രണ്ട് മാസത്തെ ഇടവേളയ്ക്ക് സേഷം സംസ്ഥാന വനിതാ കമ്മീഷന് കസേരയ്ക്ക് പുതിയ അവകാശി എത്തി. സിപിഎം സംസ്ഥാന സമിതി അംഗമായ അഡ്വ. പി. സതീദേവി വനിതാ കമ്മിഷന്‍ അധ്യക്ഷയാകും. മുന്‍ ആരോഗ്യമന്ത്രി കെകെ ശൈലജയെ ഈ സ്ഥാനത്തേക്ക് നിയമിക്കണമെന്നാവശ്യം വ്യാപകമായി ഉയര്‍ന്നിരുന്നു. എന്നാല്‍, പിണറായി സര്‍ക്കാര്‍ ആ ആവശ്യം ചെവിക്കൊണ്ടിട്ടില്ല. വീണ്ടും വിവാദങ്ങളിലേക്ക് വനിതാ കമ്മീഷനെ കൊണ്ടുവിടാനുള്ള ഉദ്ദേശമാണോയെന്നാണ് പലരുടെയും ചോദ്യം. കാരണം, വനിതാ കമ്മീഷന് സ്ഥാനത്തേക്ക് സതീദേവി വരുമ്പോള്‍ ടാസ്‌കുകളും ഏറെയാണ്. സ്ത്രീധന പീഡനക്കേസുകളും ആത്മഹത്യകളും വര്‍ദ്ധിക്കുന്ന സമയത്താണ് സതീദേവിയുടെ നിയമനം.
അതുകൊണ്ടുതന്നെ പ്രവര്‍ത്തനം മികച്ചതും കാര്യക്ഷമവുമാകണം. 2004 ല്‍ വടകര ലോക്‌സഭാ എം.പിയായി തെരഞ്ഞെടുക്കപ്പെട്ടിട്ടുള്ള സതീദേവി നിലവില്‍ ജനാധിപത്യ മഹിളാ അസോസിയേഷന്‍ സംസ്ഥാന സെക്രട്ടറിയാണ്. സിപിഎം സംസ്ഥാന സമിതി അംഗമായ പി. ജയരാജന്റെ സഹോദരിയും അന്തരിച്ച സിപിഎം നേതാവ് എം ദാസന്റെ ഭാര്യയുമാണ്. ചൊവ്വാഴ്ച ചേര്‍ന്ന സംസ്ഥാന സെക്രട്ടേറിയറ്റ് യോഗമാണ് സതീദേവിയെ വനിതാ കമ്മീഷന് അധ്യക്ഷയായി നിയമിക്കാന്‍ തീരുമാനിച്ചത്. സംസ്ഥാനകമ്മറ്റി അന്തിമതീരുമാനമെടുക്കും.
പരാതിക്കാരിയോട് അപമര്യാദയായി പെരുമാറിയതിനെ തുടര്‍ന്ന് മുന്‍ അധ്യക്ഷ എം.സി ജോസഫൈന്‍ രാജിവെച്ച സാഹചര്യത്തിലാണ് സംസ്ഥാന വനിതാ കമ്മീഷന് പുതിയ അധ്യക്ഷയെ തെരഞ്ഞെടുക്കേണ്ടിവന്നത്. ഒരു വര്‍ഷം കൂടി കാലാവധിനിലനില്‍ക്കെയാണ് മുന്‍ അധ്യക്ഷന്‍ ജോസഫൈന്‍ രാജിവെച്ചത്.സ്ത്രീധനപീഡനക്കേസുകളും ആത്മഹത്യകളും തുടര്‍ച്ചയായി നടക്കുന്ന സാഹചര്യത്തില്‍ വനിതാ കമ്മീഷന് അധ്യക്ഷ സ്ഥാനം ഒഴിഞ്ഞുകിടക്കുന്നത് നിയമസഭയില്‍ അടക്കം പലവട്ടം ചോദ്യം ഉയര്‍ന്നിരുന്നു. നടപടികള്‍ സ്വീകരിച്ചുവരികയാണെന്ന മറുപടിയാണു സര്‍ക്കാരില്‍നിന്നു ലഭിച്ചത്.
അനുഭവിച്ചോ വിവാദത്തിന്റെ പേരില്‍ രാജി വയ്ക്കേണ്ടിവന്ന കേന്ദ്ര കമ്മിറ്റിയംഗം എം.സി.ജോസഫൈനു പകരം ആരെ നിയമിക്കുമെന്നതില്‍ ആശയക്കുഴപ്പത്തിലായിരുന്നു സിപിഎം നേതൃത്വം. മുഴുവന്‍സമയ പാര്‍ട്ടി പ്രവര്‍ത്തക വേണോ, പാര്‍ട്ടിക്കു പുറത്തുനിന്നു നിയമപരിജ്ഞാനമുള്ളയാള്‍ വേണോ എന്ന സംശയത്തിലായിരുന്നു പാര്‍ട്ടി. വിമര്‍ശനങ്ങള്‍ ഉയര്‍ന്നതോടെയാണ് സതീദേവിയെ നിയമിക്കാന്‍ തീരുമാനമായത്.
1996ല്‍ കവയത്രി സുഗതകുമാരി അധ്യക്ഷയായി തുടങ്ങിയതാണു സംസ്ഥാനത്തെ വനിതാ കമ്മിഷന്‍. ജസ്റ്റിസ് ഡി.ശ്രീദേവി, എം.കമലം, കെ.സി.റോസക്കുട്ടി എന്നിവര്‍ ജോസഫൈനു മുന്‍പ് അധ്യക്ഷ സ്ഥാനം വഹിച്ചു. ഇതില്‍ ഡി. ശ്രീദേവി രണ്ടു തവണയായി ആറു വര്‍ഷം അധ്യക്ഷ സ്ഥാനത്തിരുന്നിട്ടുണ്ട്. 2017ല്‍ നിയമിക്കപ്പെട്ട എം.സി.ജോസഫൈന്‍ കാലാവധി തീരാന്‍ ഒരു വര്‍ഷം ബാക്കി നില്‍ക്കേയാണു രാജിവച്ചത്. ഏറ്റവുമധികം കാലം കമ്മിഷന്‍ അംഗമായിരുന്ന റെക്കോര്‍ഡ് നൂര്‍ബിന റഷീദിനാണ്. ആദ്യത്തെ വനിതാ കമ്മിഷനിലും അംഗമായിരുന്ന നൂര്‍ബിന, മൂന്നു കമ്മിഷനുകളുടെ കാലത്ത് അംഗമായിരുന്നിട്ടുണ്ട്.
You must be logged in to post a comment Login