വയലിനിസ്റ്റ് ബാലഭാസ്‌കറിന്റെയും മകളുടെയും മരണം അമിതവേഗം കാരണമുള്ള അപകടമരണമാണെന്ന് സിബിഐ ഒന്നുകൂടി ഉറപ്പിക്കുമ്പോഴും പല സംശയങ്ങളും വീണ്ടും തലപൊക്കുകയാണ്. ബാലഭാസ്‌കറിന്റെ സുഹൃത്തിന് മോന്‍സണുമായി അടുത്ത ബന്ധമുണ്ടായിരുന്നുവെന്ന കണ്ടെത്തലാണ് ദുരൂഹത വര്‍ദ്ധിപ്പിക്കുന്നത്. ചീഫ് ജുഡീഷ്യല്‍ മജിസ്‌ട്രേറ്റ് കോടതിയില്‍ സമര്‍പ്പിച്ച എതിര്‍ സത്യവാങ്മൂലത്തിലാണ് സിബിഐ ഉദ്യോഗസ്ഥനായ ടിപി അനന്തകൃഷ്ണന്‍ ഇക്കാര്യം വ്യക്തമാക്കുന്നത്. ബാലഭാസ്‌കറിന്റെ മരണത്തില്‍ ആദ്യം സംശയം ഉന്നയിച്ചത് കുടുംബം തന്നെയാണ്.
സംശയിക്കുന്നവര്‍ക്ക് സ്വര്‍ണ കടത്തുമായി ബന്ധമുണ്ടെന്ന് നേരത്തെ തന്നെ ഉയര്‍ന്നിരുന്നു അതിനുപിന്നാലെയാണ് മോന്‍സണുമായി ബന്ധമുണ്ടെന്നുള്ള വിവരവും പുറത്തുവന്നിരിക്കുന്നത്. ബാലഭാസ്‌കറും പുരാവസ്തു തട്ടിപ്പുകാരന്റെ ഇരയായിരുന്നുവെന്നുള്ള സംശയവുമുണ്ട്. ബാലഭാസ്‌കറിന്റേത് അപകട മരണമാണെന്ന ക്രൈംബ്രാഞ്ച് കണ്ടെത്തലിനെതിരെ ബാലഭാസ്‌കറിന്റെ മാതാപിതാക്കളായ കെസി ഉണ്ണിയും ബി ശാന്തകുമാരിയും ചേര്‍ന്ന് മുഖ്യമന്ത്രിക്ക് നല്‍കിയ പരാതിയെ തുടര്‍ന്നാണ് കേസ് സിബിഐക്ക് കൈമാറിയത്.
തിരുവനന്തപുരത്തെ സ്വര്‍ണക്കടത്ത് സംഘത്തിന് മരണത്തില്‍ പങ്കുണ്ടെന്നായിരുന്നു ഉണ്ണിയുടെ മുഖ്യആരോപണം. ഡ്രൈവര്‍ അര്‍ജുന്റെ അതിവേഗവും അലക്ഷ്യമായ വാഹനമോടിക്കലുമാണ് അപകടത്തിന് ഇയാക്കിയതെന്ന ക്രൈംബ്രാഞ്ച് കണ്ടെത്തല്‍ ശരിവെച്ചുകൊണ്ടുള്ള റിപ്പോര്‍ട്ടാണ് സിബിഐ സംഘവും ഫയല്‍ ചെയ്തത്. ഇതിനെതിരെ ബാലഭാസ്‌കറിന്റെ മാതാപിതാക്കളും കേസിലെ സാക്ഷിയായിരുന്ന കലാഭവന്‍ സോബിയും കോടതിയില്‍ ഹര്‍ജി ഫയല്‍ ചെയ്തിരുന്നു.
ഇതിനെതിരെയാണ് ഇപ്പോള്‍ സിബിഐ എതിര്‍ സത്യവാങ്മൂലം ഫയല്‍ ചെയ്തത്. സോബി കേസ് വഴിതിരിച്ചുവിടാന്‍ ആദ്യം മുതല്‍ ശ്രമിച്ചതായി റിപ്പോര്‍ട്ട് കുറ്റപ്പെടുത്തുന്നു. നിര്‍ണായക തെളിവുകളില്‍ സിബിഐ കണ്ണടച്ചതായി ഹര്‍ജിക്കാര്‍ കോടതിയില്‍ പറയുകയുണ്ടായി. കൊലപാതക തെളിവുകള്‍ ലഭിച്ചിട്ടും സിബിഐ ഇരുട്ടില്‍ തപ്പുകയാണെന്നാണ് പറയുന്നത്. പലരെയും ചോദ്യം ചെയ്യുകയോ മൊഴി രേഖപ്പെടുത്തുകയോ ചെയ്തില്ലെന്നും ആരോപണമുണ്ട്. സിബിഐ നടത്തിയ നുണ പരിശോധനയും തട്ടിപ്പെന്നണ് പറയുന്നത്. നുണപരിശോധന തെളിവായി കാണാന്‍ പാടില്ലെന്ന് സുപ്രീംകോടതി വിധിയാണ് ഹര്‍ജിക്കാര്‍ കോടതിയില്‍ ചൂണ്ടിക്കാട്ടിയത്.
അന്വേഷണത്തില്‍ ഇപ്പോഴും ഒരുപാട് പുകമറയുണ്ട്. അതൊക്കെ പുറത്തുകൊണ്ടുവരണമെന്നാണ് ഹര്‍ജിക്കാരുടെ ആവശ്യം. സിബിഐ വെള്ളം ചേര്‍ത്ത കുറ്റപത്രമാണ് സമര്‍പ്പിച്ചതെന്നും പറയുന്നുണ്ട്. ഉപേക്ഷയാലുള്ള മരണം ചുമത്തി നിസ്സാര വകുപ്പായ 304 എ ആണ് ചുമത്തിയിട്ടുള്ളത്. ബാലഭാസ്‌കറിന്റെ വാഹനാപകടത്തില്‍ കാറോടിച്ച ഡ്രൈവര്‍ അര്‍ജുനെതിരെ കൊലപാതകമാകാത്ത കുറ്റകരമായ നരഹത്യ കുറ്റം 304 സിബിഐ കുറ്റപത്രത്തില്‍ ചേര്‍ത്തിട്ടില്ലെന്നാണ് പറയുന്നത്.
