സിൽവർ ലൈൻ കല്ലിടൽ നിർത്തിയിട്ടില്ലെന്ന് റവന്യു മന്ത്രി കെ. രാജൻ. തർക്കമില്ലാത്ത സ്ഥലങ്ങളിൽ കല്ലിടൽ തുടരുമെന്നും മന്ത്രി പറഞ്ഞു.
ജിയോ ടാഗിംഗ് അടക്കം പുതിയ സാങ്കേതിക വിദ്യകൾക്ക് അനുമതി നൽകിയത് സർവ്വേ നടപടികൾ വേഗത്തിലാക്കാനെന്നും വിശദീകരണം നൽകിയിട്ടുണ്ട്.
‘ഉടമകൾക്ക് സമ്മതമാണെങ്കിൽ കല്ലിടും. അല്ലെങ്കിൽ കെട്ടിടങ്ങൾ ജിയോ ടാഗ് സംവിധാനം ഉപയോഗിച്ച് അടയാളപ്പെടുത്തും,’ മന്ത്രി കൂട്ടിച്ചേർത്തു.
പുതിയ സർക്കുലർ സർവേ വേഗത്തിലാക്കാനെന്ന് കെ.രാജൻ പറഞ്ഞു. കെ റെയിലിന്റെ ആവശ്യപ്രകാരമാണ് മൂന്ന് തരത്തിലുളള നടപടിക്ക് അനുവദിച്ചതെന്നും മന്ത്രി പറഞ്ഞു. റവന്യു വകുപ്പിന്റേത് ഉത്തരവല്ല, സർക്കുലർ മാത്രം. സമ്മതമുളള സ്ഥലത്ത് മാത്രമാണ് കല്ലിടുക. അടയാളമിടൽ, ജിയോടാഗ് ചെയ്യുക എന്നീ രീതികളും സർവേയ്ക്കായി ഉപയോഗിക്കാമെന്നും മന്ത്രി പറഞ്ഞു.
അതേസമയം, റവന്യൂ വകുപ്പാണ് കെ റെയിലിന്റെ സാമൂഹിക ആഘാത പഠനത്തിന് ജി.പി.സ് സംവിധാനം കൊണ്ടുവരാൻ ഉത്തരവിറക്കിയത്. കേരളാ റെയിൽവേ ഡെവലപ്മെന്റ് കോർപറേഷന്റെ അപേക്ഷ പ്രകാരമാണ് റവന്യൂ വകുപ്പ് ഉത്തരവിറക്കിയത്. കെ റെയിൽ കല്ലിടലിനെതിരെ വലിയ രീതിയിൽ ജനകീയ പ്രതിഷേധങ്ങൾ ഉയർന്നതിനെത്തുടർന്നാണ് തീരുമാനം. ഇനി മുതൽ കല്ലിടൽ വേണ്ട എന്നും പകരം ജി.പി.എസ് സർവേ മതിയെന്നുമാണ് റവന്യൂ വകുപ്പിന്റെ ഉത്തരവിൽ പറയുന്നത്.
