മാധ്യമപ്രവര്ത്തകനും മുഖ്യമന്ത്രിയുടെ മുന് മാദ്ധ്യമ ഉപദേഷ്ടാവുമായ ജോണ് ബ്രിട്ടാസിനെതിരെ ആഞ്ഞടിച്ച് ബിജെപി തിരുവനന്തപുരം ജില്ലാ അദ്ധ്യക്ഷന് വിവി രാജേഷ്. ഏഷ്യാനെറ്റ് ന്യൂസ് ബഹിഷ്കരണത്തിന്റെ പേരില് കേന്ദ്രമന്ത്രി വി.മുരളീധരനെ വിമര്ശിച്ചത് ചൂണ്ടിക്കാണിച്ചാണ് വിവി രാജേഷിന്റെ വിമര്ശനം. മുഖ്യമന്ത്രിയുടെ ശമ്പളം പറ്റാത്ത ഉപദേശകന് എങ്ങനെ ലക്ഷങ്ങളുടെ ബാങ്ക് ബാലന്സും സ്വത്തുക്കളുമുണ്ടായെന്ന് മനസ്സിലാകുന്നില്ലെന്നും വിവി രാജേഷ് പറയുന്നു.
വി.മുരളീധരനെ നിങ്ങള് ചില കാര്യങ്ങള് പഠിപ്പിക്കുന്നത് കണ്ടു. നിങ്ങള് മുഖ്യമന്ത്രി പിണറായി വിജയനെ എന്താണ് പഠിപ്പിച്ചിട്ടുള്ളതെന്ന് വിവി രാജേഷ് ചോദിക്കുന്നു. ഒരു യോഗം റിപ്പോര്ട്ട് ചെയ്യാനെത്തിയ മാദ്ധ്യമപ്രവര്ത്തകരെ കടക്കുപുറത്ത് എന്നാക്രോശിച്ച് ആട്ടിപ്പുറത്താക്കിയ പിണറായി വിജയന്റെ നടപടി സത്യപ്രതിജ്ഞാ ലംഘനമായിരുന്നോ ? സ്നേഹമോ വിദ്വേഷമോ കൂടാതെ ചുമതല നിറവേറ്റണം എന്ന് അന്ന് പിണറായിയെ താങ്കള് ഓര്മിപ്പിച്ചിരുന്നോ? അന്ന് നിങ്ങള് എന്താണ് പറഞ്ഞ് പഠിപ്പിച്ചത്?
അന്ന് നിങ്ങളും ഒരു മാധ്യമപ്രവര്ത്തകനായിരുന്നില്ലേ? കാഞ്ഞങ്ങാട് പിണറായി സര്ക്കാരിന്റെ രണ്ടാം വാര്ഷികാഘോഷവേദിയില് നിന്ന് പിണറായി വിജയന് തന്നെ മാദ്ധ്യമപ്രവര്ത്തകരെ പുറത്താക്കിയത് അത് അദ്ദേഹത്തിന്റെ ജന്മദിനാഘോഷമായതിനാലാണോ? സര്ക്കാര് പണം ചിലവിട്ട് നടത്തുന്ന പരിപാടിയില് നിന്ന് മാദ്ധ്യമപ്രവര്ത്തകരെ പുറത്താക്കാമോയെന്ന് ഉപദേശകന് എന്ന നിലയില് താങ്കള് ചോദിച്ചിരുന്നോ?
എറണാകുളം ഗസ്റ്റ് ഹൗസില് കാത്തു നിന്ന മാദ്ധ്യമപ്രവര്ത്തകരെ ആട്ടിപ്പായിച്ചത് ഗസ്റ്റ് ഹൗസ് പിണറായി വിജയന്റെ തറവാട്ടുസ്വത്തായതിനാലായിരുന്നോ, അത് തറുതല രീതിയായിരുന്നോ? മുഖ്യമന്ത്രിയെന്ന നിലയില് നടത്തുന്ന വാര്ത്താസമ്മേളനത്തില് ‘വലത് മാദ്ധ്യമങ്ങള് ‘ എന്ന് പേരിട്ട് ചില മാദ്ധ്യമങ്ങളെ പിണറായി വിജയന് അധിക്ഷേപിക്കുന്നത് സത്യപ്രതിജ്ഞാ ലംഘനമാണോ? നിശ്ചയിച്ച സമയം കഴിഞ്ഞാല് ഒരു മിനിറ്റുപോലും മാദ്ധ്യമപ്രവര്ത്തകരോട് ഉത്തരം പറയില്ല എന്ന് പിണറായി ശഠിക്കുന്നത് തികഞ്ഞ ജനാധിപത്യ ബോധ്യത്തിലൂന്നിയുള്ളതാണോ?
