കോഴിക്കോട്: ഡിവൈഎഫ്ഐ മേഖല സെക്രട്ടറി ഷെജിന്റെ പ്രണയ വിവാഹത്തെതുടര്ന്നുള്ള വിവാദത്തില് നിലപാട് വ്യക്തമാക്കി ഡിവൈഎഫ്ഐ . കേരളത്തിന്റെ മത നിരപേക്ഷ പൈതൃകത്തില് വിള്ളല് വീഴ്ത്താന് മനഃപൂര്വം കെട്ടി ചമച്ച അജണ്ടയാണ് ലൗ ജിഹാദെന്നും ഷെജിനും ജോയ്സ്നയും പുരോഗമന ബോധം സൂക്ഷിക്കുന്ന യുവതയ്ക്ക് മാതൃകയാണെന്നും ഡിവൈഎഫ്ഐ ഫേസ്ബുക്ക് പേജില് പ്രസിദ്ധീകരിച്ച കുറിപ്പില് വ്യക്തമാക്കി.
സിപിഎം കോഴിക്കോട് ജില്ലാ സെക്രട്ടറിയേറ്റ് അംഗവും മുന് എംഎല്എയുമായ ജോര്ജ് എം തോമസ് ഷെജിന്റെയും ജോയ്സനയുടെയും വിവാഹത്തെ തള്ളിപ്പറഞ്ഞും പ്രണയത്തില് സംശയം ഉന്നയിച്ചും നേരത്തെ രംഗത്തെത്തിയിരുന്നു. ലൗജിഹാദ് ഉണ്ടെന്ന് സിപിഎമ്മിന്റെ പാര്ട്ടി രേഖകളിലുണ്ടെന്നും അദ്ദേഹം പറഞ്ഞിരുന്നു. ഷെജിന്റെയും ജോയ്സനയുടെയും വിവാഹത്തിനെതിരെ കോഴിക്കോട് കോടഞ്ചേരിയില് കന്യാസ്ത്രീകളടക്കം പങ്കെടുത്ത പ്രതിഷേധ പ്രകടനമടക്കം നടന്ന സാഹചര്യത്തിലായിരുന്നു ജോര്ജ് എം തോമസിന്റെ പ്രതികരണം.
ജോര്ജ് എം തോമസിന്റെ വാദങ്ങളെല്ലാം തള്ളിക്കൊണ്ടാണ് ഡിവൈഎഫ്ഐ ഇപ്പോള് രംഗത്തെത്തിയിരിക്കുന്നത്. ഷെജിന് പാര്ട്ടിക്ക് വലിയ ഡാമേജ് ഉണ്ടാക്കി എന്നായിരുന്നു ജോര്ജ് എം തോമസിന്റെ വാദം. എന്നാല്, ഷെജിന് പുരോഗമന ബോധം സൂക്ഷിക്കുന്ന യുവതയ്ക്ക് മാതൃകയാണെന്നാണ് ഡിവൈഎഫ്ഐയുടെ പ്രതികരണം.
ഡിവൈഎഫ്ഐ പ്രസിദ്ധീകരിച്ച കുറിപ്പ് പൂര്ണ രൂപത്തില്
ഡിവൈഎഫ്ഐ കണ്ണോത്ത് മേഖലാ സെക്രട്ടറി സഖാവ് ഷെജിന് എം.എസും പങ്കാളി ജോയ്സനയും തമ്മിലുള്ള വിവാഹത്തെ തുടര്ന്ന് ഉയര്ന്നു വന്ന വിവാദം അനാവശ്യവും നിര്ഭാഗ്യകരവുമാണ്. പ്രായപൂര്ത്തിയായ രണ്ട് പേരുടെ വിവാഹമെന്നത് തീര്ത്തും അവരുടെ മാത്രം സ്വകാര്യമായ വിഷയമാണ്. ജാതി-മത-സാമ്പത്തിക-ലിംഗ ഭേദമില്ലാതെ പരസ്പരം പ്രണയിക്കുകയും ഒന്നിച്ചു ജീവിക്കാന് ആഗ്രഹിക്കുകയും ചെയ്യുന്നവര്ക്ക് പിന്തുണ നല്കുക എന്നതാണ് ഡിവൈഎഫ്ഐയുടെ പ്രഖ്യാപിത നിലപാട്. മതേതര വിവാഹങ്ങള് പ്രോത്സാഹിപ്പിക്കാന് സെക്കുലര് മാട്രിമോണി വെബ് സൈറ്റ് തുടങ്ങുകയും മതേതര വിവാഹങ്ങള്ക്ക് പിന്തുണ നല്കുകയും ചെയ്ത പ്രസ്ഥാനമാണ് ഡിവൈഎഫ്ഐ.
മതേതര വിവാഹ ജീവിതത്തിന്റെ വലിയ മാതൃകകള് കാട്ടി തന്ന അനേകം നേതാക്കള് ഡിവൈഎഫ്ഐക്ക് കേരളത്തില് തന്നെയുണ്ട്. കേരളത്തിന്റെ മത നിരപേക്ഷ സാംസ്കാരിക പൈതൃകത്തില് വിള്ളല് വീഴ്ത്താന് സ്ഥാപിത ശക്തികള് മനഃപൂര്വം കെട്ടി ചമച്ച അജണ്ടയാണ് ലൗ ജിഹാദ് എന്ന പ്രയോഗം. ബഹുമാനപ്പെട്ട മുഖ്യമന്ത്രിപിണറായി വിജയന് തന്നെ കണക്കുകള് നിരത്തി നിയമ സഭയിലും പൊതുമധ്യത്തിലും ആവര്ത്തിച്ചു വ്യക്തമാക്കിയ കാര്യമാണ് ലൗ ജിഹാദ് എന്നൊന്ന് കേരളത്തിലില്ലെന്ന കാര്യം. സ്ഥാപിത വര്ഗ്ഗീയ താത്പര്യക്കാര് പൊതു ബോധമായി ഇത്തരം വിഷയങ്ങള് നിര്മ്മിച്ചെടുക്കാന്
ശ്രമിക്കുന്നത് ഗൗരവപൂര്വ്വം കാണണം. കലയിലും രാഷ്രീയത്തിലും ജീവിതത്തിന്റെ സമസ്ത മേഖലയിലും മതം തീവ്രവാദം പിടി മുറുക്കാന് ശ്രമിക്കുന്ന വര്ത്തമാന കാലത്ത് സഖാവ് ഷെജിനും ജോയ്സ്നയും മത നിരപേക്ഷ വൈവാഹിക ജീവിതത്തിന് ഉദാഹരണവും പുരോഗമന ബോധം സൂക്ഷിക്കുന്ന യുവതയ്ക്ക് മാതൃകയുമാണ്. ഇരുവര്ക്കും ഡിവൈഎഫ്ഐ എല്ലാവിധ പിന്തുണയും നല്കും.