വാളയാര്‍ പെണ്‍കുട്ടിയുടെ അമ്മയ്‌ക്കെതിരെ അഡ്വ.ഹരീഷ് വാസുദേവന്റെ പരാമര്‍ശം അങ്ങേയറ്റം നിരുത്തരവാദിത്വപരമായിരുന്നു. ഇതിനെതിരെ പല പ്രമുഖരും രംഗത്തെത്തിയിരുന്നു. ഇപ്പോഴിതാ ആ അമ്മയുടെ വേദനാജനകമായ വാക്കുകളുമെത്തി. തന്നെ അപകീര്‍ത്തിപ്പെടുത്താന്‍ ശ്രമം നടക്കുന്നതായി വാളയാര്‍ പെണ്‍കുട്ടികളുടെ അമ്മ പറയുന്നു.
തനിക്കെതിരെ ഹരീഷ് വാസുദേവന്‍ ഫേസ്ബുക്കില്‍ കുറിച്ചത് ഗൂഢാലോചനയുടെ ഭാഗമായിട്ടാണെന്ന് അമ്മ പറയുന്നു. ധര്‍മ്മടത്ത് മത്സരിച്ച മുഖ്യമന്ത്രി പിണറായി വിജയന്റെ പോസ്റ്ററുകളാണ് എല്ലായിടത്തും നിറഞ്ഞിരുന്നത്. മറ്റ് സ്ഥാനാര്‍ത്ഥികളുടെ പോസ്റ്ററുകളൊക്കെ അപ്രത്യക്ഷമായിരുന്നു. തന്റെ പോസ്റ്ററുകളും ബാനറുകളും വ്യാപകമായി നശിപ്പിക്കപ്പെട്ടിരുന്നുവെന്നും വാളയാര്‍ പെണ്‍കുട്ടിയുടെ അമ്മ പറയുന്നു. ഇതില്‍ നിന്നു തന്നെ വ്യക്തമാണ് സിപിഎം എന്തെക്കെയോ ഭയക്കുന്നുണ്ടെന്ന്. ഞങ്ങളോട് മുഖ്യമന്ത്രി കാണിച്ച അനിതീ ആ മണ്ഡലത്തിലെ ജനങ്ങള്‍ അറിയണം എന്നുള്ളത് കൊണ്ടാണ് അവിടെ മത്സരിച്ചതെന്നും ആ അമ്മ പറയുന്നു.
വാളയാര്‍ പെണ്‍കുട്ടികളുടെ അമ്മ സ്വതന്ത്രയായിട്ടാണ് മത്സരിച്ചത്. വാളയാറിലെ സഹോദരിമാരുടെ മരണത്തില്‍ അമ്മയെ കുറ്റപ്പെടുത്തികൊണ്ടായിരുന്നു ഹൈക്കോടതി അഭിഭാഷകന്‍ ഹരീഷ് വാസുദേവന്റെ പോസ്റ്റുണ്ടായിരുന്നത്. 2018ല്‍ പ്രതികളെ വെറുതെവിട്ട സമയത്ത് സോജനെതിരെയും പ്രതികള്‍ക്കെതിരെയും ഹരീഷ് പോസ്റ്റിട്ടിരുന്നു. അന്ന് കുറ്റം ചെയ്തവര്‍ക്കെതിരെ പോസ്റ്റിട്ട ഹരീഷ് എന്തിനാണ് ഇപ്പോള്‍ തനിക്കെതിരെ പരസ്യമായി രംഗത്ത് വന്നിരിക്കുന്നതെന്നും എന്തിനാണ് തന്നെ മോശക്കാരിയായി ചിത്രീകരിക്കുന്നതെന്നും ആ അമ്മ ചോദിക്കുന്നു.
അതുകൊണ്ടാണ് ഇതില്‍ ഗൂഢാലോചനയുണ്ടെന്ന് പറയേണ്ടിവരുന്നത്. ആ ഗുഢാലോചനയില്‍ മുഖ്യമന്ത്രിക്ക് വരെ പങ്കുണ്ടോയെന്ന് സംശയിക്കേണ്ടിയിരിക്കുന്നു.ഹരീഷ് വാസുദേവന്റെ പോസ്റ്റിനെതിരെ തെരഞ്ഞെടുപ്പ് കമ്മീഷനിലും വാളയാര്‍ പൊലീസ് സ്റ്റേഷനിലും പരാതി നല്‍കിയിട്ടുണ്ട്. ഹരീഷ് ആ പോസ്റ്റിടുമ്പോള്‍ താന്‍ വാളയാര്‍ കുട്ടികളുടെ അമ്മ എന്നതിലുപരി ധര്‍മ്മടം മണ്ഡലത്തിലെ സ്ഥാനാര്‍ത്ഥി കൂടിയായിരുന്നു ആ അമ്മ. അങ്ങനെയുള്ള തന്നെ മനഃപൂര്‍വം അവഹേളിക്കാനാണ് ഹരീഷ് അത്തരമൊരു പോസ്റ്റിട്ടത്. മുഖ്യമന്ത്രി ഒരു കളവ് ചെയ്തു എന്ന് പറഞ്ഞ് ഞാനൊരു പോസ്റ്റിട്ടിരുന്നെങ്കില്‍ എന്നെ അറസ്റ്റ് ചെയ്യുമായിരുന്നല്ലോ എന്നും ആ അമ്മ ചോദിക്കുന്നു.
ഫേസ്ബുക്ക് പോസ്റ്റിലൂടെ വ്യക്തിഹത്യ നടത്തിയതില്‍ നിയമനടപടി വേണം. തികച്ചും വസ്തുത വിരുദ്ധമാണ് ഹരീഷ് വാസുദേവന്റെ പോസ്‌റ്റെന്നും അമ്മ ആരോപിക്കുന്നു. വാളയാര്‍ പൊലീസില്‍ പരാതി നല്‍കിയിട്ടും ഒരു നടപടിയും ഉണ്ടായിട്ടില്ല. തുടര്‍ നിയമനടപടികളിലേക്ക് നീങ്ങുകയാണെന്നും വാളയാര്‍ പെണ്‍കുട്ടികളുടെ അമ്മ പറഞ്ഞു.