ഇതെല്ലാം പോകട്ടെ, ബഹിഷ്ക്കരണമെന്ന മഹാപാതകത്തെക്കുറിച്ച് താങ്കള് പറഞ്ഞല്ലോ, ഇപ്പോള് ഞങ്ങള് നിസ്സഹകരിക്കുന്ന ഏഷ്യാനെറ്റ് ന്യൂസ് ചാനലിനെ ഏതാനും മാസങ്ങള്ക്ക് മുമ്ബല്ലേ താങ്കളുടെ പാര്ട്ടിയായ സിപിഎം ബഹിഷ്ക്കരിച്ചത്…? സിപിഎമ്മിന്റെ ഏഷ്യാനെറ്റ് ബഹിഷ്കരണം തികഞ്ഞ ജനാധിപത്യബോധ്യത്തിന്റെ പ്രകടനമായിരുന്നോ? സിപിഎമ്മുകാരെല്ലാം കൊല്ലപ്പെടേണ്ടവരാണെന്ന് പറഞ്ഞതിനാണോ ഏഷ്യാനെറ്റിനെ ബഹിഷ്ക്കരിച്ചത് ?
അഡ്വ.ജയശങ്കറും, കെ.എം ഷാജഹാനും ജോസഫ് സി മാത്യുവുടമക്കം നിങ്ങള്ക്ക് അപ്രിയ നിലപാടുകള് എടുക്കുന്ന വ്യക്തികളെ സിപിഎമ്മുകാര് ചാനല് ചര്ച്ചകളില് ബഹിഷ്ക്കരിക്കുന്നില്ലേ ? അധികാരമദം പൊട്ടിയിട്ടാണോ അഡ്വ.ജയശങ്കര് പങ്കെടുത്ത ചര്ച്ചയില് നിന്ന് എ.എന് ഷംസീര് എംഎല്എ ഇറങ്ങിപ്പോയത് ?വനിതാമാദ്ധ്യമപ്രവര്ത്തകരടക്കം സര്ക്കാരിന്റെ കൊള്ളരുതായ്മകളെ ചോദ്യം ചെയ്ത മാദ്ധ്യമപ്രവര്ത്തകരെ മുഖ്യമന്ത്രിയുടെ പ്രസ് സെക്രട്ടറിയടക്കം സമൂഹമാദ്ധ്യമങ്ങളിലൂട അധിഷേപിച്ചത് ശരിയായില്ല എന്ന് ബ്രിട്ടാസ് ഉപദേശിച്ചിരുന്നോ ? എന്തിനേറെ, മാദ്ധ്യമസ്വാതന്ത്ര്യത്തെയാകെ അടിച്ചമര്ത്തുന്ന 118 എ എന്ന കരിനിയമം നടപ്പാക്കാനിറങ്ങിയ സര്ക്കാരിന്റെ ഉപദേശകനായിരുന്ന മാദ്ധ്യമപ്രവര്ത്തകനല്ലേ താങ്കള്?
മുരളീധരനെ ജനാധിപത്യം പഠിപ്പിക്കാനിറങ്ങുന്ന താങ്കളോട് ചോദിക്കാനുള്ളത് ശങ്കരാടിയുടെ ഡയലോഗാണ്..ലേശം ഉളുപ്പ്..? ഉണ്ടോ എന്നും വിവി രാജേഷ് ചോദിക്കുന്നു.
ഏതായാലും മാദ്ധ്യമപ്രവര്ത്തകന് മാത്രമായിരുന്ന ( ശമ്ബളം പറ്റാത്ത ഉപദേശകനും) ജോണ് ബ്രിട്ടാസിന് എങ്ങനെയാണ് മരടിലും മയൂര്വിഹാറിലും ( ഡല്ഹി)കണ്ണൂരിലും കവടിയാറിലും പേരൂര്ക്കടയിലുമെല്ലാം സ്വന്തമായി വസ്തുവകകളും ലക്ഷങ്ങളുടെ ബാങ്ക് ബാലന്സും ഉണ്ടായതെന്നും ( നാമനിര്ദേശപത്രികയില് കണ്ടത്) ഞങ്ങള് ചോദിക്കുന്നില്ല. അതെല്ലാം ജനാധിപത്യത്തില് ഊന്നിയുള്ള മാദ്ധ്യമപ്രവര്ത്തനത്തിലൂടെ സമ്പാദിച്ചതാണോ ‘പച്ചക്കറി മല്സ്യ മൊത്ത വ്യാപാരത്തിലൂടെ ‘ ഉണ്ടാക്കിയതാണോ എന്നതൊന്നും തല്ക്കാലം ഞങ്ങള്ക്ക് വിഷയമല്ല.