പിണറായി വിജയന്റെ സത്യപ്രതിജ്ഞയ്ക്ക് തിരുവനന്തപുരം സെന്‍ട്രല്‍ സ്റ്റേഡിയത്തില്‍ സംഗീത മാന്ത്രികന്‍ എആര്‍ റഹ്മാന്റെയും മെഗാസ്റ്റാര്‍ മമ്മൂട്ടിയുടെയും ഗാനഗന്ധര്‍വ്വന്‍ യേശുദാസിന്റെയും മോഹന്‍ലാല്‍, ജയറാം, സുജാത എന്നിവരുടെയും സാന്നിധ്യമുണ്ടാകും. കൊവിഡ് നിയന്ത്രണം നിലനില്‍ക്കുന്നത് കൊണ്ട് ഇവരൊക്കെ വെര്‍ച്വലായിട്ടാകും പങ്കെടുക്കുക.
13 മുഖ്യമന്ത്രിമാരെയാണ് സത്യപ്രതിജ്ഞയ്ക്ക് ക്ഷണിച്ചത്. എന്നാല്‍ കൊവിഡ് സാഹചര്യത്തില്‍ പങ്കെടുക്കാനില്ലെന്ന് മുഖ്യമന്ത്രിമാര്‍ അറിയിച്ചിരുന്നു. തമിഴ്‌നാടിനെ പ്രതിനിധീകരിച്ച് സ്റ്റാലിന് പകരം വ്യവസായ മന്ത്രി തങ്കം തേനരശ് എത്തും.ബംഗാള്‍ സര്‍ക്കാരിന് പ്രതിനിധീകരിച്ച് എംപി കാകോലി ഘോഷ് ദസ്തിദര്‍ പങ്കെടുക്കും.
2.50 നാണ് നവകേരള ഗീതാഞ്ജലി അവതരണം നടക്കുന്നത്. 1957 മുതല്‍ പിണറായി വിജയന്‍ സര്‍ക്കാരിന്റെ കാലം വരെയുള്ള കേരളത്തിന്റെ പുരോഗതി വിവരിക്കുന്ന വിഡിയോയാണ് നവകേരള ഗീതാഞ്ജലി. മമ്മൂട്ടിയാണ് വിഡിയോ അവതരിപ്പിക്കുന്നത്. എആര്‍ റഹ്മാന്‍, യോശുദാസ്, മോഹന്‍ലാല്‍, ജയറാം, സുജാത എന്നിങ്ങനെ നിരവധി പ്രമുഖര്‍ ഇതില്‍ വെര്‍ച്വലായി പങ്കാളിയാകും.
3.30 ന് സത്യവാചകം ഗവര്‍ണര്‍ ചൊല്ലിക്കൊടുക്കും. സത്യപ്രതിജ്ഞയ്ക്ക് ശേഷം രാജ്ഭവനില്‍ ഗവര്‍ണറുടെ ചായ സല്‍ക്കാരം നടക്കും. ആദ്യ മന്ത്രിസഭാ യോഗം വൈകിട്ട് നടക്കും. മന്ത്രിസഭാ യോഗ തീരുമാനങ്ങള്‍ മുഖ്യമന്ത്രി വിശദീകരിക്കും. എംഎല്‍എമാരുടെ സത്യപ്രതിജ്ഞ 24 നാണ് നടക്കുക. 25 ന് സ്പീക്കര്‍ തെരഞ്ഞെടുപ്പ് നടക്കും.
