ഇന്നലെ ഏഷ്യാനെറ്റ് ചര്ച്ചയ്ക്കിടെ നടന്ന നാടകീയമായ രംഗങ്ങളെക്കുറിച്ചാണ് ചര്ച്ചചെയ്യാന് ഉദ്ദേശിക്കുന്നത്. ഏഷ്യാനെറ്റ് അവതാരകന്റെ ലൈവ് ചര്ച്ചയ്ക്കിടെ ഭീഷണി സന്ദേശമെത്തുന്നു, അത് ചര്ച്ചയാകുന്നു മാധ്യമപ്രവര്ത്തകന് വിനു വി ജോണ് വെല്ലുവിളിച്ച് ചര്ച്ച അവസാനിപ്പിക്കുന്നതുമാണ് രംഗം. ബിജെപി നേതൃത്വം ഉള്പ്പെട്ട കൊടകര കള്ളപ്പണ കേസ് സംബന്ധിച്ച് ചര്ച്ച ചെയ്യുന്നിടയില് പോലും ഉന്നത ഉദ്യോഗസ്ഥര് ഭീഷണിപ്പെടുത്തുന്നുവെന്നാണ് വിനു പറയുന്നത്. വിനു വി ജോണിന് ലൈവില് ഭീഷണി സന്ദേശമയച്ചത് മറ്റാരുമല്ല ഇഡി ഉദ്യോഗസ്ഥന് ആണെന്നാണ് വിവരം. എന്നാല്, ഇഡി ഉദ്യോഗസ്ഥര് ഇത്രയും വിലകുറഞ്ഞ ഒരു കാര്യം നടത്തുമെന്ന് സംശയിക്കേണ്ടിയിരിക്കുന്നു. അവിടെയാണ് ട്വിസ്റ്റ് നടക്കുന്നത്. നിങ്ങളെക്കുറിച്ച് അന്വേഷിക്കുന്നുണ്ടെന്ന് ഇഡി ഉദ്യോഗസ്ഥന് മെസേജ് അയച്ചത് വിനുവിനെ കുറിച്ചായിരുന്നില്ല. കെയുഡബ്ല്യുജെയെ കുറിച്ചാണ്.
പത്രപ്രവര്ത്തക യൂണിയന് സര്ക്കാര് ഫണ്ട് വെട്ടിച്ചതിന്റെ തെളിവുകള് നിരത്തി അഡ്വ. കൃഷ്ണരാജ് കഴിഞ്ഞദിവസം രംഗത്തെത്തിയിരുന്നു. ഇതേക്കുറിച്ചുള്ള വെല്ലുവിളി സന്ദേശമാണ് വിനുവിന് എത്തിയതെന്നാണ് വിവരം.
ബിജെപി നേതൃത്വം ഉള്പ്പെട്ട കൊടകര കള്ളപ്പണ കേസ് സംബന്ധിച്ച ലൈവ് ചര്ച്ചയ്ക്കിടെയാണ് അവതാരകന് ഭീഷണി സന്ദേശമെത്തുന്നത്. അധികം സ്മാര്ട്ടാകാന് ശ്രമിക്കരുതെന്നും നിങ്ങളെക്കുറിച്ച് അന്വേഷിക്കുന്നുണ്ടെന്നുമുള്ള മെസേജായിരുന്നു എത്തിയത്. മെസേജ് ലൈവില് വായിച്ചെങ്കിലും ആരാണ് അയച്ചതെന്ന് വിനു വെളിപ്പെടുത്തിയിരുന്നില്ല. ഞാനിപ്പോള് ഭീഷണി സന്ദേശമയച്ച ആളെ പറയുന്നില്ലെന്നും എന്നാല്, ഒരവസരത്തില് പുറത്തുവിടുമെന്നും വിനു പറയുകയുണ്ടായി. കോണ്ഗ്രസ് നേതാവ് രാഹുല് മാങ്കൂട്ടത്തില്, ലോക് താന്ത്രിക് യുവ ജനതാദള് നേതാവ് സലീം മടവൂര്, ഒബിസി മോര്ച്ച മുന് സംസ്ഥാന പ്രസിഡന്റ് ഋഷി പല്പ്പു, രാഹുല് ഈശ്വര് എന്നിവര് പങ്കെടുത്ത ചര്ച്ചയ്ക്കിടെയാണ് വിനുവിന് ഇഡി ഉദ്യോഗസ്ഥന്റെ ഭീഷണി സന്ദേശമെത്തിയത്.
