ട്രാന്‍സ്‌ജെന്‍ഡര്‍ അനന്യകുമാരിയുടെ ആത്മഹത്യയില്‍ ദുരൂഹത. കൊച്ചിയിലെ ഫ്ലാറ്റില് തൂങ്ങിമരിച്ച നിലയിലാണ് അനന്യകുമാരി അലക്സിനെ കണ്ടെത്തിയത്. കഴിഞ്ഞ നിയമസഭാ തെരഞ്ഞെടുപ്പില്‍ പികെ കുഞ്ഞാലിക്കുട്ടിക്കെതിരെ വേങ്ങരയില്‍ മത്സരരംഗത്തിറങ്ങിയ ആദ്യ ട്രാന്‍സ്‌ജെന്‍ഡര്‍ യുവതിയായിരുന്നു അനന്യകുമാരി. ഡെമോക്രാറ്റിക് സോഷ്യല്‍ ജസ്റ്റിസ് എന്ന പാര്‍ട്ടിയുടെ പേരിലാണ് അന്ന് അനന്യകുമാരി പത്രിക നല്‍കിയിരുന്നത്. എന്നാല്‍ പിന്നീട് ചില മോശ ആരോപണങ്ങള്‍ മൂലം പാര്‍ട്ടി സ്ഥാനാര്‍ത്ഥിയായി അനന്യയെ ഒഴിവാക്കുകയായിരുന്നു. അതുവരെ പ്രചരണത്തിനും മറ്റും അനന്യകുമാരി സജീവമായിരുന്നു. പല അഭിമുഖങ്ങളും നടത്തിയിരുന്നു. എന്നാല്‍ പിന്നീട് അനന്യകുമാരി സോഷ്യല്‍മീഡിയയില്‍ അദികം സജീവമായിരുന്നില്ല. പോസ്റ്റ്‌മോര്‍ട്ടം റിപ്പോര്‍ട്ട് വന്നതിനുശേഷമേ ആത്മഹത്യയാണോ മറ്റെന്തെങ്കിലും കാരണമാണോ എന്ന് സ്ഥിരീകരിക്കാനാകുകയുള്ളൂ.
ലിംഗമാറ്റ ശസ്ത്രക്രിയയില്‍ പാളിച്ച പറ്റിയതിനെ തുടര്‍ന്ന് താന്‍ ദുരിതമനുഭവിക്കുകയാണെന്ന് പറഞ്ഞ് അനന്യകുമാരി രംഗത്തുവന്നിരുന്നു. ഈ വീഡിയോ പോസ്റ്റ് ചെയ്തതിന് ദിവസങ്ങള്‍ക്കുള്ളിലാണ് അനന്യയെ മരിച്ച നിലയില്‍ കണ്ടെത്തിയിരിക്കുന്നത്. ലിംഗമാറ്റ ശസ്ത്രക്രിയയില്‍ ഡോക്ടര്‍ക്ക് പിഴവ് സംഭവിച്ചു എന്നും താന്‍ മാനസ്സിക, ശാരീരിക ബുദ്ധിമുട്ടുകള്‍ അനുഭവിക്കുകയാണെന്നും അനന്യ പറഞ്ഞിരുന്നു.അനന്യയുടെ വാക്കുകള്‍ കേള്‍ക്കാം.
കേരളത്തിലെ ആദ്യത്തെ ട്രാന്‍സ് ജെന്‍ഡര്‍ റേഡിയോ ജോക്കിയാണ് അനന്യ. നിയമസഭ തെരഞ്ഞെടുപ്പില്‍ ആദ്യമായി മത്സരിക്കാനിറങ്ങിയ ട്രാന്‍സ്‌ജെന്‍ഡര്‍ എന്ന വിശേഷണവും അനന്യയ്ക്ക് ലഭിച്ചിരുന്നു. എന്നാല്‍ അത് പൂര്‍ത്തീകരിക്കാന്‍ അനന്യയ്ക്ക് സാധിച്ചില്ല. കഴിഞ്ഞ വര്‍ഷമാണ് അനന്യ ലിംഗമാറ്റ ശസ്ത്രക്രിയ ചെയ്തത്. എന്നാല്‍, ശസ്ത്രക്രിയ കഴിഞ്ഞ് ഒരു വര്‍ഷം കഴിഞ്ഞിട്ടും തനിക്ക് ജോലി ചെയ്യാനാവുന്നില്ലെന്നായിരുന്നു അനന്യ പറഞ്ഞിരുന്നത്. നിശ്ചിത സമയത്തില്‍ കൂടുതല്‍ എഴുന്നേറ്റുനില്‍ക്കാന്‍ തനിക്ക് കഴിയുന്നില്ലെന്നും ശാരീരിക പ്രശ്നങ്ങള്‍ ഏറെയുണ്ടെന്നും അവര്‍ പറഞ്ഞിരുന്നു.
ഇടപ്പള്ളിയിലെ ഫ്ലാറ്റില് ഇന്നലെ വൈകീട്ട് അഞ്ചരയോടെയാണ് അനന്യയെ തൂങ്ങിമരിച്ച നിലയില്‍ കണ്ടെത്തിയത്. അനന്യയുടെ മരണത്തില്‍ വിശദമായ അന്വേഷണം ആവശ്യപ്പെട്ട് ട്രാന്‍സ്‌ജെന്‍ഡര്‍ കൂട്ടായ്മ മുഖ്യമന്ത്രിയ്ക്ക് പരാതി നല്‍കിയിട്ടുണ്ട്. ശസ്ത്രക്രിയയില്‍ ഉണ്ടായ പിഴവാണെന്നാണ് ട്രാന്‍സ് ജെന്‍ഡര്‍ കൂട്ടായ്മ ആരോപിക്കുന്നത്.എന്റെ യോനി ഭാഗം എന്ന് പറഞ്ഞാല്‍ ചെത്തിക്കളഞ്ഞതു പോലെയാണുള്ളതെന്നും പച്ച മാസം പുറത്തേക്ക് ഇരിക്കുന്നത് പോലെയാണെന്നും അനന്യ പറഞ്ഞിരുന്നു. എനിക്ക് നീതി കിട്ടണം എന്നായിരുന്നു മരിക്കുന്നതിന് അനന്യ പറഞ്ഞത്. എനിക്ക് ഒരു ദിവസം എട്ട് മുതല്‍ പന്ത്രണ്ട് വരെ സാനിറ്ററി പാഡ് മാറ്റണം. ചിലപ്പോള്‍ പാഡ് വാങ്ങിക്കാന്‍ പോലും പൈസ ഉണ്ടാവില്ല. ഇത്രയും വയ്യാഞ്ഞിട്ടും ഇത്ര ബോള്‍ഡായി സംസാരിക്കുന്നത് എനിക്ക് ജീവിക്കണമെന്നുള്ളതുകൊണ്ടാണെന്നും അനന്യ പറഞ്ഞിരുന്നു.
