നാളികേര വികസന ബോര്ഡ് അംഗമായി സുരേഷ് ഗോപി എം.പിയെ തെരഞ്ഞെടുത്തു. എതിരില്ലാതെയാണ് താരം തല്സ്ഥാനത്തേക്ക് തിരഞ്ഞെടുക്കപ്പെട്ടത്. ബി.ജെ.പി സംസ്ഥാന അധ്യക്ഷന് കെ. സുരേന്ദ്രനാണ് ഇക്കാര്യം ഫേസ്ബുക്കിലൂടെ അറിയിച്ചത്. കേരളത്തിലെ നാളികേര കര്ഷകരുടെ പ്രശ്നങ്ങള്ക്ക് പരിഹാരം കാണാന് അദ്ദേഹത്തിന്റെ ഈ നിയോഗം ഉപകാരപ്പെടുമെന്ന് കെ. സുരേന്ദ്രന് വ്യക്തമാക്കി.
കൊച്ചി ആസ്ഥാനമായി പ്രവര്ത്തിക്കന്ന നാളികേര വികസന ബോര്ഡിലേയ്ക്ക് കഴിഞ്ഞ ദിവസമാണ് സുരേഷ് ഗോപിയെ തെരഞ്ഞെടുത്തത്. കേന്ദ്ര കാര്ഷിക മന്ത്രാലയത്തിന് കീഴിലാണ് നാളികേര വികസന ബോര്ഡ് പ്രവര്ത്തിക്കുന്നത്. ബോര്ഡിന്റെ പ്രധാന ഉദ്ദേശം നാളികേരത്തിന്റെയും നാളികേര ഉല്പ്പന്നങ്ങളുടെയും വികസനമാണ്. നാളികേര ഉത്പാദനളുടെ വിപണം പ്രാത്സാഹിപ്പിക്കുകയാണ് നാളികേര വികസന ബോര്ഡിന്റെ ലക്ഷ്യം. കേരളത്തില് ആലുവയ്ക്കടുത്ത് വാഴക്കുളത്ത് ബോര്ഡ് സാങ്കേതിക വികസന കേന്ദ്രം സ്ഥാപിച്ചിട്ടുണ്ട്.
അതേസമയം, കേന്ദ്രമന്ത്രിസഭാ പുനഃസംഘടനയുടെ ഭാഗമായി സുരേഷ് ഗോപിയെ കേന്ദ്രമന്ത്രിയായി ഉയര്ത്തിയേക്കുമെന്ന് റിപ്പോര്ട്ടുകള് വന്നിരുന്നു. എന്നാല് അതുണ്ടായിരുന്നില്ല. ഇതിനുപിന്നാലെയാണ് നാളികേര വികസന ബോര്ഡ് അംഗമായി സുരേഷ് ഗോപിയെ തിരഞ്ഞെടുത്തത്. കേരളത്തിലെ നാളികേര കര്ഷകരുടെ പ്രശ്നങ്ങള്ക്ക് ഇനി പരിഹാരമുണ്ടാകുമെന്നാണ് പ്രതീക്ഷ.
അതേസമയം പുതിയ ഉത്തരവാദിത്തം ലഭിച്ചതിന്റെ സന്തോഷം ജനങ്ങളുമായി ഫേസ് ബുക്കിലൂടെ പങ്കുവച്ച് രാജ്യസഭാംഗം സുരേഷ് ഗോപി എം.പി രംഗത്തെത്തിയിരുന്നു. തന്നെ വിശ്വസിച്ചേല്പ്പിച്ച ഈ പുതിയ കര്ത്തവ്യം ഏറ്റവും ഭംഗിയായി നിറവേറ്റാന് പരിശ്രമം നടത്തുമെന്നും ഫേസ്ബുക്കിലെ കുറിപ്പിലൂടെ താരം അറിയിച്ചു.
വിഷയത്തില് നിര്ദ്ദേശങ്ങളും പരാതികളുമറിയിച്ചവര്ക്ക് ‘നമുക്ക് ശരിയാക്കാം’ എന്ന ഉറപ്പും താരം നല്കി.
സുരേഷ് ഗോപി എം.പിയുടെ ഫേസ്ബുക്ക് പോസ്റ്റ് പൂര്ണരൂപം ചുവടെ:
കേരം സംരക്ഷിക്കാന് കേരളത്തില്നിന്ന് ഒരു തെങ്ങുറപ്പ്!
ഇന്ത്യയുടെ Coconut devolopment boardലേക്ക് ഐകകണ്ഠേന രാജ്യസഭയില് നിന്ന് തിരഞ്ഞെടുക്കപെട്ട വിവരം സസന്തോഷം നിങ്ങളെല്ലാവരെയും അറിയിച്ചുകൊള്ളുന്നു. എന്നെ വിശ്വസിച്ച് ഏല്പിച്ച ഈ പുതിയ കര്ത്തവ്യം ഏറ്റവും ഭംഗിയായി നിര്വഹിക്കാന് ഞാന് യോഗ്യമായ പരിശ്രമം നടത്തും.
നാളികേര വികസന ബോര്ഡിലെ രാഷ്ട്രീയനിയമനങ്ങള് കോര്പ്പറേറ്റുകളെ സഹായിക്കാനാണെന്ന് കെപിസിസി അധ്യക്ഷന് കെ സുധാകരന്. സഹകരണ പ്രസ്ഥാനങ്ങളെ അക്രമത്തിലൂടെയും അനധികൃത ഭരണകൂട ഇടപെടലുകളിലൂടയും പിടിച്ചെടുത്ത് കൊള്ള നടത്തുകയാണ് ഫാഷിസ്റ്റ് ഭരണകൂടം എന്നും സുധാകരന് പറഞ്ഞു. ഇതിനെ കോണ്ഗ്രസ് സാധ്യമായ എല്ലാ രീതിയിലും ചെറുക്കുമെന്നും സുധാകരന് വ്യക്തമാക്കി. ഫേസ്ബുക്ക് പോസ്റ്റിലൂടെയായിരുന്നു അഡിയത്തിന്റെ പ്രതികരണം.