തിരുവനന്തപുരം: സോളാര്‍ പീഡനക്കേസില്‍ മൂന്നിടത്തായി തെളിവെടുപ്പ്. തിരുവനന്തപുരം ആലപ്പുഴ, ഒപ്പം ഡല്‍ഹി കേരള ഹൗസിലുമായിട്ടായിരുന്നു തെളിവെടുപ്പ്. മൊഴിയെടുക്കാനായി ഇന്നലെയാണ് ഉദ്യോഗസ്ഥര്‍ സ്ഥലത്തെത്തിയത്.പരാതിക്കാരിയും ആരോപണവിധേയരായ നേതാക്കളും കേരള ഹൗസില്‍ താമസിച്ച വേളയിലുണ്ടായിരുന്ന ജീവനക്കാരുടെ മൊഴിയാണെടുത്തത്.എംപിയും മുന്‍ മന്ത്രിയുമായ അടൂര്‍ പ്രകാശിനെതിരായ പരാതിയിലും സിബിഐ തെളിവെടുപ്പ് നടത്തി. പീഡനം നടന്നുവെന്ന് പരാതിക്കാരി ആരോപിക്കുന്ന ആലപ്പുഴ ഗസ്റ്റ് ഹൗസിലാണ് അന്വേഷണ സംഘം എത്തി പരിശോധന നടത്തിയത്.
അതേ സമയം, സോളാര്‍ പീഡന കേസുമായി ബന്ധപ്പെട്ട് തിരുവനന്തപുരത്തെ എംഎല്‍എ ഹോസ്റ്റലില്‍ സിബിഐ പരിശോധന നടത്തി. മുന്‍ എംഎല്‍എ ഹൈബി ഈഡനെതിരായ പീഡന പരാതിയിന്മേലാണ് എംഎല്‍എമാരുടെ ഹോസ്റ്റലിനുള്ളില്‍ പരിശോധന നടത്തിയത്.നിള ബ്ലോക്കിലെ 34 നമ്പര്‍ മുറിയിലാണ് പരാതിക്കാരിയുമായെത്തി സിബിഐ പരിശോധിച്ചത്.
2013 ല്‍ എംഎല്‍എ ആയിരിക്കവെ ഹൈബി ഈഡന്‍ നിള ബ്ലോക്കിലെ 34 നമ്പര്‍ മുറിയില്‍ വെച്ച് തന്നെ പീഡിപ്പിച്ചെന്നായിരുന്നു പരാതിക്കാരിയുടെ ആരോപണം.
അഞ്ച് അംഗ സിബിഐ സംഘമാണ് ഇപ്പോള്‍ കേസില്‍ അന്വേഷണം നടത്തുന്നത്. ക്രൈംബ്രാഞ്ച് അന്വേഷിച്ച കേസ് 2021 ആഗസ്റ്റിലായിരുന്നു സിബിഐ ഏറ്റെടുത്തത്.കേസ് അന്വേഷിച്ച ക്രൈംബ്രാഞ്ച് സംഭവത്തില്‍ ഉമ്മന്‍ ചാണ്ടിക്ക് ക്ലീന്‍ചിറ്റ് നല്‍കിയിരുന്നു. സംഭവം നടന്നെന്ന് പരാതിക്കാരി പറഞ്ഞ ദിവസം ഉമ്മന്‍ ചാണ്ടി ക്ലിഫ്ഹൗസില്‍ ഉണ്ടായിരുന്നില്ലെന്നാണ് റിപ്പോര്‍ട്ടിലുള്ളത്.
അതേസമയം ഉമ്മന്‍ ചാണ്ടിയുള്‍പ്പെടെയുള്ളവര്‍ക്കാണ് സിബിഐ എഫ്‌ഐആര്‍ സമര്‍പ്പിച്ചത്. കെസി വേണുഗോപാല്‍, അടൂര്‍ പ്രകാശ്, എപി അനില്‍ കുമാര്‍, ഹൈബി ഈഡന്‍, ബിജെപി ദേശീയ ഉപാധ്യക്ഷന്‍ എപി അബ്ദുല്ലകുട്ടി എന്നിവരും എഫ്‌ഐആര്‍ ഇല്‍ ഉള്‍പ്പെടുന്നു.
