കേരളത്തില്‍ ഒഴിവുവരുന്ന രാജ്യസഭാ സീറ്റില്‍ സിപിഐ സ്ഥാനാര്‍ഥിയായി പി. സന്തോഷ് കുമാറിനെ തിരഞ്ഞെടുത്തു. ചൊവ്വാഴ്ച വൈകീട്ട് ചേര്‍ന്ന സിപിഐ സംസ്ഥാന എക്‌സിക്യൂട്ടിവ് യോഗത്തിലാണ് തീരുമാനം.
സിപിഐ കണ്ണൂര്‍ ജില്ലാ സെക്രട്ടറിയായ സന്തോഷ് കുമാര്‍ പാര്‍ട്ടി സംസ്ഥാന കൗണ്‍സില്‍ അംഗമാണ്. എഐവൈഎഫ് ദേശീയ ജനറല്‍ സെക്രട്ടറിയായും പ്രവര്‍ത്തിച്ചിട്ടുണ്ട്. 2011ല്‍ കണ്ണൂരിലെ ഇരിക്കൂറില്‍ നിന്ന് നിയമസഭയിലേക്ക് മത്സരിച്ചെങ്കിലും പരാജയപ്പെട്ടിരുന്നു.
സിപിഐ സംസ്ഥാന സെക്രട്ടറി കാനം രാജേന്ദ്രനോട് ഏറ്റവും അടുപ്പം പുലര്‍ത്തുന്നവരില്‍ ഒരാളായ സന്തോഷ് കുമാര്‍ പാര്‍ട്ടിയുടെ യുവജനമുഖമായി അറിയപ്പെടുന്ന നേതാവ് കൂടിയാണ്. മലബാറില്‍ നിന്നുള്ള ഒരാള്‍ ഇത്തവണ രാജ്യസഭയിലേക്ക് പോകണമെന്ന സിപഐ പരിഗണനയാണ് സന്തോഷ് കുമാറിന് കാര്യങ്ങള്‍ അനുകൂലമാക്കിയത്. ഇതോടെ കണ്ണൂരില്‍ നിന്ന് സിപിഐയുടെ എന്‍.ഇ ബല്‍റാമിന് ശേഷം രാജ്യസഭയിലേക്ക് പോകുന്ന ആദ്യത്തെ നേതാവായി സന്തോഷ് കുമാര്‍ മാറും.
രാജ്യസഭയിലേക്കുള്ള സിപിഎം സ്ഥാനാര്‍ഥിയെ വെള്ളിയാഴ്ച തീരുമാനിക്കും. എ.വിജയരാഘവന്‍, ടി.എം. തോമസ് ഐസക്ക്, സി.എസ്. സുജാത, ഡിവൈഎഫ്ഐ അഖിലേന്ത്യാ നേതാവ് എ.എ. റഹിം, വി.പി.സാനു, ചിന്താ ജെറോം എന്നിവരുടെ പേരുകളാണ് സിപിഎം പരിഗണനയിലുള്ളത്.
എല്‍ഡിഎഫിന് വിജയസാധ്യതയുള്ള രണ്ട് രാജ്യസഭാ സീറ്റുകള്‍ സിപിഎമ്മിനും സിപിഐയ്ക്കും നല്‍കാന്‍ ചൊവ്വാഴ്ച ചേര്‍ന്ന ഇടതുമുന്നണി യോഗത്തിലാണ് തീരുമാനമായത്. ദേശീയ സാഹചര്യം കണക്കിലെടുത്ത് സീറ്റ് സിപിഐയ്ക്ക് കൊടുക്കുന്നതാണ് ഉചിതമെന്ന കാര്യം യോഗത്തില്‍ മുഖ്യമന്ത്രി പിണറായി വിജയനാണ് നിര്‍ദേശിച്ചത്. ഈ നിര്‍ദേശം എല്ലാവരും അംഗീകരിക്കുകയായിരുന്നു.
