നയതന്ത്രചാനൽ വഴിയുള്ള സ്വർണ കടത്തു കേസിലെ പ്രതികളുമായുള്ള ബന്ധം പുറത്തുവന്നതിന് പിന്നാലെ കഴിഞ്ഞ ഒന്നര വർഷമായി മുഖ്യമന്ത്രിയുടെ മുൻ പ്രിൻസിപ്പൽ സെക്രട്ടറി എം ശിവശങ്കർ സസ്പെൻഷനിലായിരുന്നു. എന്നാൽ ശിവശങ്കറിന്റെ സസ്പെൻഷൻ കാലാവധി തീർന്നതിനാൽ തിരിച്ചെടുക്കാൻ തീരുമാനമായി. ചീഫ് സെക്രട്ടറി അധ്യക്ഷനായ കമ്മിറ്റിയുടെ ശുപാർശയുടെ അടിസ്ഥാനത്തിലാണ് ശിവശങ്കറിൻ്റെ സസ്പെൻഷൻ പിൻവലിച്ചത്. ഈ ശുപാർശ മുഖ്യമന്ത്രിയും അംഗീകരിച്ചു. ആദ്യ സസ്പെൻഷൻ കാലാവധി 2021 ജൂലൈ പതിനഞ്ചിന് അവസാനിച്ചെങ്കിലും ക്രിമിനൽ കേസിൽ പ്രതി ചേർക്കപ്പെട്ടത് കണക്കിലെടുത്ത് സസ്പെൻഷൻ കാലാവധി ആറ് മാസത്തേക്ക് നീട്ടുകയായിരുന്നു.
ഇപ്പോൾ ഇതാ, ശിവശങ്കറിനെ തിരിച്ചെടുത്തതിൽ രൂക്ഷവിമർശനവുമായി രമേശ് ചെന്നിത്തല രംഗത്തെത്തിയിരിക്കുകയാണ്. സ്വർണക്കടത്തു കേസില് കുറ്റവിമുക്തനാക്കപ്പെടുന്നതിന് മുന്പ് തന്നെ എം. ശിവശങ്കറിനെ സര്വ്വീസില് തിരിച്ചെടുത്തത് മുഖ്യമന്ത്രിയും സ്വർണക്കടത്ത് പ്രതികളും തമ്മിലുള്ള ഒത്തുകളിയാണ് വ്യക്തമാക്കുന്നതെന്നും രാജ്യദ്രോഹപരമായ കള്ളക്കടത്തു നടത്തിയാലും എന്തൊക്കെ തട്ടിപ്പ് നടത്തിയാലും സര്ക്കാര് ഒപ്പമുണ്ടാക്കുമെന്നും ചെന്നിത്തല പറഞ്ഞു. ഇനി കേസിലെ പ്രതിയായ സ്വപ്ന സുരേഷിന് കൂടി മുഖ്യമന്ത്രിയുടെ കീഴിൽ പഴയ ജോലി കൊടുത്താൽ എല്ലാം ശുഭമാകുമെന്നും ചെന്നിത്തല പരിഹസിച്ച് വിമർശിച്ചു.
ചെന്നിത്തലയുടെ വാർത്താക്കുറിപ്പിങ്ങനെ:
മുഖ്യമന്ത്രിയുടെ പ്രിന്സിപ്പല് സെക്രട്ടറിയായിരുന്ന ശിവശങ്കർ സ്വർണക്കടത്തുമായി ബന്ധപ്പെട്ട് കസ്റ്റംസും ഇഡിയും രജിസ്റ്റര് ചെയ്ത കേസുകളില് ഇപ്പോഴും പ്രതിയാണ്. ലൈഫ് തട്ടിപ്പ് കേസിലാകട്ടെ അന്വേഷണം പൂര്ത്തിയിയിട്ടുമില്ല. അങ്ങനെ പ്രതിയായി നില്ക്കുന്ന ഒരാളെയാണ് തിടുക്കത്തില് ചീഫ് സെക്രട്ടറിയുടെ സമിതിയെക്കൊണ്ട് ഒരു റിപ്പോര്ട്ട് എഴുതി വാങ്ങിച്ചിട്ട് സര്വ്വീസില് തിരിച്ചെടുക്കുന്നത്. കോടതി ഈ കേസുകള് പരിഗണിച്ചു കൊണ്ടിരിക്കുന്നതേയുള്ളൂ. കോടതി തീര്പ്പ് കല്പിക്കുന്നതിന് മുന്പ് തന്നെ സര്ക്കാര് പ്രതിയെ കുറ്റവിമുക്തനാക്കിയിരിക്കുകയാണ്. ഇത് വഴി എന്തു സന്ദേശമാണ് നല്കുന്നത്? രാജ്യദ്രോഹപരമായ കള്ളക്കടത്തു നടത്തിയാലും എന്തൊക്കെ തട്ടിപ്പ് നടത്തിയാലും സര്ക്കാര് ഒപ്പമുണ്ടെന്നല്ലേ? കളങ്കിതരായ ഉദ്യോഗസ്ഥരെ സംരക്ഷിക്കുമെന്നല്ലേ? സംസ്ഥാന സര്ക്കാരിന് വേണമെങ്കില് ശിവശങ്കരന്റെ സസ്പെന്ഷന് നീട്ടാമായിരുന്നു. നിയമപരമായി സര്ക്കാരിന് അതിനുള്ള അധികാരമുണ്ട്.
എന്നാല് കുറ്റാരോപിതനെ സംരക്ഷിക്കാനുള്ള സര്ക്കാരിന്റെ വ്യഗ്രത ഈ കേസിലെ കള്ളക്കളികളിയിലേക്കാണ് വിരല് ചൂണ്ടുന്നത്. സ്വർണക്കടത്തുമായി ബന്ധപ്പെട്ട് മുഖ്യമന്ത്രിയുടെയും മറ്റും പേരുകളും പല തവണ ഉയര്ന്നു വന്നിരുന്നതാണ്. പ്രതികളുടെ മൊഴിയില് അത് സംബന്ധിച്ച് പരാമര്ശങ്ങളുമുണ്ട്. അങ്ങനെ നോക്കുമ്പോള് കൂട്ടു പ്രതിയെ സംരക്ഷിക്കാനുള്ള തത്രപ്പാടാണ് സര്ക്കാര് ഇവിടെ കാട്ടിയിരിക്കുന്നത്. ഇനി ഈ കേസിലെ പ്രതി സ്വപ്നാ സുരേഷിനെ കൂടി മുഖ്യമന്ത്രിയുടെ കീഴിലെ പഴയ ജോലിയില് തിരിച്ചെടുത്താല് എല്ലാം ശുഭമാകുമെന്നും രമേശ് ചെന്നിത്തല പരിഹസിച്ചു.
എന്നാൽ, ശിവശങ്കറിന്റെ സർവീസ് കാലാവധി 2023 ജനുവരി അവസാനിക്കും. ശിവശങ്കറിന്റെ ഈ തിരിച്ചുവരവിലൂടെ വീണ്ടും നിർണായക പദവികളിലേക്ക് എത്തുമെന്നാണ് സൂചന. ഒന്നാം പിണറായി സർക്കാരിൻ്റെ കാലത്ത് എല്ലാ പദ്ധതികളെയും മുന്നിൽ നിന്ന് നയിച്ചത് ശിവശങ്കർ ആണ്. അതിനാൽ തന്നെ ഉയർന്ന പദവികളിൽ ഇനിയും നിയമിക്കപ്പെടുമെന്ന് ഉറപ്പാണ്.