സോഷ്യല് മീഡിയ വഴി മലയാള സിനിമ ലോകത്തേക്ക് കാലെടുത്തു വെയ്ക്കുകയാണ് തിരുവനന്തപുരം ചെങ്കല് ചൂളയിലെ ചെറുപ്പക്കാര്.
‘അയന്’ സിനിമയിലെ സൂര്യയുടെ ഡാന്സും ഫൈറ്റും അനുകരിച്ചാണ് ഇവര് ജനഹൃദയങ്ങള് കീഴടക്കിയത്. കണ്ണന് താമരക്കുളം സംവിധാനം ചെയ്യുന്ന ‘വിരുന്ന്’ എന്ന ചിത്രത്തിലാണ് ചെങ്കല്ച്ചൂളയിലെ കുട്ടികള് ആദ്യമായി മുഖം കാണിക്കുന്നത്. സിനിമയുടെ ചിത്രീകരണം ഇടുക്കിയിലെ കുട്ടിക്കാനത്ത് പുരോഗമിക്കുകയാണ്.
മൊബൈല് കാമറ കൊണ്ട് അതിശയിപ്പിച്ച ചെങ്കല്ച്ചൂളയിലെ അഭിയും കൂട്ടരും ഇനി പ്രൊഫഷണല് കാമറക്ക് മുന്നിലാണ് അണിനിരക്കുന്നത്. ഇവര് പങ്കെടുത്ത ആദ്യ ദിവസത്തെ ഷൂട്ടിങ് പൂര്ത്തിയായി എന്ന റിപ്പോര്ട്ട് ആണ് പുറത്ത് വരുന്നത്.
തമിഴ് നടന് അര്ജുനും നിക്കി ഗല്റാണിയുമാണ് ചിത്രത്തിലെ നായികാനായകന്മാര്. ബഹുഭാഷാ ചിത്രത്തിലൂടെയാണ് ഇവരുടെ അരങ്ങേറ്റം കൂടാതെ സിനിമ എന്ന വലിയ സ്വപ്നം യാഥാര്ഥ്യമാകുന്നതിന്റെ സന്തോഷത്തിലാണ് ചെങ്കല്ച്ചൂളയിലെ മിടുക്കന്മാര്.
വീഡിയോ പുറത്തിറങ്ങി മണിക്കൂറുകള്ക്കുള്ളില് തന്നെ സമൂഹ മാധ്യമങ്ങളില് ഹിറ്റായി മാറിയിരുന്നു. ഈ വീഡിയോയാണ് സൂര്യ തന്റെ ഔദ്യോഗിക ട്വിറ്റര് അക്കൌണ്ടില് പങ്കുവെച്ചത്. ”ഇഷ്ടപ്പെട്ടു, വളരെ നന്നായിരിക്കുന്നു, സുരക്ഷിതരായിരിക്കൂ!”- എന്നാണ് സൂര്യ വീഡിയോ പങ്കുവെച്ച് അടിക്കുറിപ്പെഴുതിയിരിക്കുന്നത്. സൂര്യ ഫാന്സ് കേരളയുടെ വീഡിയോയാണ് സൂര്യ ട്വിറ്ററില് പങ്കുവെച്ചത്.
ചെങ്കല്ച്ചൂളയിലെ കുട്ടികള് അഭിനയിച്ചു തകര്ത്ത അയനിലെ പണം തട്ടുന്ന ആക്ഷന് രംഗമാണ് സീക്വന്സുകളോടെ ആദ്യം പകര്ത്തിയത്. തുടര്ന്ന് സൂര്യയുടെ പിറന്നാള് ദിനത്തോട് അനുബന്ധിച്ച് കഴിഞ്ഞ ദിവസം പുറത്തിറങ്ങിയ അയനിലെ തന്നെ ഗാനരംഗത്തിന്റെ പുനരാവിഷ്കാരവും സോഷ്യല് മീഡിയയില് വൈറലായിരുന്നു.
പുറത്തിറങ്ങി നിമിഷങ്ങള്ക്കകം ലക്ഷകണക്കിന് പേരാണ് വീഡിയോ സമൂഹ മാധ്യമങ്ങളില് കണ്ടത്.സിനിമയില് വലിയ ഉയരങ്ങളിലെത്താന് ഈ മിടുക്കര്ക്ക് കഴിയും എന്ന് തന്നെയാണ് വിരുന്ന് സിനിമയുടെ അണിയറ പ്രവര്ത്തകര് വിലയിരുത്തുന്നത്.