മുഖ്യമന്ത്രി പിണറായി വിജയനെയും സര്ക്കാരിന്റെ സര്വ്വകലാശാല നിയമന വിഷയത്തിലും വീണ്ടും രൂക്ഷ വിമര്ശനവുമായി ഗവര്ണര് ആരിഫ് മുഹമ്മദ് ഖാന്. സര്ക്കാരുമായി ഒരു ഏറ്റമുട്ടല് ആഗ്രഹിക്കുന്നില്ലെന്നും ഇതിന് പരിഹാരം മുഖ്യമന്ത്രി പിണറായി വിജയനെ ചാന്സിലറാക്കുക എന്നതാണെന്നും ഗവര്ണര് പറയുന്നു. തന്നെ ചാന്സിലറായി മുന്നിര്ത്തി ഈ പിന്വാതില് നിയമനം നടക്കില്ലെന്നാണ് ഗവര്ണര് തിരിച്ചടിച്ചത്. ഇത് സര്ക്കാരിനേറ്റ കനത്ത പ്രഹരം തന്നെയാണ്.
രാഷ്ട്രീയ ഇടപെടല് ഉണ്ടാവില്ല എന്ന പരിപൂര്ണ ഉറപ്പ് ലഭിക്കാതെ തന്റെ നിലപാട് പുനഃപരിശോധിക്കില്ലെന്നു തന്നെയാണ് ഗവര്ണര് ഇന്നും വ്യക്തമാക്കിയത്. ആരെ വേണമെങ്കിലും സര്ക്കാരിന് സര്വകലാശാലകളില് വൈസ് ചാന്സിലറായി നിയമിക്കാം. എന്നാല്, തന്നെ ചാന്സിലറായി മുന് നിര്ത്തി അത് വേണ്ടെന്ന് തീര്ത്തു പറഞ്ഞിരിക്കുകയാണ് ഗവര്ണര്. സര്ക്കാരുമായി ഒരു ഏറ്റുമുട്ടലിന് താല്പര്യമില്ല, അതുകൊണ്ടാണ് സ്ഥാനം ഒഴിയാമെന്ന് പറഞ്ഞത്.
ചാന്സിലര് സ്ഥാനം ഒഴിവാക്കി കൊണ്ട് സര്ക്കാരിനെ ഓര്ഡിനന്സ് ഇറക്കാം. അതില് താന് ഒപ്പിട്ടു നല്കാം. ഗവര്ണര് എന്നത് പേരിന് മാത്രമാണുള്ളതെങ്കില് തന്റെ സമയം നഷ്ടപ്പെടുത്താന് താല്പര്യമില്ല. സംഭാഷണങ്ങള് കൊണ്ടൊന്നും കാര്യമില്ലെന്നും അദ്ദേഹം പറയുന്നു.