പാലക്കാട്: എസ്.ഡി.പി.ഐ പ്രവര്‍ത്തകന്‍ സുബൈറിന്റെ കൊലയാളികള്‍ സഞ്ചരിച്ച കാര്‍ ആര്‍ എസ് എസ് പ്രവര്‍ത്തകന്‍ സഞ്ജിത്തിന്റേതെന്ന് സ്ഥിരീകരിച്ചത് അമ്മ സുനിത. മകന്‍ കൊല്ലപ്പെടുന്നതിന് ഒന്നരമാസം മുന്‍പ് കാര്‍ വര്‍ക്ഷോപ്പില്‍ കൊടുത്തിരുന്നെന്ന് അവര്‍ പറഞ്ഞു.കാറിന്റെ കേടുപാടുകള്‍ തീര്‍ക്കാന്‍ വലിയ തുക വേണമെന്ന് മകന്‍ പറഞ്ഞിരുന്നു. കാര്‍ കൊടുത്ത വര്‍ക്ഷോപ്പ് ഏതാണന്നോ പിന്നെ എന്ത് സംഭവിച്ചെന്നോ അറിയില്ല. കൊലയാളികള്‍ ഈ കാറിലാണ് സഞ്ചരിച്ചതെന്ന് അറിഞ്ഞത് മാദ്ധ്യമങ്ങളിലൂടെയാണ്-സുനിത ഒരു സ്വകാര്യ ചാനലിനോട് പറഞ്ഞു.
കെ എല്‍ 11 എ ആര്‍ 641 എന്ന കാറാണ് സുബൈറിനെ ഇടിച്ചിടുന്നതിന് വേണ്ടി അക്രമികള്‍ ഉപയോഗിച്ചത്. മുമ്പ് കൊല്ലപ്പെട്ട ആര്‍ എസ് എസ് പ്രവര്‍ത്തകന്‍ സഞ്ജിത്തിന്റേതാണ് ഈ കാറെന്ന് പൊലീസ് പറഞ്ഞു.രണ്ട് കാറുകളിലാണ് അക്രമി സംഘം എത്തിയത്. ഇതില്‍ കെ.എല്‍ 11 എ.ആര്‍ 641 എന്ന നമ്പറിലുള്ള കാര്‍ സുബൈറിനെ ഇടിച്ചിട്ട ശേഷം സംഭവസ്ഥലത്ത് തന്നെ ഉപേക്ഷിക്കുകയായിരുന്നു. കൃത്യം നടത്തിയ ശേഷം മറ്റൊരു കാറിലാണ് അക്രമികള്‍ രക്ഷപ്പെട്ടത്. ഗുരുതരമായി പരിക്കേറ്റ സുബൈറിനെ ഓട്ടോയില്‍ തൊട്ടടുത്ത ആശുപത്രിയില്‍ എത്തിച്ചു. അവിടെ നിന്ന് ജില്ലാ ആശുപത്രിയിലേയ്ക്ക് കൊണ്ട് പോകും വഴിയാണ് മരണപ്പെട്ടത്.
