സീരിയല്‍ താരങ്ങളായ യുവകൃഷ്ണയും നടി മൃദുല വിജയ്യും വിവാഹിതരായി. താരങ്ങളുടെ വിവാഹ വിശേഷങ്ങളാണ് രണ്ട് ദിവസങ്ങളിലായി സോഷ്യല്‍മീഡിയ നിറയെ. മൃദുലയുടെ ഹല്‍ദി ചടങ്ങ് ആഘോഷങ്ങളും വൈറലായിരുന്നു. തിരുവനന്തപുരം ആറ്റുകാല്‍ ക്ഷേത്രത്തില്‍ വെച്ചായിരുന്നു വിവാഹ ചടങ്ങുകള്‍ നടന്നത്.നാടന്‍ വേഷത്തില്‍ സിംപിള്‍ ആയിട്ടാണ് നടി മൃദുല വിവാഹത്തിനൊരുങ്ങിയിരുന്നത്. ലൈവായി മൃദുല തന്നെ വിവാഹവിശേഷങ്ങള്‍ യൂട്യൂബ് ചാനലിലൂടെ പങ്കുവെച്ചിരുന്നു. കൊവിഡ് മാനദണ്ഡങ്ങള്‍ നിലനില്‍ക്കുന്നതിനാല്‍ ബന്ധുക്കള്‍ മാത്രമാണ് ചടങ്ങില്‍ പങ്കെടുത്തത്.
സെറ്റ് സാരിയായിരുന്നു മൃദുലയുടെ കല്യാണ വേഷം. 2020 ഡിസംബര്‍ 23നാണ് ഇരുവരുടെയും വിവാഹനിശ്ചയം നടന്നത്. ഇവരുടെ സുഹൃത്തായ നടി രേഖ സതീഷ് വഴിയാണ് വിവാഹാലോചന വരുന്നതെന്ന് രണ്ടുപേരും പറഞ്ഞിട്ടുണ്ട്. അതുകൊണ്ടുതന്നെ ഒരു പ്രണയവിവാഹം അല്ലായിരുന്നു. വീട്ടുകാര്‍ തമ്മില്‍ ആലോചിച്ച് തീരുമാനമെടുക്കുകയാണുണ്ടായത്. 2015 മുതല്‍ അഭിനയരംഗത്ത് സജീവമാണ് മൃദുല വിജയ്. മഴവില്‍ മനോരമയില്‍ സംപ്രേക്ഷണം ചെയ്തിരുന്ന കൃഷ്ണതുളസി എന്ന് പറയുന്ന സീരിയലിലൂടെയാണ് അഭിനയ രംഗത്തെത്തുന്നത്.
റിയാലിറ്റി ഷോയില്‍ മിമിക്രി അവതരിപ്പിച്ച് പ്രേക്ഷക ശ്രദ്ധ പിടിച്ചുപറ്റിയ താരം കൂടിയാണ് മൃദുല വിജയ്. മഞ്ഞില്‍ വിരിഞ്ഞ പൂവ് എന്ന സീരിയലിലൂടെ മനു പ്രതാപ് എന്ന കഥാപാത്രത്തിലൂടെയാണ് യുവകൃഷ്ണ മലയാളത്തിലെത്തുന്നത്. മൃദുലയുടെ വിവാഹ സെറ്റ് സാരി ശ്രദ്ധേയമായിരുന്നു. ബാലരാമപുരത്തെ മംഗല്യക്കസവ് ടീം തയ്യാറാക്കിയ പ്രത്യേക ഡിസൈനായിരുന്നു.
