ഇടുക്കിയിലെ എസ്എഫ്ഐ പ്രവര്ത്തകന്റെ കൊലപാതകത്തില് കെഎസ്യുവിനെ വിമര്ശിച്ച് മുന് എം.എല്.എ എം. സ്വരാജ്. കലാലയങ്ങളെ കലാപഭൂമിയാക്കാന് കെ.എസ്.യു കൊലക്കത്തിയെടുത്തത് മുതലാണ് ക്യാംപസ്സുകള് അവരെ വെറുത്തു തുടങ്ങിയതെന്ന് സ്വരാജ് പറയുന്നു.
കലാലയങ്ങളെ കുരുതിക്കളമാക്കാന് കൊലക്കത്തിയുമായി ഉറഞ്ഞുതുള്ളിയ കാലം മുതലാണ് കാമ്പസുകള് കെ.എസ്.യു വിനെ വെറുത്തു തുടങ്ങിയത്. ചോരയിറ്റു വീഴുന്ന കത്തിയുമായി കാമ്പസിലെത്തുന്ന ഈ കൊലയാളിക്കൂട്ടങ്ങളെ അറപ്പോടെ അകറ്റി നിര്ത്താന് വിദ്യാര്ത്ഥി സമൂഹം ഒന്നടങ്കം തീരുമാനിച്ചപ്പോള് കെ.എസ്.യു വിന്റെ വിജയങ്ങള് പഴങ്കഥയായി മാറി. കേരളീയ കലാലയങ്ങളുടെ മൂലയില് പോലും ഇടമില്ലാത്തവരായി ഇന്ന് കെ.എസ്.യു മാറിക്കഴിഞ്ഞുവെന്നും പോസ്റ്റില് പറയുന്നു.
കലാലയങ്ങളില് വെറുക്കപ്പെട്ടവരായതിന് ശേഷവും അവര് കൊലക്കത്തി താഴെ വെക്കാന് തയ്യാറാവുന്നില്ലെന്നും, ചരിത്രത്തില് നിന്നും ഒരു പാഠവും പഠിക്കാന് തയ്യാറാവുന്നില്ലെന്നും അദ്ദേഹം കുറ്റപ്പെടുത്തുന്നു.മാനവരാശിയുടെയാകെ ശത്രുക്കളായ കോണ്ഗ്രസ് നരാധമന്മാര്ക്കെതിരെ ,കൊടിയ നരഹത്യകള്ക്കെതിരെ ഈ നാടുണരും. കുട്ടികളുടെ ചോരയ്ക്കും അമ്മമാരുടെ കണ്ണുനീരിനും ഈ നരാധമ സംഘത്തെക്കൊണ്ട് കേരളം സമാധാനം പറയിക്കും. ഖദറിട്ട കൊലയാളിക്കൂട്ടങ്ങള് നാടിന്റെ വെറുപ്പേറ്റ് ഒടുങ്ങും തീര്ച്ചയെന്നും സ്വരാജ് പറയുന്നു.
ഇന്ന് ഉച്ചയോടെയാണ് ഇടുക്കി എഞ്ചിനിയറിംഗ് കോളേജിലുണ്ടായ സംഘര്ഷത്തില് മൂന്ന് വിദ്യാര്ഥികള്ക്ക് കുത്തേറ്റത്. നെഞ്ചിന് കുത്തേറ്റ കണ്ണൂര് സ്വദേശിയായ ധീരജിനെ ഉടന് ആശുപത്രിയിലെത്തിച്ചെങ്കിലും രക്ഷിക്കാനായില്ല.