വീടിന്റെ ബാല്‍ക്കണി തകര്‍ന്നു വീഴുന്ന ഞെട്ടിപ്പിക്കുന്ന വീഡിയോ വൈറല്‍. കാലിഫോര്‍ണിയയിലെ മാലിബുവില്‍ വീടിന്റെ ബാല്‍ക്കണിയാണ് തകര്‍ന്നത്. കടലോരത്ത് ചേര്‍ന്നാണ് ഈ വീട് സ്ഥിതിചെയ്യുന്നത്. ആളുകള്‍ കൂട്ടമായി നില്‍ക്കുന്നതും പെട്ടെന്ന് ബാല്‍ക്കണി ഇടിഞ്ഞ് ആളുകള്‍ ആര്‍ത്തുവിളിക്കുന്നതും വീഡിയോയില്‍ കാണാം.
വീട്ടില്‍ പാര്‍ട്ടി നടുക്കുകയായിരുന്നു. ബാല്‍ക്കണി താഴെയുള്ള പാറക്കൂട്ടത്തിലേയ്ക്ക് ഇടിഞ്ഞു വീഴുകയായിരുന്നു. അയല്‍വാസിയുടെ സിസിടിവി ക്യാമറയിലാണ് ദൃശ്യം പതിഞ്ഞത്. അപകടത്തില്‍ നിരവധി അതിഥികള്‍ക്ക് പരിക്കേറ്റതായാണ് റിപ്പോര്‍ട്ടുകള്‍. ഗുരുതര പരിക്കേറ്റ രണ്ട് പേരെ ആശുപത്രിയില്‍ പ്രവേശിപ്പിച്ചിരുന്നു. ഭാഗ്യത്തിന് അപകടത്തില്‍ ആര്‍ക്കും ജീവന്‍ നഷ്ടപ്പെട്ടിട്ടില്ല. അപകടം നടക്കുമ്പോള്‍ ബാല്‍ക്കണിയില്‍ 15 പേര്‍ ഉണ്ടായിരുന്നു.
Shocking video of the moments a balcony collapses in #Malibu injuring several people. #CBSLA https://t.co/6lEnD4DxkW pic.twitter.com/1dhVsPWhi9
— Mike Rogers (@MikeRogersTV) May 9, 2021
കൂടുതല്‍ ഉയര്‍ന്ന നിലയിലാണ് അപകടം നടന്നതെങ്കില്‍ ആളുകളുടെ ജീവന്‍ തന്നെ അപകടത്തിലാകുമായിരുന്നുവെന്ന് ദൃക്സാക്ഷി പറഞ്ഞു. ബാല്‍ക്കണിയ്ക്ക് വിള്ളല്‍ ഉണ്ടാകുന്ന ശബ്ദം കേട്ടു. തുടര്‍ന്ന് തന്റെ കാമുകിയും മറ്റു എല്ലാ സുഹൃത്തുക്കളും 15 അടി താഴെയുള്ള പാറക്കൂട്ടത്തിലേയക്ക് വീഴുന്നത് നേരില്‍ കാണുകയായിരുന്നുവെന്ന് സംഭവത്തിന് ദൃക്സാക്ഷിയായ യുവാവ് പറഞ്ഞു. ബാല്‍ക്കണിയുടെ അവശിഷ്ടങ്ങള്‍ പരിശോധിച്ച അഗ്‌നിശമന വകുപ്പ് ഉദ്യോഗസ്ഥര്‍ വീട് വാസയോഗ്യമല്ലെന്ന് വ്യക്തമാക്കിയിട്ടുണ്ട്.
