ് ഗോപിയുടെതായി പ്രചരിക്കുന്ന ഓഡിയോയില് പറയുന്നത്.
നികുതി അടച്ചില്ലെന്നതടക്കം ഒന്പത് നിയമ ലംഘനങ്ങള് ചൂണ്ടിക്കാട്ടി കഴിഞ്ഞ ദിവസം വ്ലോഗര്മാരുടെ വാഹനം മോട്ടോര് വാഹന വകുപ്പ് കസ്റ്റഡിയിലെടുത്തിരുന്നു. തുടര്ന്ന് ഇന്നലെ കണ്ണൂര് ആര്.ടി.ഒ ഓഫീസിലെത്തിയ എബിനും ലിബിനും ഉദ്യോഗസ്ഥരുമായി വാക്കുതര്ക്കത്തില് ഏര്പ്പെടുകയും കയ്യേറ്റത്തില് കലാശിക്കുകയുമായിരുന്നു. കൃത്യനിര്വ്വഹണം തടസപ്പെടുത്തി പൊതുമുതല് നശിപ്പിച്ചു എന്നിവയടക്കം ഏഴോളം വകുപ്പുകളാണ് ഇവര്ക്കെതിരെ പൊലീസ് ചുമത്തിയിട്ടുളളത്.