സർക്കാർ നൽകി വന്ന ക്ഷേമ പെൻഷൻ മുടങ്ങിയതോടെ പ്രതിഷേധവുമായി ഭിക്ഷ യാചിച്ച് സമരം നടത്തിയ അടിമാലി സ്വദേശികളായ മറിയക്കുട്ടിക്കും അന്നക്കുട്ടിക്കും സഹായഹസ്ത വുമായി ബിജെപി നേതാവും നടനുമായ കൃഷ്ണകുമാർ രംഗത്ത്. ഇരുവർക്കും ഒരു വർഷത്തേക്കുള്ള പെൻഷൻ തുകയാണ് കൃഷ്ണ കുമാർ വാഗ്ദാനം ചെയ്തിരിക്കുന്നത്.
കഴിഞ്ഞ ദിവസങ്ങളിലാണ് സർക്കാരിനെതിരെ സമരവുമായി ഇരുവരും രംഗത്ത് വന്നത്. പിച്ചച്ചട്ടിയുമായി തെരുവിലറങ്ങി പ്രതിഷേധിക്കുകയായിരുന്നു ഈ വൃദ്ധർ. വിധവാ പെൻഷൻ കുടിശ്ശിക അനുവദിക്കുക, പാവങ്ങളോട് നീതി കാണിക്കുക, പാവങ്ങളുടെ പിച്ചച്ചട്ടിയിൽ കയ്യിട്ട് വാരുന്നത് അവസാനിപ്പിക്കുക, കറന്റ് ബിൽ അടയ്‌ക്കാൻ പോലും നിവൃത്തിയില്ല തുടങ്ങിയ കാര്യങ്ങൾ ആയിരുന്നു ഇവർ ചൂണ്ടിക്കാട്ടിയിരുന്നത്.
സംസ്ഥാന സർക്കാരിന്റെ ക്രൂരതയാർന്ന നടപടികളെ പറ്റി പുറംലോകത്തെ അറിയിച്ച മറിയക്കുട്ടി പിന്നീട് സിപിഎമ്മിന്റെ ആക്രമണത്തിന് ഇരയാകുകയായിരുന്നു. മറിയക്കുട്ടിക്കെതിരെ വ്യാജ വാർത്ത നൽകിയ ദേശാഭിമാനിക്കെതിരെയും മറിയക്കുട്ടി രംഗത്ത് വരികയുണ്ടായി അവർ. തെറ്റായ വാർത്ത നൽകിയ ദേശാഭിമാനി മറിയക്കുട്ടി കോടതിയെ സമീപിക്കുമെന്നറിഞ്ഞതോടെ ഖേദം പ്രകടിപ്പിച്ച് രംഗത്ത് വന്നു. തന്റെയും കുടുംബത്തിന്റെയും അഭിമാനത്തിന് കോട്ടം വരുത്തിയ സി പി എം പാർട്ടിക്കും പത്രത്തിനുമെതിരെ ഹൈക്കോടതിയെ സമീപിക്കാനൊരുങ്ങുകയാണ് ഇപ്പോൾ ഈ 87-കാരി.
