മുകേഷ് – മേതിൽ ദേവിക ദാമ്പത്യം വേർപിരിയാൻ ഒരുങ്ങിയതോടെ സോഷ്യൽ മീഡിയയിൽ ഏറ്റവുമധികം ചർച്ച ചെയ്യപ്പെട്ട വ്യക്തിയാണ് രാജീവ് ഗോവിന്ദ് . മേതിൽ ദേവികയുടെ ആദ്യഭർത്താവ് രാജീവ് നായർ ആണ് നിർമാതാവും ഗാനരചയിതാവുമായ രാജീവ് ഗോവിന്ദ് എന്ന് തെറ്റിദ്ധരിച്ചായിരുന്നു ഇത് സോഷ്യൽ മീഡിയയിൽ നിറഞ്ഞത്. അദ്ദേഹത്തിന്റെ ഫോട്ടോയും ഗാനങ്ങളും പുസ്തകങ്ങളുമടക്കം ഈ ചർച്ചകളിലേക്ക് വലിച്ചിഴക്കപ്പെട്ടു.
രാജീവ് എന്ന പേരിലെ സാമ്യം കൊണ്ട് മാത്രം രാജീവ് ഗോവിന്ദിനെ ഇത്തരത്തിൽ വലിച്ചിഴക്കപ്പെട്ടു എന്ന് പറയാനാവില്ല. രാജീവിനെതിരെയുള്ള നീക്കങ്ങൾ വ്യക്തമായ ഗൂഡാലോചന പ്രകാരമുള്ള വ്യക്തിഹത്യയായി വേണം മനസിലാക്കാൻ.
ഇതിനെതിരെ തന്റെ ഫേസ്ബുക് പോസ്റ്റിലൂടെ രാജീവ് ഗോവിന്ദ് ശക്തമായ പ്രതികരണം അറിയിച്ചു.
ആ രാജീവ് നായർ ഞാനല്ല. മേതിൽ ദേവികയുടെ ആദ്യഭർത്താവ് താങ്കളാണോ എന്ന ചോദ്യത്തിന് മറുപടി പറഞ്ഞ് മടുത്തു. ഒരു ഓൺലൈൻ മാധ്യമം ഈ വാർത്ത ഏറ്റെടുത്തതോടെയാണ് ജീവിതത്തിലെ അപ്രതീക്ഷിതമായ ചില അധ്യായങ്ങളുടെ തുടക്കം. ആദ്യം തന്നെ പറയട്ടെ , ദേവികയുടെ ഭർത്താവായിരുന്ന രാജീവ് നായർ ഞാനല്ല. എനിക്ക് അവരുമായി ഒരു ബന്ധവുമില്ല. യാതൊരു അന്വേഷണവും നടത്താതെ എന്നെയും എന്റെ കവിതകളെയും ദേവികയ്ക്ക് ചാർത്തി നൽകി. ഭാവനാ സമ്പന്നമായ കഥകൾ മെനച്ചു. എന്ത് മാധ്യമപ്രവർത്തനമാണിത്. അടിസ്ഥാന രഹിതമായ ഇത്തരം വാർത്തകൾ പ്രചരിപ്പിക്കുന്നവർക്കെതിരെ നിയമനടപടിയെടുക്കാൻ തന്നെയാണ് തീരുമാനം.
ഞാനാണെന്ന് തിരിച്ചറിയാൻ എന്റെ ചിത്രങ്ങളും ഗാനങ്ങളും പുസ്തകവുമൊക്കെ അതിൽ വലിച്ചിഴച്ചു. ദേവികയുടെ പുത്രന്റെ പിതൃത്വവും എന്റെ ചുമലിൽ ചാർത്തി. എങ്ങനെയാണ് ദേവികയുടെ ആദ്യഭർത്താവെന്ന നിഗമനത്തിലേക്ക് ഇവർ എത്തിയതെന്ന് എത്ര ആലോചിച്ചിട്ടും മനസിലാവുന്നില്ല. ലോകത്തെ എല്ലാ രാജീവ് മാരും ഒന്നല്ല . വാർത്ത സൃഷ്ടിച്ചവരും പ്രചരിപ്പിച്ചവരും തെറ്റുകാർ തന്നെയാണ്. എന്നെ അപമാനിക്കുന്ന തരത്തിൽ പ്രചരിപ്പിക്കുന്ന വീഡിയോ അവർ പിൻവലിക്കുക. നിയമനടപടികൾ ആരംഭിച്ചുകഴിഞ്ഞു.
ഇങ്ങനെയാണ് രാജീവിന്റെ ഫേസ്ബുക് പോസ്റ്റ്.