മലബാര്‍ എക്സ്പ്രസ്സിന്റെ ലഗ്ഗേജ് വാനിലുണ്ടായ തീപിടുത്തത്തെ തുടർന്ന് കാസര്‍കോട് സ്റ്റേഷനിലെ പാര്‍സല്‍ ഉദ്യോഗസ്ഥന് സസ്പെന്ഷൻ. ബൈക്ക് ലോഡ് ചെയ്യുന്നതിന്റെ ചുമതലുള്ള പാര്‍സല്‍ ക്ലര്‍ക്കിനെയാണ് സസ്‌പെൻഡ് ചെയ്തത്. പാലക്കാട് ഡിവിഷനാണ് ഉദ്യോഗസ്ഥനെ സസ്‌പെൻഡ് ചെയ്തത്.
ഇന്ന് പുലർച്ചെ മലബാര്‍ എക്‌സ്പ്രസിന്റെ ഇടവ സ്റ്റേഷനടുത്താണ് തീപിടുത്തമുണ്ടായത്. പുലര്‍ച്ചെ 7.45 ഓടുകൂടിയാണ് അപകടമുണ്ടായത്. തീപിടുത്തം ശ്രെദ്ധയിൽപ്പെട്ട യാത്രക്കാര്‍ ചങ്ങല വലിച്ച് തീവണ്ടി നിര്‍ത്തി റെയിൽവേ അധികാരികളെ വിവരം അറിയിക്കുക ആയിരുന്നു. ഇതിനെ തുടർന്ന് തീപിടിച്ച ബോഗി മറ്റ് കോച്ചുകളില്‍ നിന്ന് പെട്ടെന്ന് തന്നെ വേര്‍പ്പെടുത്തി, അര മണിക്കൂർ കൊണ്ട് തീ അണക്കുക ആയിരുന്നു.
തീപിടുത്തം നടന്ന ബോഗിയിൽ ബൈക്കുകൾ ഉണ്ടായിരുന്നു. ഈ ബൈക്കുകളിൽ നിന്നുമാണ് തീപിടുത്തം ഉണ്ടായതെന്നാണ് പ്രാഥമിക നിഗമനം. ബൈക്കുകള്‍ ലോഡ് ചെയ്യുമ്പോള്‍ പെട്രോള്‍ പൂര്‍ണമായും നീക്കം ചെയ്യേണ്ടതുണ്ട്. ഇതിൽ തെറ്റ് സംഭവിച്ചിട്ടുണ്ടെന്നാണ് സംശയം.
Summary:malabar express fire;parcel officer suspended
