ന്യൂഡൽഹി . രാഷ്ട്രീയ ലോക്ദൾ (ആർഎൽഡി) ബിജെപിയുടെ നേതൃത്വത്തിലുള്ള എൻഡിഎയുടെ ഭാഗമാകും. ഇത് സ്ഥിരീകരിച്ച് പാർട്ടി അദ്ധ്യക്ഷൻ ജയന്ത് ചൗധരി രംഗത്ത് വന്നു. പാർട്ടിയിലെ എല്ലാവരോടും ആലോചിച്ച ശേഷമെടുത്ത ഏകകണ്ഠമായ തീരുമാനമാണിതെന്നും ജയന്ത് ചൗധരി വ്യക്തമാക്കിയിട്ടുണ്ട്. ആർഎൽഡിയുടെ നീക്കം പ്രതിപക്ഷ സഖ്യമായ ഇൻഡി മുന്നണിക്ക് കനത്ത തിരിച്ചടിയാവുകയാണ്.
പാർട്ടിയിലെ എല്ലാ എംഎൽഎമാരോടും പ്രവർത്തകരോടും സംസാരിച്ചതിന് ശേഷമാണ് ഈ തീരുമാനമെടുത്തതെന്നാണ് ആർഎൽഡി അദ്ധ്യക്ഷൻ ജയന്ത് ചൗധരി ഇതേ പറ്റി പറഞ്ഞിരിക്കുന്നത്. രാജ്യത്തിന് വേണ്ടിയും ജനങ്ങൾക്ക് വേണ്ടിയും എന്തെങ്കിലും നല്ല കാര്യങ്ങൾ ചെയ്യാൻ ആഗ്രഹിക്കുന്നുവെന്നു പറഞ്ഞ ജയന്ത് ചൗധരി, തന്റെ മുത്തച്ഛനും മുൻ പ്രധാനമന്ത്രിയുമായ ചൗധരി ചരൺ സിങ്ങിന് മരണാനന്തര ബഹുമതിയായി ഭാരതരത്ന നൽകി ആദരിച്ചതിൽ പ്രധാനമന്ത്രിക്ക് നന്ദി അറിയിച്ചിരുന്നു.
മുൻ സർക്കാരുകൾക്ക് ചെയ്യാൻ കഴിയാത്തത് പ്രധാനമന്ത്രി നരേന്ദ്രമോദിക്ക് ചെയ്യാനായി. ഈ പുരസ്കാരം ഞങ്ങളുടെ കുടുംബത്തിലോ പാർട്ടിയിലോ ഒതുങ്ങുന്നില്ല. ഓരോ കർഷകനും യുവാക്കൾക്കും അഭിമാന നിമിഷമാണിതെന്നും ജയന്ത് ചൗധരി പറഞ്ഞിട്ടുണ്ട്. ഇതിനിടെ ഉത്തർപ്രദേശിൽ ഭാരത് ജോഡോ ന്യായ് യാത്രയുടെ ദിവസങ്ങൾ വെട്ടിച്ചുരുക്കാൻ കോൺഗ്രസ് ആലോചിക്കുന്നതായും, ആർഎൽഡിക്ക് സ്വാധീനമുള്ള പടിഞ്ഞാറൻ യുപിയുടെ ഭാഗങ്ങൾ ഒഴിവാക്കുമെന്നും കഴിഞ്ഞ ദിവസം റിപ്പോർട്ടുകൾ പുറത്ത് വന്നതിന് പിറകെയാണ് ആർഎൽഡിയുടെ ഔദ്യോഗിക തീരുമാനം പുറത്ത് വന്നിരിക്കുന്നത്.