ഹലാല് ചര്ച്ചകള് സമൂഹമാധ്യമങ്ങളില് കൊഴുക്കുമ്പോഴാണ് ഡിവൈഎഫ്ഐയുടെ ഫുഡ് സ്ട്രീറ്റ് പ്രതിഷേധമെത്തുന്നത്. ഇതിനെതിരെ പരിഹാസവുമായി എത്തിയിരിക്കുകയാണ് നടന് ഹരീഷ് പേരടി. ക്രിസ്ത്യന് ഭൂരിപക്ഷ പ്രദേശമായ എറണാകുളത്ത് പന്നി വിളമ്പി. എന്നാല് മലപ്പുറത്ത് പന്നി വിളമ്പിയോ എന്ന് അദ്ദേഹം ചോദിച്ചു. ഫോട്ടോഷോപ്പ് അല്ലാതെയുള്ള ചിത്രം അയച്ചാല് തന്റെ വാക്കുകള് പിന്വലിക്കാം എന്നും അദ്ദേഹം പറയുന്നു.
ഡിവൈഎഫ്ഐയോട് ഒരു ചോദ്യം. മലപ്പുറത്ത് പന്നി വിളമ്പിയോ? ക്രിസ്ത്യന് ഭൂരിപക്ഷ പ്രദേശമായ എറണാകുളത്തെ ഫോട്ടോ കണ്ടു. മുസ്ലിം ഭൂരിപക്ഷ പ്രദേശമായ മലപ്പുറത്തെ ഒരു ഫോട്ടോയും ഡിവൈഎഫ്ഐയുടെ മലപ്പുറം പേജില് പോലും കണ്ടില്ല. മലപ്പുറത്ത് പന്നി വിളമ്പിയിട്ടുണ്ടെങ്കില് നിങ്ങള് ഡിവൈഎഫ്ഐ ആണ്. അല്ലെങ്കില് വെറും ഡിങ്കോളാഫികളാണെന്നും ഹരീഷ് പേരടി പരിഹസിക്കുന്നു. മലപ്പുറത്തെ ഫോട്ടോഷോപ്പല്ലാത്ത ഒര്ജിനല് ഫോട്ടോ അയച്ച് തന്നാല് ഈ പോസ്റ്റ് പിന്വലിക്കുന്നതാണെന്നും ഹരീഷ് പേരടി പറയുന്നു.
ഭക്ഷണത്തില് മതം കലര്ത്തിയുള്ള സംഘപരിവാര് സംഘടനകളുടെ വിദ്വേഷ പ്രചാരണത്തിനെതിരെയാണ് നവംബര് 24ന് ജില്ലാ കേന്ദ്രങ്ങളില് ഡിവൈഎഫ്ഐയുടെ നേതൃത്വത്തില് ‘ഫുഡ് സ്ട്രീറ്റ് ‘ സംഘടിപ്പിച്ചത്.ഹലാല് വിവാദം മതസൗഹാര്ദം തകര്ക്കാനുള്ള നീക്കമാണെന്നായിരുന്നു സിപിഐഎം നേതാവ് കോടിയേരി ബാലകൃഷ്ണന് കഴിഞ്ഞ ദിവസം പ്രതികരിച്ചത്.
അതേസമയം, ശ്രീജിത്ത് പണിക്കര് പ്രതികരിച്ചതിങ്ങനെ..നവംബര് 23ന് ഡിവൈഎഫ്ഐ ദേശീയ അധ്യക്ഷന് എ എ റഹിം ഫേസ്ബുക്കില് എഴുതിയത് ‘ഭക്ഷണത്തിന് മതമില്ല’ എന്നായിരുന്നു. തൊട്ടടുത്ത ദിവസം അദ്ദേഹം പോസ്റ്റ് ചെയ്ത ഫുഡ് ഫെസ്റ്റിവല് ചിത്രമാണിത്. ഇതില് ഭക്ഷ്യ കൗണ്ടറില് കാണുന്നത് ‘ഹലാല് ഭക്ഷണം’ എന്നാണ്. അതല്ലാത്ത കൗണ്ടറും ഉണ്ടായിരുന്നിരിക്കാം. മതപരമായ വിശ്വാസങ്ങളും പ്രമാണങ്ങളും പ്രകാരം ഭക്ഷണം തയ്യാറാക്കുന്ന രീതിയാണ് ഹലാല്. ആ പേരില് ഒരു കൗണ്ടര് വെക്കാന് തീരുമാനിച്ചത് എന്തിനാവും? അങ്ങനെ ബോര്ഡ് വെക്കാന് ആണെങ്കില് ‘ഭക്ഷണത്തിന് മതമില്ല’ എന്ന് സഖാവ് റഹിം തലേന്ന് പറഞ്ഞത് എന്തിനാവും? അതോ നവംബര് 23ന് ഭക്ഷണത്തിന് മതമില്ലെന്നും 24ന് ഉണ്ടെന്നും ആണോ ഞാന് മനസ്സിലാക്കേണ്ടതെന്നും ശ്രീജിത്ത് പണിക്കര് വിമര്ശിക്കുന്നു.
ഇതിനിടയിലാണ് ഇന്ത്യന് ക്രിക്കറ്റ് ടീമിന്റെ ഭക്ഷണ മെനുവില് ഹലാല് മാംസം നിര്ബന്ധമാക്കി ബിസിസിഐ രംഗത്തുവന്നത്. കാണ്പൂരില് നടക്കുന്ന ന്യൂസിലന്ഡിനെതിരായ ഒന്നാം ടെസ്റ്റിനുള്ള ഭക്ഷണ മെനുവിലാണ് ബിസിസിഐ താരങ്ങള്ക്ക് ഹലാല് ഭക്ഷണം ഏര്പ്പെടുത്തിയത്. ഇതോടൊപ്പം ബീഫും പന്നിയിറച്ചിയും കഴിക്കരുതെന്നും നിര്ദേശമുണ്ടെന്നും പറയുന്നു.
താരങ്ങള്ക്ക് പോഷകാഹാരം ഉറപ്പുവരുത്തുന്നതിന്റെ ഭാഗമായി തയ്യാറാക്കിയ ഡയറ്റ് പ്ലാനാണെന്നാണ് പറയുന്നത്. ഈ ഭക്ഷണ മെനു പുറത്തുവന്നതിനുപിന്നാലെ സോഷ്യല്മീഡിയയില് വ്യാപക കമന്റുകളാണ് എത്തുന്നത്. #BCCIPromotesHalal എന്ന ഹാഷ്ടാഗിലാണ് വിമര്ശനങ്ങള് നടക്കുന്നത്. ടീമിലെ ഒരു വിഭാഗത്തിന്റെ താത്പര്യത്തിന് അനുസരിച്ചാണ് ബിസിസിഐയുടെ തീരുമാനമെന്നും ആരോപണമുണ്ട്.