അറുപത്തിയൊന്നാം പിറന്നാള്‍ ദിനം കൊവിഡ് പ്രതിസന്ധിക്കിടെ മോഹന്‍ലാല്‍ ആഘോഷമാക്കിയില്ല. മറിച്ച് മോഹന്‍ലാല്‍ ആരോഗ്യമേഖലയ്ക്ക് വലിയൊരു പിറന്നാള്‍ സമ്മാനമാണ് നല്‍കിയത്. കേരളത്തിലെ ആശുപത്രികളിലേക്ക് മെഡിക്കല്‍ ഉപകരണങ്ങള്‍ നല്‍കിയാണ് തന്റെ കടമ പിറന്നാള്‍ ദിനം മോഹന്‍ലാല്‍ നിറവേറ്റിയത്. ഒന്നരക്കോടി രൂപയുടെ മെഡിക്കല്‍ ഉപകരണങ്ങളാണ് മോഹന്‍ലാല്‍ ആശുപത്രികളിലേക്ക് നല്‍കിയത്.
മലയാളത്തിന്റെ പ്രിയ നടന്‍ മോഹന്‍ലാലിന് ഹൃദയം നിറഞ്ഞ നന്ദി രേഖപ്പെടുത്തിയിരിക്കുകയാണ് ആരോഗ്യമന്ത്രി വീണ ജോര്‍ജ്. ഓക്സിജന്‍ കിടക്കകള്‍, വെന്റിലേറ്റര്‍, ഐ.സി.യു കിടക്കകള്‍, എക്സ്-റേ മെഷീനുകള്‍ എന്നിവയുള്‍പ്പെടെയാണ് സംഭാവനയായി ലഭിച്ചിരിക്കുന്നത്. കളമശ്ശേരി മെഡിക്കല്‍ കോളേജിലെ വാര്‍ഡുകളിലേക്ക് ആവശ്യമായ ഓക്സിജന്‍ പൈപ്പ് ലൈന്‍ സ്ഥാപിക്കുന്നതിനുള്ള സഹായവും താരം നല്‍കിയിട്ടുണ്ട്.
ഇന്ന് രാവിലെ ഫോണില്‍ വിളിച്ച് ആരോഗ്യമന്ത്രിയുടെ ഉത്തരവാദിത്വം ഏറ്റെടുത്തതില്‍ മോഹന്‍ലാല്‍ ആശംസകള്‍ അറിയിച്ചു എന്നും വീണ ജോര്‍ജ് പറഞ്ഞു. കോവിഡ് പ്രതിരോധത്തിന് ഉള്‍പ്പടെ എല്ലാ പിന്തുണയും അദ്ദേഹം വാഗ്ദാനം ചെയ്തിട്ടുണ്ട്. മഹാമാരിയെ നേരിടുന്ന ഘട്ടത്തില്‍ അദ്ദേഹം നല്‍കിയ പിന്തുണയ്ക്ക് നന്ദിയുണ്ടെന്നും വീണ ജോര്‍ജ്ജ് വ്യക്തമാക്കി.
