മുന്‍ മുഖ്യമന്ത്രി ഉമ്മന്‍ചാണ്ടിക്കെതിരെ വെളിപ്പെടുത്തലുമായി എസ്.എന്‍.ഡി.പി യോഗം ജനറല്‍ സെക്രട്ടറി വെളളാപ്പളളി നടേശന്‍. 2011ലെ നിയമസഭാ തിരഞ്ഞെടുപ്പില്‍ ഹരിപ്പാട്ട് രമേശ് ചെന്നിത്തലയെ തോല്‍പ്പിക്കാന്‍ സഹായം തേടി ഉമ്മന്‍ ചാണ്ടിയുടെ ദൂതന്‍ തന്നെ സമീപിച്ചിരുന്നതായാണ് വെള്ളാപ്പള്ളിയുടെ വെളിപ്പെടുത്തല്‍. ഓര്‍ത്തഡോക്സ് സഭയുടെ ഏഴായിരത്തിലധികം വോട്ടുകള്‍ ഹരിപ്പാട് മണ്ഡലത്തിലുണ്ട്. അവര്‍ മാറി വോട്ട് ചെയ്യും. നിങ്ങള്‍ കൂടി സഹായിച്ചാല്‍ രമേശ് ചെന്നിത്തലയെ തോല്‍പ്പിക്കാം’ എന്നാണ് ദൂതന്‍ പറഞ്ഞത്. ഉമ്മന്‍ ചാണ്ടിയാണ് ദൂതനെ പറഞ്ഞയച്ചതെന്ന് ഞാന്‍ പറയുന്നില്ല.എന്നാല്‍ വന്നയാള്‍ സഭയുടെ പ്രതിനിധിയായിരുന്നു. ആ പണിക്ക് ഞങ്ങളില്ലെന്നും ദൂതനോട് പറഞ്ഞയച്ചെന്നാണ് വെളളാപ്പളളി വ്യക്തമാക്കിയത്.
ഓര്‍ത്തഡോക്സ് സഭാംഗമാണ് ഉമ്മന്‍ചാണ്ടിയെന്നും 84ാം പിറന്നാള്‍ ആഘോഷിച്ച വെള്ളാപ്പള്ളി പറയുന്നു. കെപിസിസി പ്രസിഡന്റായിരുന്ന വിഎം സുധീരന്റെ ആവശ്യപ്രകാരം അന്നത്തെ ആഭ്യന്തര മന്ത്രി രമേശ് ചെന്നിത്തല എന്നെ അറസ്റ്റ് ചെയ്ത് അകത്തിടാന്‍ നോക്കിയെന്നും ഈഴവനായ സുധീരന്‍ ഈഴവനായ എന്നെ അതിര്‍ത്താല്‍ മറ്റ് സമുദായങ്ങളുടെ പിന്തുണ ലഭിക്കുമെന്ന രാഷ്ട്രീയ അടവുനയമാണ് പയറ്റിയതെന്നും വെള്ളാപ്പള്ളി തുറന്നടിക്കുന്നു. രമേശ് ചെന്നിത്തല പിന്നില്‍ നിന്നാണ് കുത്തിയതെങ്കില്‍ ഉമ്മന്‍ചാണ്ടി മുന്നില്‍ നിന്നാണ് കുത്തിയത്.
കേരള കോണ്‍ഗ്രസ് -മാണി വിഭാഗത്തിന് ലഭിച്ച പൗള്‍ട്രി ഡെവലപ്‌മെന്റ് കോര്‍പ്പറേഷന്‍ ചെയര്‍മാന്‍ സ്ഥാനം കെഎം മാണിയും ഞാനുമായുള്ള ധാരണ പ്രകാരം ഈഴവ സമുദായത്തിനാണ് നല്‍കിയത്. അത് ഉമ്മന്‍ചാണ്ടി തിരിച്ചെടുത്ത് മാനസപുത്രന് നല്‍കിയെന്നും ഇക്കാര്യം മാണിയോട് ചോദിച്ചപ്പോള്‍ വിഷമമുണ്ടെന്നും താന്‍ ബലഹീനനാണെന്നുമാണ് അദ്ദേഹം അന്ന് പറഞ്ഞതെന്നും വെള്ളാപ്പള്ളി പറയുന്നു. ശക്തനും കരുത്തനുമാണ് പിണറായി വിജയനെന്നും വെള്ളാപ്പള്ളി പറയുന്നുണ്ട്. പാര്‍ട്ടിയെ ഒന്നാക്കി നിറുത്തിയത് ആ ഉരുക്കു മനുഷ്യനാണ്. ഗ്രൂപ്പ് വഴക്കു കാരണം ഛിന്നഭിന്നമായ പാര്‍ട്ടിയെ ഒന്നാക്കാന്‍ സാക്ഷാല്‍ സര്‍ദാര്‍ പട്ടേലിന്റെ പ്രതിരൂപനായാണ് പിണറായി പ്രവര്‍ത്തിച്ചതെന്നും വെള്ളാപ്പള്ളി പറയുന്നു.
നാട്ടുകാര്‍ക്ക് എല്ലാ നല്ല കാര്യങ്ങളും ഞാന്‍ ചെയ്തിട്ടുണ്ട്. ആ സ്‌നേഹം നാട്ടുകാര്‍ തന്നോട് കാണിച്ചിട്ടുണ്ട്. ആളുകളെ സഹായിച്ചുള്ള പാരമ്പര്യമേ തനിക്കുള്ളൂവെന്നും വെള്ളാപ്പള്ളി പറയുന്നു. ഞാന്‍ അറിഞ്ഞുകൊണ്ട് ആരെയും മുറിവേല്‍പ്പിച്ചിട്ടില്ല. ഞാന്‍ സത്യങ്ങള്‍ മാത്രം പറയുന്നയാളാണ്. അത്രയും തറവേല കാണിക്കുന്നവര്‍ക്ക് മാത്രമേ മുറിവേല്‍ക്കുകയുള്ളൂവെന്നും വെള്ളാപ്പള്ളി പറയുകയുണ്ടായി. എന്നെ ഏറ്റവും കൂടുതല്‍ വേദനിപ്പിച്ചത് വിഎസ് അച്യുതാനന്ദനാണെന്നും വെള്ളാപ്പള്ളി പറയുന്നു. കാരണം, വിഎസും ഞാനും വര്‍ഷങ്ങളായുള്ള ബന്ധമാണ്. പല സന്ദര്‍ഭങ്ങളിലും അദ്ദേഹത്തെ ഞാന്‍ സഹായിച്ചിട്ടുണ്ട്, ജയിലില്‍ കിടന്നപ്പോള്‍ പോലും. എന്നാല്‍ പിന്നീട് ചൈനീസ് ചാരനാണെന്ന് പറഞ്ഞ് തനിക്കെതിരെ പെറ്റീഷന്‍ കൊടുക്കുകയും തന്റെ വീട് പരിശോധിക്കാന്‍ വരെ ഇടയാക്കിയിട്ടുണ്ട്. അക്കാര്യത്തില്‍ മാത്രമാണ് അദ്ദേഹത്തിന്റെ നിലപാടിനോട് യോജിക്കാന്‍ പറ്റാത്തതെന്നും വെള്ളാപ്പള്ളി തുറന്നു പറയുന്നു.
