കൊവിഡ് എന്ന മഹാമാരി സംസ്ഥാനത്ത് വരിഞ്ഞുമുറുകുമ്പോള്‍ മാനദണ്ഡങ്ങള്‍ ലംഘിച്ച് സഭാ വൈദികര്‍ ധ്യാനം നടത്തിയ സംഭവം ചര്‍ച്ചയാകുന്നു, രണ്ട് വൈദികരാണ് കൊവിഡ് ബാധിച്ച് മരിച്ചിരിക്കുന്നത്. ധ്യാനത്തില്‍ പങ്കെടുത്ത 80 വൈദികര്‍ ചികിത്സയിലാണ്. ധ്യാനത്തില്‍ 480 വൈദീകര്‍ പങ്കെടുത്തുവെന്ന് വിശ്വാസികള്‍ പറയുന്നു. വിശ്വാസികളാണ് സി.എസ്.ഐ സഭ വൈദികര്‍ക്കെതിരെ പരാതി നല്‍കിയിരിക്കുന്നത്. മൂന്നാറിലാണ് സംഭവം.
ഏപ്രില്‍ 13 മുതല്‍ 17 വരെയുള്ള ദിവസങ്ങളിലാണ് മൂന്നാറില്‍ ധ്യാനം നടന്നത്. ധ്യാനത്തില്‍ പങ്കെടുത്ത വൈദികര്‍ പള്ളികളിലുമെത്തിയിരുന്നുവെന്നാണ് ചീഫ് സെക്രട്ടറിക്ക് നല്‍കിയ പരാതിയില്‍ പറയുന്നത്. സി.എസ്.ഐ സഭാ ബിഷപ്പ് ധര്‍മരാജ് റസാലവും ഇപ്പോള്‍ നിരീക്ഷണത്തിലാണ്.
ധ്യാനം നടത്തിയത് വൈദികരുടെ എതിര്‍പ്പ് കണക്കിലെടുക്കാതെയാണെന്നും പരാതിയില്‍ പറയുന്നുണ്ട്. ഇത്തരം അവസ്ഥയില്‍ ജനങ്ങളുടെ ജീവന്‍വെച്ച് ധ്യാനം കൂടിയതില്‍ സഭാനേതൃത്വത്തിനെതിരെ കേസെടുക്കണമെന്നാണ് ഇവര്‍ ആവശ്യപ്പെടുന്നു.
അതേസമയം, വിവാദം അനാവശ്യമാണെന്നും പ്രോട്ടോക്കോള്‍ പാലിച്ചായിരുന്നു ധ്യാനമെന്നും സിഎസ്‌ഐ വിശദീകരിക്കുന്നു. തിരുവനന്തപുരത്ത് നിന്ന് പ്രത്യേക ബസുകളിലാണ് വൈദികരെ മൂന്നാറില്‍ എത്തിച്ചത്. ധ്യാനത്തിനിടെ വൈദികര്‍ക്ക് ശരീരിക അസ്വസ്ഥകള്‍ അനുഭവപ്പെട്ടെങ്കിലും കാലവസ്ഥ വ്യതിയാനം നിമിത്തമെന്ന് കരുതി. തുടര്‍ന്ന് നാട്ടിലെത്തിയിട്ടും അസ്വസ്ഥതകള്‍ വിട്ടുമാറാതിരുന്നപ്പോള്‍ നടത്തിയ പരിശോധനയിലാണ് കൊവിഡ് സ്ഥിരീകരിച്ചത്. ധ്യാനത്തിന് ശേഷം വൈദികര്‍ പള്ളികളിലെത്തി ആരാധനകളില്‍ പങ്കെടുത്തതിനാല്‍ വിശ്വാസികളും ആശങ്കയിലാണ്.
