തൃശൂര്‍ ചിയ്യാരത്ത് തിരക്കേറിയ റോഡില്‍ ആളുകള്‍ ഓടി കൂടുന്നതും ഒരു പയ്യനെ അടിച്ച് ഓടിക്കുന്നതുമായ കാഴ്ചയാണ് കണ്ടത്. സംഭവത്തിന്റെ സത്യാവസ്ഥ എന്താണെന്ന് അറിഞ്ഞപ്പോള്‍ ആ ചെറുക്കന് നല്ല തല്ല് കിട്ടേണ്ട ആവശ്യമുണ്ടായിരുന്നുവെന്ന് തോന്നിപ്പോകാം. എങ്കിലും നാട്ടുകാര്‍ ഒരു മയവുമില്ലാതെയാണ് യുവാവിനെ തല്ലി ചതച്ചത്. തിരക്കേറിയ റോഡില്‍ പെണ്‍കുട്ടിക്കൊപ്പം ബൈക്ക് റേസിംഗ് നടത്തിയ വിദ്യാര്‍ത്ഥിയും നാട്ടുകാരും തമ്മില്‍ കൂട്ടയടി നടക്കുകയായിരുന്നു. കൊടകര സ്വദേശിയും ചിയ്യാരം ഗലീലിയില്‍ പഠിക്കുന്ന വിദ്യാര്‍ത്ഥിയുമായ അമലും നാട്ടുകാരും തമ്മിലാണു സംഘര്‍ഷമുണ്ടായത്.
റേസിംഗിനിടെ ബൈക്കിന്റെ മുന്‍ഭാഗം ഉയര്‍ത്താന്‍ ശ്രമിച്ചപ്പോള്‍ പിന്നിലിരുന്ന പെണ്‍കുട്ടി തെറിച്ച് റോഡില്‍ വീഴുകയായിരുന്നു. സഹായിക്കാനെത്തിയ നാട്ടുകാര്‍ ഒത്തുകൂടി അമലിനെ ചോദ്യം ചെയ്തു. ഇതിനിടെ, അമല്‍ നാട്ടുകാര്‍ക്കു നേരെ തിരിയുകയും കയര്‍ക്കുകയുമായിരുന്നു. പിന്നീട് കൈയ്യാങ്കളിയില്‍ എത്തുകയും നാട്ടുകാര്‍ യുവാവിനെ എടുത്തിട്ട് പെരുമാറുകയുമായിരുന്നു.
മര്‍ദ്ദനത്തിന്റെ വീഡിയോ ദൃശ്യങ്ങളും പുറത്തുവന്നിട്ടുണ്ട്. ഒരാള്‍ കല്ലുകൊണ്ട് അമലിനെ തലയ്ക്കടിക്കുന്നതും ദൃശ്യങ്ങളില്‍ കാണാം. അമലിനെതിരെയും നാട്ടുകാരില്‍ കണ്ടാലറിയാവുന്നവര്‍ക്ക് എതിരെയും ഒല്ലൂര്‍ പൊലീസ് കേസെടുത്തു.അമലിന്റെ പരാതിയില്‍ ഒല്ലൂര്‍ പൊലീസ് കൊടകര സ്വദേശി ഡേവിസ്, ചീയാരം സ്വദേശി ആന്റോ എന്നിവര്‍ക്കെതിരെ കേസെടുത്തു. അമല്‍ മര്‍ദ്ദിച്ചെന്ന ഡേവിസിന്റെ പരാതിയില്‍ അമലിനെതിരെയും കേസെടുത്തിട്ടുണ്ട്. അമലും കൂട്ടുകാരും പ്രദേശത്ത് സ്ഥിരം ബൈക്ക് റേസിംഗ് നടത്താറുണ്ടെന്ന് ഒല്ലൂര്‍ പൊലീസ് പറയുന്നത്.
അതേസമയം, തന്നെ മര്‍ദ്ദിച്ചവരെ മുന്‍പരിചയമില്ലെന്നും അവര്‍ തന്നെ എന്തിനാണ് മര്‍ദ്ദിച്ചത് എന്ന് അറിയില്ലെന്നുമായിരുന്നു അമലിന്റെ പ്രതികരണം. പെണ്‍കുട്ടിക്കൊപ്പം ബൈക്കില്‍ യാത്ര ചെയ്തതാണോ അവരെ പ്രകോപിപ്പിച്ചത് എന്ന് അറിയില്ല. അതോ താന്‍ ധരിച്ച ജോക്കര്‍ വസ്ത്രമാണോ അവര്‍ക്ക് ഇഷ്ടമാവാതിരുന്നത് എന്നും അറിയില്ല. ബൈക്കില്‍ നിന്ന് വീണ് പരിക്കേറ്റ പെണ്‍കുട്ടിയെ ആശുപത്രിയില്‍ എത്തിക്കാനല്ലേ നാട്ടുകാര്‍ ശ്രമിക്കേണ്ടത്. പകരം തന്നെ ക്രൂരമായി മര്‍ദ്ദിക്കുകയായിരുന്നു. എന്തിനാണ് തല്ല് കിട്ടിയത് എന്നുപോലും അറിയില്ല. മര്‍ദ്ദനത്തിനിടെ കേട്ടാല്‍ അറയ്ക്കുന്ന ഭാഷയില്‍ അസഭ്യം പറയുകയും ചെയ്തുവെന്നും അമല്‍ പറയുന്നു.
സഹപാഠികള്‍ക്കൊപ്പം ഭക്ഷണം കഴിക്കാന്‍ ബൈക്കില്‍ പുറത്തിറങ്ങിപ്പോഴാണ് സംഭവം. ബൈക്കില്‍ പെണ്‍കുട്ടിയുമൊത്ത് സഞ്ചരിച്ചത് ചോദ്യം ചെയ്തായിരുന്നു മര്‍ദ്ദനമെന്നും താന്‍ ധരിച്ചിരുന്ന വസ്ത്രത്തിന്റെ പേരിലും മര്‍ദ്ദിച്ചെന്നും അമല്‍ പറയുന്നുണ്ട്.