ഒരു സിഗരറ്റ് കൂടില് എഴുതിക്കൊടുത്താല് പോലും അന്വേഷണത്തിന് എത്തുമായിരുന്ന ഇഡി ഉദ്യോഗസ്ഥര് എവിടെയെന്ന് വിനു ചര്ച്ചയ്ക്കിടെ ചോദിച്ചിരുന്നു. ഇഡി ഉദ്യോഗസ്ഥരുടെ രാഷ്ട്രീയ നീക്കത്തെ പറ്റിയും വിനു രൂക്ഷമായ ഭാഷയിലാണ് പ്രതികരിച്ചത്. തുടര്ന്നാണ് ഭീഷണി സന്ദേശമെത്തിയത്. നിങ്ങള് അധികം സ്മാര്ട്ടാകാന് നോക്കേണ്ട. നിങ്ങളെ പോലുള്ള പ്രമുഖ മാധ്യമപ്രവര്ത്തകരെക്കുറിച്ചും അന്വേഷണം നടക്കുന്നുണ്ടെന്നുള്ള തരത്തിലുള്ളതായിരുന്നു ആ സന്ദേശം. ഭീഷണിയെ പേടിക്കില്ലെന്നും ധൈര്യമുണ്ടെങ്കില് അന്വേഷിച്ച് ജയിലില് അടക്കുമെന്നും വിനു വെല്ലുവിളിക്കുകയുമുണ്ടായി.
വിവിധ ജില്ലകളില് പ്രസ് ക്ലബ്ബ് നിര്മ്മാണത്തിന്റെ പേരില് സര്ക്കാര് നല്കിയ രണ്ട് കോടി 55 ലക്ഷം രൂപ കണക്കും കാര്യവും ഇല്ലാതെ പല പത്ര പ്രവര്ത്തകരും തട്ടിയെടുത്തെന്നുള്ള റിപ്പോര്ട്ട് സര്ക്കാരിന് ലഭിച്ചിട്ടുണ്ട്. കൂടാതെ സിദ്ദിഖ് കാപ്പനും മറ്റുമായി ലക്ഷക്കണക്കിന് രൂപയും ഇവര് പിരിച്ചിട്ടുണ്ടെന്നാണ് പറയുന്നത്. എന്നാല് ഇത് കേരള സര്ക്കാര് പൂഴ്ത്തിവെച്ചു. ഇത് കൃത്യമായി പല പ്രമുഖ ചാനല് പത്രപ്രവര്ത്തകര്ക്കും അറിയാം. എന്നാല് പിണറായി വിജയന് അനുകൂലമായ വാര്ത്തകള് കൊടുക്കുകയാണ് ഇവര് ചെയ്യുന്നത്. ഇതേക്കുറിച്ചുള്ള പരാതിയാണ് ഇഡിയ്ക്കുമുന്നില് എത്തിയത്. ഇതുകൂടാതെ,എന്ഐഎ ചില പത്രപ്രവര്ത്തകര്ക്ക് ജിഹാദികളുമായും മാവോയിസ്റ്റുകളുമായി ബന്ധമുണ്ടെന്നുള്ള അന്വേഷണവും നടത്തുന്നുണ്ട്. ഇത് ക്രൈം റിപ്പോര്ട്ട് ചെയ്തിരുന്നു. അതുമായി ബന്ധപ്പെട്ടാണ് വിനു വി ജോണിന് ഇങ്ങനെയൊരു സന്ദേശം എത്തിയിട്ടുള്ളതെന്നാണ് വിവരം.