ഡല്ഹി: സിറോ മലബാര് സഭയുടെ ഭൂമിയിടപാട് കേസില് കര്ദിനാള് ജോര്ജ് ആലഞ്ചേരിക്ക് തിരിച്ചടി. കയ്മാറിയത് സര്ക്കാര് ഭൂമിയാണോയെന്ന് അന്വേഷിക്കാന് നിര്ദേശിച്ച ഹൈക്കോടതി ഉത്തരവ് സ്റ്റേ ചെയ്യില്ല. ഉത്തരവ് സ്റ്റേ ചെയ്യാനുളള സഭയുടെ അപേക്ഷ സുപ്രീം കോടതി വിസമ്മതിച്ചു. ഭൂമിയിടപാടുമായി ബന്ധപ്പെട്ട് കാക്കനാട് ഫസ്റ്റ് ക്ല്ളാസ് ജുഡീഷ്യല് മജിസ്ട്രേറ്റ് കോടതിയുടെ പരിഗണനയിലാണ് ഈ കേസുകളുളളത്. കേസുകളുടെ നടപടികള് സ്റ്റേ ചെയ്യണമെന്ന ആവശ്യവും കോടതി അംഗീകരിച്ചില്ല. അതെസമയം ഹൈക്കോടതി ഉത്തരവിനെതിരെ കര്ദിനാള് മാര് ജോര്ജ് ആലഞ്ചേരി നല്കിയ ഹര്ജിയില് സുപ്രീം കോടതി സംസ്ഥാന സര്ക്കാര് ഉള്പ്പടെയുള്ള എതിര് കക്ഷികള്ക്ക് നോട്ടീസ് അയച്ചു.
എന്നാല് ഭൂമിയിടപാടുമായി ബന്ധപ്പെട്ട് കൈമാറ്റം ചെയ്യപ്പെട്ട ഭൂമി സര്ക്കാര് പുറമ്പോക്ക് ഭൂമിയാണെന്ന ആരോപണം പരാതിക്കാര്ക്ക് ഇല്ലെന്നാണ് കര്ദിനാള് മാര് ജോര്ജ് ആലഞ്ചേരിക്ക് വേണ്ടി ഹാജരായ സീനിയര് അഭിഭാഷകന് സിദ്ധാര്ഥ് ലൂതറ സുപ്രീം കോടതിയില് ചൂണ്ടിക്കാട്ടി. അന്വേഷണം സ്റ്റേ ചെയ്തില്ലെങ്കില് അന്വേഷണ ഉദ്യോഗസ്ഥര് കസ്റ്റഡിയില് എടുത്തേക്കുമെന്ന് അഭിഭാഷകന് ആശങ്ക പ്രകടിപ്പിച്ചു.കര്ദിനാളിന് എഴുപത് വയസ് കഴിഞ്ഞു. അഭിഭാഷകന് പറഞ്ഞു. എന്നാല് ഹൈക്കോടതി ഉത്തരവ് കഴിഞ്ഞ ഓഗസ്റ്റുമുതല് ഉളളതാണെന്നും കര്ദിനാള് അപ്പീല് ഫയല് ചെയ്തത് ഫെബ്രുവരിയില് മാത്രമാണെന്നും ജസ്റ്റിസ് ദിനേശ് മഹേശ്വരിയുടെ അധ്യക്ഷതയില് ഉള്ള ബെഞ്ച് ചൂണ്ടിക്കാട്ടി.
ഒരുപക്ഷെ അന്വേഷണത്തിന് ഉത്തരവിട്ട ഹൈക്കോടതിയുടെ നടപടി പരിധി വിട്ടതാണോ എന്നകാര്യം വാദത്തിന് ശേഷമെ വ്യക്തമാക്കുകയെന്നാണ് കോടതി പറഞ്ഞത്. ബെഞ്ചിന് നേതൃത്വം നല്കിയ ജസ്റ്റിസ് ദിനേഷ് മഹേശ്വരി അതുകൊണ്ട്തന്നെ അന്വേഷണത്തിന്റെ ഈ ഘട്ടത്തില് സ്റ്റേ ചെയ്യുന്നില്ലെന്ന് വ്യക്തമാക്കി. പരാതിക്കാരനായ ജോഷി വര്ഗീസിന് വേണ്ടി സീനിയര് അഭിഭാഷകന് ജയന്ത് മുത്തുരാജ്, അഭിഭാഷകന് പി.എസ്.സുധീര് എന്നിവര് ഹാജരായി. കേസില് കക്ഷി ചേരാന് അപേക്ഷ നല്കിയ ഷൈന് വര്ഗീസിന് വേണ്ടി അഭിഭാഷകന് രാകേന്ത് ബസന്ത് ഹാജരായി.
ഭൂമിയിടപാടുമായി ബന്ധപ്പെട്ട് കാക്കനാട് മജിസ്ട്രേറ്റ് കോടതിയുടെ പരിഗണനയിലുള്ള കേസുകളില് വിചാരണ നടപടികളുമായി മുന്നോട്ട് പോകാന് അനുവദിച്ച ഹൈക്കോടതി വിധി സ്റ്റേ ചെയ്യണമെന്നും അഭിഭാഷകന് സിദ്ധാര്ഥ് ലൂതറ ആവശ്യപ്പെട്ടു. അന്വേഷണം നടത്തി ഭൂമിയിടപാട് പരാതിയില് കഴമ്പില്ലെന്ന് പോലീസ് കണ്ടെത്തി മജിസ്ട്രേറ്റ് കോടതിയില് റിപ്പോര്ട്ട് നല്കിയിട്ടുണ്ട്. ഇതിന് പുറമെ ഇടപാടുമായി ബന്ധപ്പെട്ട് മരട് ഫസ്റ്റ് ക്ലാസ് ജുഡീഷ്യല് മജിസ്ട്രേറ്റ് കോടതിയുടെ പരിഗണനയില് സിവില് കേസ് നിലനില്ക്കുന്നുണ്ട്. ഇക്കാര്യങ്ങള്് പരാതിക്കാരന് മറച്ചുവച്ചാണ് കാക്കനാട് ഫസ്റ്റ് ക്ലാസ് ജുഡീഷ്യല് മജിസ്ട്രേറ്റ് കോടതിയില് ആറ് പുതിയ കേസ്സുകള് ഫയല് ചെയ്തതെന്നും അഭിഭാഷകന് ലൂതറ ചൂണ്ടിക്കാട്ടി. എന്നാല് ഈ ഘട്ടത്തില് കേസിലെ നടപടികള് സ്റ്റേ ചെയ്യാന് കഴിയില്ലെന്ന നിലപാടാണ് കോടതി സ്വീകരിച്ചത്.