കോഴിക്കോട്: കരിപ്പൂരില്‍ പ്രവാസി യാത്രക്കാരെ ലക്ഷ്യമിട്ട് ഹണിട്രാപ്പ്. വിദേശത്തുനിന്നെത്തുന്ന പ്രവാസികളുമായി സൗഹൃദം സ്ഥാപിച്ച് വിവിധ ഹോട്ടലുകളിലേക്ക് ക്ഷണിക്കും. ശേഷം വലയിലാവുന്നവരുടെ നഗ്നചിത്രങ്ങള്‍ എടുക്കുകയും പുറത്തുവിടുമെന്ന് ഭീഷണിപ്പെടുത്തി പണം തട്ടുകയുമാണ് രീതി.
ഗോവ, കര്‍ണാടക സ്വദേശികളെ ഉപയോഗിച്ചാണ് തട്ടിപ്പ് നടത്തുന്നത്. സംഭവവുമായി ബന്ധപ്പെട്ട് കോഴിക്കോട് നല്ലളം പറവത്ത് നിഷാദ്, പെരുവള്ളൂര്‍ സ്വദേശി യാക്കൂബ് എന്നിവരെ അറസ്റ്റുചെയ്തു. ഒന്നാം പ്രതി വേങ്ങര വാളക്കുട സ്വദേശി ശിഹാബ് കര്‍ണാടകയില്‍ മറ്റൊരു കേസില്‍ ജയിലിലാണെന്നാണ് പൊലീസ് പറയുന്നത്.
ഒന്നരലക്ഷം രൂപ നഷ്ടപ്പെട്ട ഒരു പ്രവാസിയുടെ പരാതിയെത്തുടര്‍ന്ന് നടത്തിയ അന്വേഷണത്തിലാണ് തട്ടിപ്പ് സംഘം വലയിലായത്. വിമാനമിറങ്ങുന്ന പ്രവാസികളുമായി യുവതികള്‍ സൗഹൃദം സ്ഥാപിക്കും. തുടര്‍ന്ന് യുവതികള്‍ ഇരകളുമായി ഏതെങ്കിലും സ്വകാര്യ കേന്ദ്രത്തിലേക്ക് പോകും. അവിടെയെത്തുന്ന സംഘത്തിലെ യുവാക്കള്‍ ഇവരെ ഒന്നിച്ചുനിറുത്തി നഗ്‌നഫോട്ടോ എടുക്കുകയും പണം ആവശ്യപ്പെടുകയുമാണ് തട്ടിപ്പുകാര്‍ ചെയ്തുവരുന്നത്.
നിരവധി പേരാണ് ഇവരുടെ തട്ടിപ്പിന് ഇരയായത്. നാണക്കേട് ഭയന്നാണ് പലരും പരാതി നല്‍കാന്‍ മടിക്കുന്നതെന്നാണ് പൊലീസ് പറയുന്നത്. ഈ അനുകൂല സാഹചര്യം മുതലാക്കി ഇവര്‍ തട്ടിപ്പ് കൂടുതല്‍ വ്യാപിപ്പിക്കുകയായിരുന്നു. സംഘത്തില്‍ ഉള്‍പ്പെട്ട മറ്റുള്ളവര്‍ക്കുവേണ്ടി പൊലീസ് തിരച്ചില്‍ ആരംഭിച്ചു.
