ബിനീഷ് കോടിയേരിയുടെ ജാമ്യം അനന്തമായി നീളുമ്പോള്‍ എന്‍ഫോഴ്‌സ്‌മെന്റ് ഡയറക്ടറേറ്റിന്റെ ചോദ്യത്തിനുമുന്നില്‍ ഉത്തരംമുട്ടി ബിനീഷ്. ബിനീഷ് കോടിയേരിയുടെ ബിസിനസ് സംരംഭങ്ങള്‍ കള്ളപ്പണം വെളുപ്പിക്കാനുള്ള മറയായിരുന്നുവെന്ന് ഇഡി കര്‍ണാടക ഹൈക്കോടതിയോട് വ്യക്തമാക്കി. ഹോട്ടല്‍ നടത്താനാണു ലഹരിക്കേസ് പ്രതി അനൂപ് മുഹമ്മദിനു പണം കൊടുത്തതെന്ന മൊഴി മുഖവിലയ്‌ക്കെടുക്കാനാകില്ലെന്നാണ് ഇഡി കോടതിയെ അറിയിച്ചത്. ബിനീഷിനെ തലങ്ങും വിലങ്ങും കുരുക്കിട്ടിരിക്കുകയാണ് ഇഡി.
പലിശയോ ഈടോ ഇല്ലാതെ അനൂപിനു ലക്ഷങ്ങള്‍ കൈമാറിയത് അവിശ്വസനീയമാണെന്നും ലഹരിയിടപാടിലൂടെ കള്ളപ്പണം വെളുപ്പിക്കാനല്ലാതെ വായ്പയെടുത്തു പണം കൈമാറുമോ എന്നും ഇഡിക്കായി ഹാജരായ അഡീഷനല്‍ സോളിസിറ്റര്‍ ജനറല്‍ അമന്‍ ലേഖി ചോദിച്ചു. തിരുവനന്തപുരം ശംഖുമുഖത്തെ ഓള്‍ഡ് കോഫി ഹൗസിന്റെ പേരില്‍ വായ്പയെടുത്തെന്നു പറയുന്ന തുക ആദായനികുതി രേഖകളില്‍ ഇല്ല. ലഹരിപാര്‍ട്ടിക്കിടെയാണ് ബിനീഷിനെ അനൂപ് പരിചയപ്പെടുത്തിയതെന്ന ലഹരിക്കേസ് പ്രതികളുടെ മൊഴിയും ശ്രദ്ധയില്‍പ്പെടുത്തി.
ബിനീഷ് പറയുന്ന തരത്തില്‍ മത്സ്യ, പച്ചക്കറി മൊത്തവ്യാപാരം നടത്തിയിട്ടുണ്ടെങ്കില്‍ അതിലൂടെ അക്കൗണ്ടിലെത്തുന്ന ദിവസ വരുമാനത്തിന് കണക്കുണ്ടാകില്ലേ? ഇതിന്റെ രേഖകള്‍ ഹാജരാക്കാനായി വരുന്നവഴി കുടുംബസുഹൃത്ത് ട്രെയിനില്‍ കവര്‍ച്ചയ്ക്കിരയായി എന്ന മൊഴി വിശ്വസിക്കാനാകില്ലെന്നാണ് ഇഡി പറയുന്നത്.
പല കള്ളത്തരവും ബിനീഷ് ഇതിനോടകം പറഞ്ഞിട്ടുണ്ട്. ഒന്നും വിശ്വാസയോഗ്യമല്ലെന്നും തെളിവില്ലെന്നും ഇഡി പറയുന്നു. ബിനീഷിന്റെ പണം അനൂപിനു കൈമാറിയ ഡ്രൈവര്‍ അനിക്കുട്ടനെയും വ്യാപാര പങ്കാളി എസ്. അരുണിനെയും ചോദ്യം ചെയ്യാനായി പലതവണ വിളിപ്പിച്ചിട്ടും ഹാജരായിട്ടില്ല. സുതാര്യ ഇടപാടാണെങ്കില്‍ ഇവര്‍ മറഞ്ഞിരിക്കുന്നത് എന്തിനാണെന്നും ഇഡി ചോദിക്കുന്നു.
ബിനീഷ് ഡയറക്ടറായ ബെംഗളൂരുവിലെ ബീ ക്യാപിറ്റല്‍ ഫോറെക്‌സ് ട്രേഡിങ്, കേരളത്തിലെ ബി ക്യാപിറ്റല്‍ ഫൈനാന്‍ഷ്യല്‍ സര്‍വീസസ് എന്നിവയുടെ വിലാസത്തില്‍ പറയുന്ന കെട്ടിടങ്ങളുടെ ഉടമകള്‍ക്ക് കമ്പനികളെ കുറിച്ച് ഒന്നുമറിയില്ല. ഈ കടലാസു കമ്പനികള്‍ വഴി പണം വെളുപ്പിക്കലാണു നടന്നതെന്നാണ് പറയുന്നത്. ലഹരി ബന്ധമാരോപിച്ചുള്ള കള്ളപ്പണം വെളുപ്പിക്കല്‍ കേസില്‍ ബിനീഷിന്റെ ജാമ്യാപേക്ഷയില്‍ ഇഡി വാദം പൂര്‍ത്തിയാക്കി. 23 നാണ് എതിര്‍വാദം നടക്കുക.
കോടികളുടെ കള്ളപ്പണം ഒഴുക്കിയ ബിനീഷിന് ഒരു കാരണവശാലും ജാമ്യം അനുവദിക്കരുതെന്നാണ് ഇഡി ആവശ്യപ്പെട്ടത്. ശക്തമായ വാദങ്ങളാണ് ജാമ്യാപേക്ഷയെ എതിര്‍ത്തി ഇഡി ഉന്നയിക്കുന്നത്. കേസുമായി ബന്ധപ്പെട്ട് രണ്ട് പേരെ കൂടി ചോദ്യം ചെയ്യാനുണ്ട്. ബിനീഷിന് വേണ്ടിയുള്ള ബാങ്ക് നിക്ഷേപങ്ങള്‍ നടത്തിയ വ്യക്തിയാണ് അനിക്കുട്ടന്‍. അതുകൊണ്ടുതന്നെ ഇയാളെ ചോദ്യം ചെയ്യേണ്ടത് അനിവാര്യമാണെന്ന് ഇഡി അറിയിച്ചു.
ബിസിനസ് സംരംഭങ്ങളുടെ മറവിലാണ് കള്ളപ്പണം വെളുപ്പിച്ചിരിക്കുന്നത്. ഗള്‍ഫില്‍ പോയി വിവിധ ബിസിനസുകള്‍ ചെയ്ത് നിയമപരമായിട്ടാണ് പണം സമ്പാദിച്ചതെന്നാണ് ബിനീഷ് ഇപ്പോഴും വാദിക്കുന്നത്.
