കെഎസ്എഫ്ഇ വിവാദത്തില് സിപിഎം സംസ്ഥാന സെക്രട്ടേറിയറ്റ് ധനമന്ത്രി തോമസ് ഐസക്കിനെ അതിരൂക്ഷമായി വിമര്ശിക്കുകയാണ്. പരിശോധനയെ കുറിച്ചുള്ള പരസ്യപ്രസ്താവന ഒഴിവാക്കേണ്ടതായിരുന്നെന്ന് സിപിഎം സംസ്ഥാന സെക്രട്ടേറിയറ്റ് പുറത്തിറക്കിയ പത്രകുറിപ്പില് പറയുന്നു. ധനമന്ത്രിയുടെ പ്രതികരണങ്ങള് തെറ്റായ രീതിയില് വ്യാഖ്യാനമുണ്ടാക്കിയെന്നും സംസ്ഥാന സെക്രട്ടേറിയറ്റ് പ്രസ്താവനയില് വ്യക്തമാക്കിയിട്ടുണ്ട്.
കെഎസ്എഫ്ഇയിലെ വിജിലന്സ് പരിശോധനയുടെ പശ്ചാത്തലത്തില് സിപിഐ(എം)ലും സര്ക്കാരിലും വ്യത്യസ്ത അഭിപ്രായമുണ്ടെന്ന രീതിയില് പരക്കെ പ്രചരിച്ചിരുന്ന ചില കാര്യങ്ങള് തികച്ചും അടിസ്ഥാനരഹിതവും ആശയ കുഴപ്പം സൃഷ്ടിക്കാനുമുള്ള രാഷ്ട്രീയ എതിരാളികളുടെ വ്യഥാ ശ്രമവുമാണ്. കെഎസ്എഫ്ഇ യില് വിജിലന്സ് നടത്തിയത് സാധാരണ ഗതിയിലുള്ള പരിശോധനയാണെന്ന് മുഖ്യമന്ത്രി തന്നെ വ്യക്തമാക്കിയിട്ടുണ്ട്. വിജിലന്സ് പരിശോധന സംബന്ധിച്ചുണ്ടായ ചില പ്രതികരണങ്ങള് തെറ്റായ വ്യാഖ്യാനത്തിനും പ്രചാരണത്തിനും ഉപയോഗിക്കപ്പെട്ടിട്ടുണ്ട്. കെഎസ്എഫ്ഇ പോലെ മികവാര്ന്ന സ്ഥാപനത്തിനെ അപകീര്ത്തിപ്പെടുത്താന് ഈ പരിശോധനയെ ചിലര് ഉപയോഗിക്കുന്നതു കണ്ട് നടത്തിയ പ്രതികരണങ്ങളായിരുന്നു അത്. എന്നാല്, അത്തരം പരസ്യ പ്രതികരണങ്ങള് ഒഴിവാക്കേണ്ടതായിരുന്നു-പ്രസ്താവനയില് പറയുന്നു
കേരളത്തിലെ എല്ഡിഎഫ് സര്ക്കാര് മികച്ച നിലയിലാണ് പ്രവര്ത്തിക്കുന്നത്. അതു കൊണ്ടു കൂടിയാണ് നിരന്തരം വിവാദങ്ങള് സൃഷ്ടിച്ച് ആശയകുഴപ്പമുണ്ടാക്കാന് കഴിയുമോയെന്ന് പ്രതിപക്ഷവും, ഒരു വിഭാഗം മാധ്യമങ്ങളും ശ്രമിക്കുന്നത്, എല്ലാ സീമകളേയും ലംഘിച്ചുള്ള ഈ ജനാധിപത്യവിരുദ്ധ നീക്കം ജനം തിരിച്ചറിയുന്നുണ്ട്. ഈ സാഹചര്യത്തിലാണ് പാര്ടിയിലും സര്ക്കാരിലും ഭിന്നിപ്പുണ്ട് എന്ന് വരുത്തി തീര്ക്കാനുള്ള ശ്രമം തുടങ്ങിയിട്ടുള്ളതെന്ന് സിപിഎം വ്യക്തമാക്കി.
കേരളത്തിലെ മികച്ച രീതിയില് പ്രവര്ത്തിക്കുന്ന ധനകാര്യ സ്ഥാപനമാണ് കെഎസ്എഫ്ഇ. അതിനെ തകര്ക്കുന്നതിനായി സങ്കുചിത രാഷ്ട്രീയ ലക്ഷ്യം വെച്ച് യുഡിഎഫും ബിജെപിയും നടത്തുന്ന നീക്കം പൊതുസമൂഹം തിരിച്ചറിയുന്നുണ്ടെന്നും സിപിഎം വ്യക്തമാക്കി.
Summary : CPM Press Release on KSFE Vigilance Raid