കള്ളപ്പണം വെളുപ്പിക്കല് കേസില് അറസ്റ്റിലായി ഒരു വര്ഷത്തിനുശേഷം ജാമ്യത്തിലിറങ്ങിയ ബിനീഷ് കോടിയേരി പണി തുടങ്ങി. ഒരു ഭയവുമില്ലാതെ മാധ്യമപ്രവര്ത്തകരുടെ ചോദ്യത്തിനെല്ലാം ഉത്തരങ്ങള് നല്കി. ബിനീഷ് ഇനി എന്തിനുള്ള പുറപ്പാടാണ് എന്നാണ് പലരുടെയും ചോദ്യം. പലതും വെളിപ്പെടുത്താനുണ്ടെന്നും കേരളത്തില് എത്തട്ടെയെന്നമുള്ള വെല്ലുവിളി സ്വരമാണ് ഇന്നലെ ബിനീഷില് നിന്നുണ്ടായത്. വീണ്ടും പിടിച്ച് അകത്തിടാനുള്ള എല്ലാ വഴികളും ബിനീഷ് തുറക്കുകയാണോ എന്നാണ് സംശയം.
പല പേരുകളും പറയാന് ഇഡി ഉദ്യോഗസ്ഥര് നിര്ബന്ധിച്ചു. കേസുമായി ബന്ധപ്പെട്ട കാര്യങ്ങളല്ല അന്വേഷണ സംഘം ചോദിച്ചത്. ഭരണകൂടത്തിന് അനഭിമതനായതിലാണ് വേട്ടയാടുന്നതെന്നും ബിനീഷ് പ്രതികരിക്കുകയുണ്ടായി. സത്യം ജയിക്കുമെന്നാണ് ജയിലില് നിന്ന് പുറത്തിറങ്ങിയ ബിനീഷ് പ്രതികരിച്ചത്. കേരളത്തില് നടന്ന കേസുമായി ബന്ധപ്പെട്ട് ചില കാര്യങ്ങളും പേരുകളും അവര് പറയുന്നതുപോലെ പറയാന് തയ്യാറാകാത്തതാണ് തന്നെ കേസില് പെടുത്താന് കാരണമെന്നും ബിനീഷ് കൂട്ടിച്ചേര്ത്തു.
കേസ് കെട്ടിച്ചമച്ചതാണ്. ഇന്ത്യയിലുള്ള ഏറ്റവും വലിയ രാഷ്ട്രീയ പാര്ട്ടിയാണ് ഇതിനുപിന്നില്. അന്വേഷണ ഉദ്യോഗസ്ഥര് പറഞ്ഞുതന്ന കാര്യങ്ങള് അതുപോലെ പറഞ്ഞിരുന്നെങ്കില് 10 ദിവസത്തിനകം തന്നെ തനിക്ക് പുറത്തിറങ്ങാമായിരുന്നു. ഗൂഢാലോചന ഉള്പ്പെടെയുള്ള മുഴുവന് കാര്യങ്ങളും കേരളത്തില് എത്തിയശേഷം വിശദീകരിക്കുമെന്നും ബിനീഷ് പറഞ്ഞു.